ރާއްޖެއަށް މިއަހަރުގެ މިހާތަނަށް 214،000 އަށްވުރެ ގިނަ ފަތުރުވެރިން ޒިޔާރަތްކޮށްފި އެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުން މިމަހުގެ ހަތްވަނަ ދުވަހުގެ ނިޔަލަށް ރާއްޖެއަށް ޒިޔާރަތްކުރީ 214،985 ފަތުރުވެރިންނެވެ.
މިއީ މިދިޔަ އަހަރުގެ އެ މުއްދަތުގައި ރާއްޖެ އައި ފަތުރުވެރިންނަށްވުރެ 31 ޕަސަންޓް އިތުރުވުމެކެވެ. މިދިޔަ އަހަރުގެ އެ މުއްދަތުގައި އައީ 163،684 ފަތުރުވެރިންނެވެ.
ތަފާސްހިސާބުތަކަށް ބަލާނަމަ އެވަރެޖްކޮށް ދުވާލަކު 5،658 ފަތުރުވެރިން ރާއްޖެ އާދެ އެވެ.
މިހާރު އެންމެ ގިނައިން ފަތުރުވެރިން އަންނަ ގައުމަކީ ރަޝިއާ އެވެ.
އެންމެ ގިނައިން ފަތުރުވެރިން އަންނަ 10 ގައުމު
- ރަޝިއާ - 27،960
- އިންޑިއާ - 23،422
- އިޓަލީ - 20،513
- އިނގިރޭސިވިލާތް - 18،942
- ޖަރުމަނު - 13،662
- އެމެރިކާ - 9،274
- ފްރާންސް - 8،979
- ޗައިނާ - 6،909
- ސްވިޓްޒަލޭންޑް - 4،723
- ޕޮލޭންޑް - 4،044
ކޮވިޑަށްފަހު ކްރޫޒްލައިނާތައް ރާއްޖެ އަންނަން ވަނީ ފަށާފަ އެވެ. އެގޮތުން މިމަހުވެސް ކްރޫޒްލައިނާއެއް ރާއްޖެ އައިސްފައިވެ އެވެ.
ރާއްޖެ އަންނަ ފަތުރުވެރިން އިތުރުވަމުންދާއިރު މިހާރު ރާއްޖޭގައި ފަތުރުވެރިންނަށް ހިދުމަތް ދިނުމަށް 1،218 ތަނެއް ދަނީ ހިންގަމުންނެވެ. އެތަންތަނުގައި ފަތުރުވެރިންނަށް 59،840 އެނދު އެބަހުއްޓެވެ.
މިހާރު އޮޕަރޭޓް ކުރަމުންދަނީ 168 ރިސޯޓާއި 880 ގެސްޓްހައުސް އާއި 157 ސަފާރީ އުޅަނދުގެ އިތުރުން 13 ހޮޓަލެވެ.
