މަހަށް ނިކުމެ އުޅުނު ގއ. ދާންދޫގެ މަސް ދޯންޏެއް ބިންދައިގެން ގޮސްފި އެވެ.
"ފަހިރޯދި" ނަމަކަށް ކިޔާ މި ދޯނި ބިންދައިގެން ގޮސްފައިވަނީ ރޭ ދަންވަރުގެ ވަގުތެއްގައި ކަނޑު ގަދަވެގެން ގއ. އަތޮޅާ ތިން މޭލު ބޭރުންނެވެ. އަދި ބިންދައިގެން ދިޔަ އިރު ދޯނީގައި 19 މީހުން ތިބިކަމަށް މައުލޫމާތު ލިބެ އެވެ.
އެމްއެންޑީއެފުން ބުނީ މި ދޯނި ބިންދައިގެން ދިޔަ ކަމުގެ މައުލޫމާތު ލިބުމާއިއެކު އެމްއެންޑީއެފުގެ ކޯސްޓް ގާޑުން އެ ސަރަހައްދަށް ދިޔަ ކަމަށެވެ. ނަމަވެސް އެހެން ބަޔަކު އޭރު އެ ދޯންޏަށް އެހީތެރިކަން ފޯރުކޮށްދީފައިވާ ކަމަށް އެމްއެންޑީއެފުން ބުނެ އެވެ.
މިގޮތުން މިފްކޯގެ "ރަންދި 23" ބޯޓުން ވެސް ވަނީ ބިންދައިގެން ދިޔަ ދޯންޏަށް އެހީތެރިކަން ފޯރުކޮށްދީފަ އެވެ.
މި ހާދިސާގައި މި ދޯންޏަށް ބޮޑެތި ގެއްލުންތަކެއް ލިބިފައިވާއިރު ފޮޓޯ ތަކުން ފެންނަނީ ދޯނީގެ ގެއާއި، ފަހަތު ބައި ވަކިވެފައި އޮތް މަންޒަރެވެ.
މި ދޯނީގެ ވަކިވި ދެބައި ދާންދޫއަށް ގެންދިއުމުގެ މަސައްކަތް އަންނަނީ ކުރަމުންނެވެ.