ފުލުހުން ކަރަންޓު ބަަޑި ބޭނުންކުރަން ފަށައިފި

ކުށްކުރާ މިންވަރު ކުޑަކުރުމަށް އެޅޭނެ އިތުރު ފިޔަވަޅުތަކެއްގެ ގޮތުން ފުލުހުން ޓޭޒާ ގަން ނުވަަތަ ކަރަންޓު ބަަޑި ބޭނުންކުރަން ފަށައިފި އެވެ.

ފުލުހުން މިއަދު ޓޭޒާ ގަން ބޭނުންކުރަން ފެށި ނަމަވެސް މިދިޔަ މަހުގެ 16 ވަނަ ދުވަހު ފުލުހުން ވަނީ ޓޭޒާ ގަން ބޭނުންކުރާނެ ގޮތްތަަކާއި ހާލަތްތައް ނޫސްވެރިންނަށް ދައްކާލާފަ އެވެ.

ފުލުހުން ބުނީ ޓޭޒަ ގަން ބޭނުންކުރާނީ ހަމައެކަނި ނުރައްކާތެރި އޮޕަރޭޝަންތަކުގައި ކުށްވެރިންނާ ދެކޮޅަށް ބާރުގެ ބޭނުން ކުރަންޖެހޭ ހާލަތްތަކުގައި އެކަނި ކަމަށެވެ. އެގޮތުން ޓޭޒާ ގަން ބޭނުންކުރާ ފުލުހުން ފަސް ދުވަހުގެ ތަމްރީނެއް ހަދަންޖެހެ އެވެ.

"މިއީ ޕޮލިހުންނާއި އާންމުން ދެފަރާތުގެ ރައްކާތެރިކަމަށް ވިސްނާފައި އެޅި ފިޔަވަޅެއް. ޓޭޒާ ގަން ބޭނުންކުރުން މާރައްކާތެރި މުގުރަކުން ގޮސް ޖެހުމަށް ވުރެ. ޕެޕާ ސްޕްރޭ ބޭނުން ކުރުމަށް ވުރެ ވެސް،" ޓޭޒާ ގަންއާ ގުޅޭގޮތުން ނޫސްވެރިންނަށް މީގެކުރިން މައުލޫމާތު ހިއްސާކުރައްވަމުން ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވި އެވެ.

ކޮމިޝަނާ އޮފް ޕޮލިސް މުހައްމަދު ހަމީދު މިއަދު ވިދާޅުވީ ޓޭޒާ ބަޑި ބޭނުންކުރާނީ އެކަމަށް ހާއްސަ ތަމްރީންތަކެއް ލިބިފައިވާ ސާޖެންޓު އަދި އެއަށް ވުރެ މަތީ ރޭންކުތަކުގެ ފުލުހުން އެކަނި ކަމަށެވެ.

ފުލުހުންގެ އިދާރާ އިން މިއަދު ކުރި ޓްވީޓްތަކެއް ބުނީ ފުލުހުންގެ ތެރޭގައި ގާއިމުކުރެވިފައިވާ ހައިވިޒިބިލިޓީ ޕޮލިސިން ޑިޕާޓްމަންޓް (އެޗްވީޕީޑީ) ފުލުހުން ހަރަކާތްތެރިވާއިރު ކޮންޑަކްޓަޑް އެނާޖީ ވެޕަން (ޓޭޒަ) މިއަދުން ފެށިގެން ގެންގުޅޭނެ ކަމަށެވެ. ހައިވިޒިބިޓީ ޕޮލިސިން ޑިޕާޓްމަންޓަކީ އިސްކަންދޭންޖެހޭ ކުށްތަކަށް އަމާޒުކޮށްގެން މަސައްކަތްކުރުމަށް އެކުލަވާލެވިފައިވާ، ހާއްސަ މަސްއޫލިއްޔަތުތަކެއް ހަވާލުކުރެވިފައިވާ ޑިޕާޓްމަންޓެކެވެ. އެޗްވީޕީޑީ އިން މިހާރު މަސަކަތްކުރާނީ މާލެ ސަރަހައްދުގެ ކުށުގެ މާހައުލުގައި އުޅޭ ގުރޫޕުތަކަށް އަމާޒުކޮށްގެން އާންމުންގެ ސަލާމަތާއި ރައްކާތެރިކަމަށްޓަކައި ކަމަށްވެސް ފުލުހުން ބުނެފައިވެ އެވެ.

ފުލުހުން ޓޭޒާ ގަން ބޭނުންކުރަން ފެށީ 25 ޓޭޒާ ގަން އާއި އެކު އެވެ. ގަން ބޭނުންކުރުމާ ގުޅޭ އުސޫލުތަކެއް ވެސް ކުރިން ހަމަޖައްސާފައިވެ އެވެެ.

ޓޭޒާ ގަން ބޭނުންކުރުމުގައި ގެންގުޅޭ އުސޫލުތައް

ޓޭޒާ ގަން ބޭނުންކުރުމުން އޭގެ އަސަރު ދެމިގެން ދާނީ ފަސްވަރަކަށް ސިކުންތަށެވެ. އަދި މި ބަޑިން ދޫކޮށްލާ ކަރަންޓު ވަޒަން ހަށިގަނޑަށް އަމާޒުވާ ހިސާބުން މީހާ ވަގުތުން ވެއްޓި ސިކުންތު ކޮޅަކަށް ޕެރެލައިޒްވެ އެވެ. ނަމަވެސް މީގެ ސަބަބުން ފުރާނައަށް ނުރައްކާތެރިވާ ވަރުގެ ޒަހަމްތަކެއް ނުލިބޭނެެ ކަމަށް ފުލުހުން ބުންޏެވެ.