މޯލްޑިވްސް ޕޮލިސް ސާވިސް

ތޫނު އެއްޗަކުން ހަމަލާދޭން އުޅުނު މީހާ ތަހުގީގު ނިމެންދެން ބަންދަށް

ތޫނު އެއްޗެއް ބޭނުންކޮށްގެން މީހަކަށް ހަމަލާދޭން އުޅުނުކަމުގެ ތުހުމަތުގައި ހައްޔަރުކުރި އދ. ދަނގެތި، ލިލީގެ، ހުސައިން ފާއިގް (33އ) ތަހުގީގު މަރުހަލާ ނިމެންދެން ބަންދުކުރަން ކޯޓުން އަމުރުކޮށްފި އެވެ.

އޭނާ ހައްޔަރުކުރީ ހުޅުމާލެ ފުރަތަމަ ފިޔަވަހީގައި ތޫނު އެއްޗެއް ބޭނުންކޮށްގެން މީހަކަށް ހަމަލާދޭން އުޅުނުކަމުގެ ތުހުމަތުގައި ހުކުރު ދުވަހުގެ އިރުއޮއްސި 6:30 ހާއިރު އެވެ.

ހުސައިން ފާއިގް ހުއްޓުވަން އުޅުނު ފުލުހަކަށްވެސް ތޫނު އެއްޗެއް ބޭނުންކޮށްގެން ހަމަލާ މަސައްކަތްކުރި ކަމަށް ފުލުހުން ބުނެފައިވެ އެވެ.

ފުލުހުން މިއަދު ބުނީ މި މައްސަލައިގައި އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ތަހުގީގު މަރުހަލާ ނިމެންދެން އޭނާ ބަންދުކުރުމަށް އަމުރުކޮށްފައިވާ ކަމަށެވެ.