ރެއާލް މެޑްރިޑުގެ ކޯޗުކަމާ ޒައިނުއްދީން ޒިދާން ހަވާލުވުމަށްފަހު ރަށުން ބޭރުގައި ކުޅުނު ފުރަތަމަ މެޗުގައި ރޭ ރެއާލް ބެޓިސް އަތުން 1-1އިން ރެއާލް މެޑްރިޑް އެއްވަރުވެއްޖެ އެވެ.
މި ނަތީޖާއާއެކު ރެއާލް ވަނީ ވާދަވެރި ބާސެލޯނާ އަށްވުރެ އެއް މެޗު އިތުރަށް ކުޅެ ހަތަރު ޕޮއިންޓް ފަހަތަށް ގޮސްފަ އެވެ. ފްރާންސްގެ ކުރީގެ ކެޕްޓަން އަދި ރެއާލް މެޑްރިޑުގެ ލެޖެންޑް ޒިދާން ކޯޗުކަމާ ހަވާލުވެ މީގެ ކުރިން ކުޅުނު ދެ މެޗުން ވެސް ރެއާލް މޮޅުވީ ތަފާތު ބޮޑު ނަތީޖާއަކުންނެވެ.
ނަމަވެސް ރޭ އެއްވަރުވި މެޗަށް ފަހު އޭނާ ބުނީ އޭނާގެ ގޭމް ޕްލޭނާއެއްގޮތަށް ކުރިއަށް ދިއުމުން އަދި އޮތީ ކަމަށާއި މެޗު އެއްވަރުވުމަކީ މުޅިން އެހެން ކަމެއް ކަމަށެވެ.
"އަހަރުމެން އޮތީ ރަނގަޅު ޓްރެކުގައި. އަހަރުމެންގެ ގޭމް ޕްލޭން ފޮލޯ ކުރުން ކުރިއަށް އޮތީ ވެސް. އަހަރުމެން ވިސްނަންވާނީ ޕޮޒިޓިވްކޮށް. ދެ ޕޮއިންޓް ގެއްލުމަކީ މެޗުގެ ނެގެޓިވް ވާހަކަ. އެކަމަކު ވިސްނަންވީ މިކަމުން އަރައިގަނެވޭނެކަން. އެންމެ ފަހު ވަގުތާ ހަމަ އަށް ވެސް އަހަރުމެން ލީގަށް ވާދަކުރުމުގައި ތިބެންޖެހޭނެ،" 43 އަހަރުގެ ކޯޗު ބުންޏެވެ.
ރެއާލް ބެޓިސް އަކީ ރޭގެ މެޗު ފެށިއިރު ރެލިގޭޝަން ޒޯނުގައި އޮތް ޓީމެކެވެ. އެ ޓީމަށް ލިބިފައިވަނީ 22 ޕޮއިންޓާއެކު 14 ވަނަ އެވެ. ރޭގެ މެޗަށް ނުކުތްއިރު ބެޓިސް އަށް އެމީހުން އެންމެ ފަހުން ކުޅުނު 10 މެޗުން ވެސް މޮޅުވެވިފައެއްނުވެ އެވެ. އަދި ރެއާލް ކޮޅަށް އެ ޓީމުގެ އަލްވާރޯ ޖެހި ގޯލަކީ ފާއިތުވެދިޔަ އަށް މެޗުގައި އެ ޓީމުން ޖެހި ހަމައެކަނި ގޯލެވެ. މި މެޗުގައި ރެއާލް އަށް ނަތީޖާ ހަމަހަމަކޮށްދިނީ ކަރީމް ބެންޒެމާ އެވެ.