ބަތަލާ ކާޖޮލް އަކީ ސޯޝަލް މީޑިއާގައި ވަރަށް އެކްޓިވްކޮށް އުޅޭ ބަތަލާ އެކެވެ. ބުދަ ދުވަހު ކާޖޮލް އޭނާގެ އިންސްޓަގްރާމް އެކައުންޓުން ޝެއާ ކުރި ޕޯސްޓެއްގައި އެންމެ ކުރިން ވަރަށް ކަޅުކޮށް ހުރި ކާޖޮލް ފާއިތުވީ އަހަރުތަކުގައި ދޮންވަމުން ދޮންވަމުން ގޮސް "މާ ބޮޑަށް ދޮންވީ" ސަބަބު ކިޔައިދީފައި ވެއެވެ.
އޭނާ މަޖާ ގޮތަކަށް މިކަމާ ގުޅޭ ގޮތުން ވާހަކަ ދައްކާފައި މިވަނީ ފާއިތުވީ ދުވަސް ތަކުގައި އޭނާއަށް ގިނަ ބަޔަކު މަލާމާތްކުރާ ސަބަބަކަށް މިކަން ވެފައި ވާތީ އެވެ.
މި ޕޯސްޓްގައި ކާޖޮލް ވަނީ ނޫކުލައިގެ ޓީޝާޓެއް ލައިގެން އަވިއައިނެއް އަޅައިގެން މޫނު ފޮރުވައިގެން ހުރި ފޮޓޮއެއް ޝެއާ ކޮށްފަ އެވެ. މި ފޮޓޯ ނަގާފައި ވަނީ ފިހާރައެއްގެ ތެރޭގަ އެވެ. މިއީ ސަން ބްލޮކް އާއި އެފަދަ ސާމާނު ވިއްކާ ފިހާރަ އެކެވެ.
"އަހަރެން ދޮންވީ ކިހިނެއްތޯ ސުވާލުކުރާ އެންމެންނަށް #ސަންބްލޮކް، #އެސްޕީފަންބީޓެބްލް،" އޭނާ ދޮންވީ މި އެއްޗެތި އުނގުޅީމަ ކަމަށް ދޭހަވާ ގޮތަކަށް ކާޖޮލް ލިޔެފައި ވެއެވެ.
ކާޖޮލް ބޮލީވުޑަށް ތައާރަފްވީ 1992ގައި ރިލީޒްކޮށްފައިވާ "ބޭޚުދީ" އިންނެވެ. އަދި އޭގެ ފަހުން ފާއިތުވީ 30 ވަރަކަށް އަހަރުގެ ތެރޭގައި އޭނާގެ ގިނަ ފިލްމުތަކެއް ރިލީޒްކޮށްފައި ވެއެވެ. ހުނަރުވެރި ބަތަލާއެއްގެ އިތުރަށް ކާޖޮލް އަކީ އޭނާގެ ރީތި ކަމަށްވެސް މަޝްހޫރު ބަތަލާ އެކެވެ.
ހަންގަނޑުގެ ކުލަ ދޮންކޮށް ތިބޭ ބަތަލާއިން ބެލުންތެރިންނަށް ކަމުދިޔަޔަސް ފެށުނީއްސުރެ ވެސް ކާޖޮލް އަކީ ހަންގަނޑު ކަޅު ބަތަލާއެއް ކަން އެންމެންވެސް ދަނެ އެވެ. އަދި އޭނާގެ ދެ ބުމަ މާބޯވެފައި ގުޅިފައި ހުރުމަކީ ވެސް އެހެނިހެން ބަތަލާއިންނާ ތަފާތު ސިފަ އެކެވެ.
ފިލްމު ބަލާ މީހުންނަށް އެންމެ މަގުބޫލު ބަތަލާއަކަށް ކާޖޮލްވީ އޭނާގެ މި ސިފަތައް މިހެން ހުއްޓަ އެވެ. ނަމަވެސް މިއީ ސޯޝަލް މީޑިއާގައި ބައެއް މީހުންގެ ހަނގާކުރުން އޭނާއަށް އަމާޒުވަމުންދިޔަ ސަބަބަކަށް ވަނީ ވެފަ އެވެ. އެހެންވެ ކާޖޮލް މިފަހަރު މަޖާ ގޮތަކަށް ޖަވާބުދީފައި މިވަނީ އޭނާއާ ހަނގާ ކުރާ މީހުންނަށެވެ.
ނެޓްފްލިކްސް އިން 2021ގައި ދެއްކި ޕްރޮގްރާމެއްގައި ވެސް ކާޖޮލް މިކަމާ ގުޅޭ ގޮތުން ވާހަކަ ދައްކާފައި ވެއެވެ.
ކާޖޮލް ބުނެފައިވާ ގޮތުގައި އަމިއްލަ ސިފައާ މެދު ދެކޭ ގޮތް ބަދަލުކުރަން އޭނާގެ މާމަ ޝޯބްނާ ސަމާތު އޭނާ ވަރަށް ޅައިރު އޭނާއަށް ނަސޭހަތް ދީފައި ވެއެވެ. އަދި އެ ނަސޭހަތުގައި ހިފައިގެން އަމިއްލަ ސިފައިގައި ހުރި އައިބުތައް އެއީ ނެތް އެއްޗަކަށް ހަދައިގެން އުޅެން އޭނާ ވަނީ ދަސްކޮށްފަ އެވެ.
ހަމުގެ ކުލައާ ހެދި ޓްރޯލްގެ ޝިކާރައަކަށްވީ ހަމައެކަނި ކާޖޮލް އެއް ނޫނެވެ. އޭނާގެ ދަރިފުޅު ނައިސާއަށް ވެސް މިހާރު މި މައްސަލަ ދަނީ ކުރިމަތިވަމުންނެވެ. އަދި ނައިސާ އަކީ ފެށުނީއްސުރެ ހަންގަނޑު ވަރަށް އަނދިރިކޮށް ހުރި ކުއްޖަކަށް ވެފައި ކުއްލިއަކަށް އޭނާ މިހާރު މާދޮންވެފައި ހުރީ ކީއްވެތޯ ވަރަށް ގިނަ މީހުން ސުވާލު އުފައްދަ އެވެ.
ފިލްމީ ރޮނގުން ބަލާއިރު ކާޖޮލް މިހާރު މަސައްކަތް ކުރަމުންދަނީ ޑިޒްނީ ޕްލަސް ހޮޓްސްޓާ އިން ދައްކަން ހަމަޖެހިފައިވާ "ދަ ގުޑް ވައިފް" ކިޔާ ސީރީޒް އެއްގަ އެވެ. މިއީ އޯޓީޓީ ޕްލެޓްފޯމަށް އޭނާ ތައާރަފްވާ ސީރީޒް ވެސް މެއެވެ. އޭނާ އެންމެ ފަހުން ކުޅެފައިވަނީ ރެވާތީ ޑައިރެކްޓްކޮށްފައިވާ "ސަލާމް ވެންކީ" އެވެ.