މާލޭގައި ހުންނަ ފުރުގާން މިސްކިތަށް ރޭ ފަތިހު ގެއްލުންތަކެއް ދީފި އެވެ.
މިސްކިތަށް ދީފައިވާ ގެއްލުންތައް ފެންނަ ވީޑިއޯތަކެއް ޝެއިހް އާދަމް ނިޝާން އަލީ އާދަމް ވަނީ އާންމުކޮށްފަ އެވެ.
ވީޑިއޯތަކުން ފެންނަ ގޮތުން މިސްކިތުގެ އިމާމް ހުންނަ ދިމާލުގެ ކަރަންޓް ބޯޑުތަކަށް ވަނީ ގެއްލުންދީފަ އެވެ. މީގެ އިތުރުން ވުޟޫކުރާ ބައިގެ ބައެއް އިސްކުރުތައް ބިންދާލައި ގެއްލުންދީފައިވެ އެވެ.
އެ ވީޑިއޯތައް ހިއްސާކޮށް ފޭސްބުކްގައި ކުރެއްވި ޕޯސްޓެއްގައި ޝެއިހް އާދަމް ނިޝާން އަލީ އާދަމް ވިދާޅުވީ މިސްކިތުގެ ފަހަތުގައި ހުރި މުސްހަފްތައް މުޅި ތަނަށް އުކާލައިފައިވާ ކަމަށެވެ.
ނިޝާން ތުހުމަތު ކުރެއްވި ގޮތުގައި މިކަންކުރީ އެ މިސްކިތުގައި އަބަދުހެން ނިދާފައި އޮންނަ ޒުވާނެކެވެ.
"މީގެ ކުރިން އެތައް ފަހަރަކުވެސް މީނާ ވަނީ މުސްހަފްތައް އުކާލުމާއި މިފަދަ އެތައް ކަމެއް މިމިސްކިތުގައި ކޮށްފަ،" ނިޝާން ވިދާޅުވި އެވެ.
މި މައްސަލަ ފުލުހުންނަށް ރިޕޯޓްކޮށްފައިވާ ކަމަށްވެސް ނިޝާން ވިދާޅުވި އެވެ.
ފުލުހުން ވަނީ ފުރުގާން މިސްކިތަށް ގެއްލުންދީފައިވާ މައްސަލައެއް ފަތިހު ރިޕޯޓްކޮށްފައިވާ ކަމަށް ބުނެފަ އެވެ.