މުދާ ހިފައިގެން ދަތުރުކުރަމުން ދިޔަ ދޯންޏެއް ފަރަށް އަރައިފި

މުދާ ހިފައިގެން ދަތުރުކުރަމުން ދިޔަ ސަޕްލައި ދޯންޏެއް ލ. ހުޅިމެންދޫ ފަރަށް އަރައިފި އެވެ.

އެމްއެންޑީއެފުން މައުލޫމާތު ދޭ ގޮތުގައި "ބޮނިތޯ ކެރިއާ" ނަމަކަށް ކިޔާ މި ދޯނި ފަރަށް އެރި ކަމުގެ މައުލޫމާތު އެ އިދާރާއަށް ލިބުނީ ރޭ ދަންވަރު 2:07 ހާއިރު އެވެ.

މައުލޫމާތު ލިބުމާއިއެކު އެމްއެންޑީއެފް ސެންޓްރަލް އޭރިއާ ކޯސްޓްގާޑް ތާޑް ސްކޮޑްރަންގެ ސިފައިން ވަނީ މި ދޯންޏަށް އެހީތެރިކަން ފޯރުކޮށްދޭން ފަށާފަ އެވެ.

ނަމަވެސް، މިހާރު މި ދޯނި ފުން ކުރުމުގެ މަސައްކަތް ކުރަނީ ދޯނީގެ ވެރި ފަރާތުން ކަމަށާއި، އެމްއެންޑީއެފުން ވެސް ހަރަކާތްތެރި ވަމުން އަންނަ ކަމަށް އެ އިދާރާއިން މައުލޫމާތު ދެއެވެ.

ފަރަށް އެރި އިރު 85 ފޫޓުގެ ދޯނި ދަތުރުކުރަމުން ދިޔައީ މުދާ ހިފައިގެން މާލެއިން އައްޑޫ އަތޮޅު ހެރެތެރެ ރިސޯޓަށެވެ. އަދި މި ދޯނީގައި 6 ފަޅުވެރިން ތިއްބެވެ.

މި ހާދިސާގައި އެ ދޯނިން ދަތުރުކުރި އެއްވެސް މީހަކަށް ގެއްލުމެއް ލިބިފައެއް ނުވެ އެވެ.