ހުޅުމާލޭގައި މީހަކު ރަހީނުކޮށް އަނިޔާކުރި ހިޔާ ފްލެޓުގެ އެޕާޓްމަންޓުން މަސްތުވާތަކެއްޗާއި ގިނަ އަދަދެއްގެ ފައިސާއާއެކު އަނެއްކާވެސް ބަޔަކު ހައްޔަރުކޮށްފި އެވެ.
ފުލުހުން ބުނި ގޮތުގައި ހިޔާ ފްލެޓްގެ H9-20-11 އިއްޔެ ބަލައި ފާސްކުރީ ކްރިމިނަލް ކޯޓުގެ އަމުރެއްގެ ދަށުންނެވެ.
އެތަން ބަލައިފާސްކުރީ ޑްރަގް އެންފޯސްމަންޓަށް ލިބުނު މައުލޫމާތަކާ ގުޅިގެން ކަމަށް ފުލުހުން ބުންޏެވެ.
މި މައްސަލާގައި ފުލުހުން ހައްޔަރުކުރީ ގ. ސެމިޓޯން، އިބްރާހީމް ޝަރީފް، (40އ) އާއި ގއ. ކޮލަމާފުށި، އޯޝަންބްލޫ، އަބްދުﷲ ހަސަން، (41އ) އާއި ހދ. ނޭކުރެންދޫ، އިރުދޭމާގެ، ހުސައިން ރިޔާޒު، (33އ) އަދި ގއ. ދާންދޫ، ވަލުތެރޭގެ، އަބްދުﷲ ޖަމީލު، (32އ) އެވެ.
އެ އެޕާޓްމަންޓް ބަލައިފާސްކުރިއިރު މަސްތުވާތަކެއްޗާއި މަސްތުވާތަކެތި ބަންދުކުރުމަށް ބޭނުންކުރާ އާލާތްތަކާއި ގިނަ އަދަދެއްގެ ފައިސާގެ އިތުރުން ގިނަ އަދަދެއްގެ މޯބައިލް ފޯނު ފެނިފައިވާ ކަމަށް ފުލުހުން ބުނި ނަމަވެސް ތަފުސީލެއް ހާމައެއް ނުކުރެ އެވެ.
އެ އެޕާޓްމަންޓްގައި މީހަކު ރަހީނުކޮށް އިނގިލި ބުރި ކޮށްލަން އުޅެނިކޮށް މީގެ ކުރިން ވަނީ ސަލާމަތްކޮށްފަ އެވެ.