ޕާޓީތަކުގެ މެންބަޝިޕް ފޯމްގައި ފިންގަޕްރިންޓް ހުށަހަޅާފައި ނެތް މެމްބަރުން ޕާޓީތަކުން ވަކިކުރުން ފަސްކޮށްދިނުމުގެ އަމުރަކަށް އެދި އެމްޑީޕީން ހައި ކޯޓަށް ހުށަހަޅާފައިވާ މައްސަލަ އަށް ޖަވާބުދާރީ ވުމަށް ދައުލަތަށް އިތުރު ފުރުސަތެއް ހައިކޯޓުން ދީފި އެވެ.
މެމްބަރުންގެ ގޮތުގައި ރަޖިސްޓްރީކޮށްދޭން އެދި ޕާޓީތަކުން ހުށަހަޅާފައި ހުރި ފޯމުތަކުގައި އިނގިލީގެ ނިޝާން ހަމަކުރަންޖެހޭ ގޮތަށް އިލެކްޝަންސް ކޮމިޝަނުން ނިންމި ނިންމުމަކީ ގާނޫނާ ހިލާފު އެންގުމެއް ކަމަށް ކަނޑައަޅައިދިނުމަށް ސިވިލް ކޯޓަށް އެމްޑީޕީއިން ވަނީ މައްސަލައެއް ހުށަހަޅާފައެވެ. އެ މައްސަލާގެ ތެރެއަށް ޑީއާރްޕީ އަދި އަދާލަތުން ޕާޓީން ވަނީ ވަދެފައެވެ. އެ މައްސަލަ ނިމެންދެން މެމްބަރުން އުނިކުރުން މަޑުޖައްސާލުމުގެ އަމުރަކަށް އެމްޑީޕީން ވަނީ ސިވިލް ކޯޓުގައި އެދިފައެވެ. ނަމަވެސް ސިވިލް ކޯޓުން ވަނީ އެފަދަ އަމުރެއް ނެރެވެން ނެތް ކަމަށް ނިންމާފައެވެ.
އެމްޑީޕީއިން ވަނީ ސިވިލް ކޯޓުގެ ނިންމުން ހައިކޯޓުގައި އިސްތިއުނާފުކޮށްފަ އެވެ. ހައިކޯޓުގައި މިއަދު ބޭއްވި އެ މައްސަލާގެ އިސްތިއުނާފުގެ އަޑުއެހުމުގައި ދައުލަތުގެ ވަކީލް ވިދާޅުވީ، އިލެކްޝަންސް ކޮމިޝަނާއެކު މަޝްވަރާތަކެއް ކުރެވެމުންދާތީ، ޖަވާބުދާރީވުމަށް އިތުރު މުއްދަތެއް ބޭނުންވާ ކަމަށެވެ. މައްސަލަ ބައްލަވާ ހައިކޯޓުގެ ފަނޑިޔާރުން ވަނީ ލިޔުމުން ޖަވާބުދާރީވުމަށް ދައުލަތަށް މި ހަފުތާ ނިމުމުގެ ކުރިން އަންގާފަ އެވެ.
އެމްޑީޕީގެ ވަކީލު ވިދާޅުވީ، މެންބަރުން އުނިކުރުން މަޑުޖައްސާލުމަށް ވަގުތީ އަމުރެއް ނެރެނުދީފި ނަމަ އެޕާޓީއަށް ބޮޑެތި ގެއްލުންތަކެއް ލިބޭނެ ކަމަށާއި ފިންގަޕްރިންޓް ނެތް މެމްބަރުން އުނިކުރުމުން 23،000 އަށް ވުރެ ގިނަ މެމްބަރުން އެ ޕާޓީ އަށް ގެއްލޭނެ ކަމަށެވެ.
ސިވިލް ކޯޓަށް ހުށަހަޅާފައިވާ މައްސަލަ ހުށަހެޅި ސަބަބާ ގުޅޭގޮތުން އެމްޑީޕީގެ ސެކެޓްރީ ޖެނަރަލްކަން ވެސް ކުރައްވާ ވަކީލް، އަނަސް އަބްދުއްސައްތާރު ވިދާޅުވެފައިވަނީ، ގާނޫނުގެ ކުރިން ހުށަހަޅާފައިވާ ފޯމްތަކުގައި ފިންގަޕްރިންޓް ޖަހަންޖެހޭ ކަމަށް އިލެކްޝަންސް ކޮމިޝަނުން ނިންމީ، ގާނޫނު ތަފާތު ގޮތަކަށް މާނަކޮށްގެން ކަމަށެވެ. އެހެން ކަމުން ކޯޓު މެދުވެރިކޮށް އެ މައްސަލަޔަށް ހައްލެއް ލިބޭނެ ކަމަށް ގަބޫލުކުރެވޭ ކަމަށެވެ. އަދި ވިދާޅުވީ، މައްސަލަ ކޯޓުގައި އޮތަސް އެމްޑީޕީއިން އިލެކްޝަންގެ އަމުރަށް ކިޔަމަންވާނެ ކަމަށާއި، ފޯމްތަކުގައި ފިންގަޕްރިންޓް ޖެހުމުގެ މަސައްކަތް މިހާރުވެސް އެމްޑީޕީން ކުރަމުންދާ ކަމަށެވެ.
ޑީއާރްޕީގެ ލީޑަރު ކާނަލް މުހައްމަދު ނަޝީދު ވިދާޅުވެފައިވަނީ، ކުރިން ކޮށްފައިވާ ކަމަކަށް ފަހުން ހެދޭ ގާނޫނު ނުހިނގާނެ ކަމަށް ގާނޫނު އަސާސީގައި ބުނެފައިވާ ކަމަށާއި އެ މައްސަލައިގައި އެޓާނީ ޖެނަރަލް ވެސް ލަފާދެއްވީ އެގޮތަށް ކަމަށެވެ. އެހެން ކަމުން، ޕާޓީތަކުގެ ގާނޫނަށް އިސްލާހު ގެނައުމުގެ ކުރިން ޕާޓީތަކަށް ސޮއިކޮށްފައި ތިބި މެމްބަރުންގެ އިނގިލީގެ ނިޝާން ހުށަހަޅަން ނުޖެހޭނެ ކަމަށް ދެކިވަޑައިގަންނަވާތީ އިލެކްޝަންގެ އެންގުމަށް އަމަލު ނުކުރާނެ ކަމަށް ނަޝީދު ވިދާޅުވި އެވެ.
މި މައްސަލާގައި ކޯޓުން ނިންމާ ގޮތަކަށް އަމަލުކުރާނެ ކަމަށް އިއްޔެ އިލެކްޝަންސް ކޮމިޝަނުން ވަނީ ބުނެފައެވެ. ފިންގަޕްރިންޓް މައްސަލާގައި ބަންޑާރަ ނައިބު މުހައްމަދު އަނިލް ލަފާ ދެއްވާފައިވަނީ ގާނޫނު އައުމުގެ ކުރިން ޕާޓީތަކަށް ސޮއިކުރި މެމްބަރުންގެ ފިންގަޕްރިންޓް ހުށަހަޅަން ނޭންގޭނެ ކަމަށެވެ. ނަމަވެސް ބަންޑާރަ ނައިބުގެ މި ލަފާއަށް އިލެކްޝަންސް ކޮމިޝަނުން އަމަލުކޮށްފައެއް ނުވެއެވެ. އަދި އެގޮތަށް އަމަލުނުކުރި ސަބަބާ ގުޅޭގޮތުން އެ ކޮމިޝަނުން ވާހަކަ ދައްކާފައެއް ވެސް ނުވެއެވެ.
އިލެކްޝަން ކޮމިޝަނުން އިއްޔެ ބޭއްވި ނޫސްވެރިންގެ ބައްދަލުވުމުގެ ތެރެއިން.-- އަވަސް ފޮޓޯ: މުހައްމަދު އަޒާން