ކޮންމެ 50،000 އަހަރަކުން އެއްފަހަރު ފެންނަ "ގްރީން ކޮމެޓް" މާލެ ސަރަހައްދުން ބަލައިލުމުގެ އިންތިޒާމުތައް ސްޕޭސްކެޓުން ހަމަޖައްސައިފިއެވެ.
"ގްރީން ކޮމެޓް" ފަލަކީ އިލްމުވެރިން ދެނެގަތީ މިދިޔަ އަހަރުގެ މާޗް ދެވަނަ ދުވަހު ޒްވިކީ ޓްރާންސިއެންޓް ފެސިލިޓީ ޓެލެސްކޯޕް ބޭނުންކޮށްގެން ސެން ޑިއޭގޯގެ ކަލްޓެކްގެ ޕަލޯމާ އޮބްޒަވޭޓަރީގައެވެ.
އަންނަ ފެބްރުއަރީ މަހުގެ އަށް ވަނަ ދުވަހުގެ ނިޔަލަށް ރާއްޖޭގެ އެކި ހިސާބުތަކަށް މި ކޮމެޓް ފެންނާނެކަމަށް ލަފާކުރެވެއެވެ. އަދި އަނދިރިކޮށް އޮންނަ ސަރަހައްދުތަކުން ހަމަ ލޮލަށް ވެސް މި ކޮމެޓް ފެނުން އެކަށީގެންވެއެވެ.
މިރޭ މި ކޮމެޓު ދަތުރުކުރާތަން ބަލައިލަން ބޭނުންވާ މީހުންނަށް އެއްވެސް އަގަކާއި ނުލައި އެ ފުރުސަތު ސްޕޭސްކެޓުން ވަނީ ހުޅުވާލާފައެވެ. މިގޮތުން މާލެ މަސްވެރިންގެ ޕާކުގައި މިރޭ 8:00 އިން ފެށިގެން ޓެލެސްކޯޕެއް ބަހައްޓާފައި ހުންނާނެއެވެ.
މީގެ އިތުރުން މާދަމާ ރޭ 8:00 އިން ފެށިގެން ހުޅުމާލޭ ދެވަނަ ފިޔަވަހީގެ ވޯލްޑް ކަޕްގެ މެޗުތައް އެޅުވި ހުސްބިން ސަރަހައްދުގައި ވެސް ޓެލެސްކޯޕެއް ބަހައްޓާނެކަމަށް ސްޕޭސްކެޓުން ވަނީ ބުނެފައެވެ.
މި ކޮމެޓު ފެހި ކުލައިން ދިއްލިފައި ހުންނަނީ އިރުގެ ޔޫވީ ރޭޑިއޭޝަނުން ކޮމެޓުގައި އެކުލެވޭ ގޭސްތައް ދިއްލާލާތީއެވެ. އަދި މިއީ މި ކޮމެޓު ދުނިޔެއަށް ފެންނަ އެންމެ ފަހު ފަހަރަށް ވެދާނެކަމަށް ވެސް ފަލަކީ އިލްމުވެރިން ލަފާކުރެއެވެ.