މއ. މަސްފަން ގެއަށް ދިވެހި ފިރިހެނަކު ވައްދައި، ފޭރުނު މައްސަލައިގައި ދައުލަތުން ދައުވާ ކުރި ތިން މީހުންގެ މައްޗަށް ކުށް ސާބިތުވެ އެ މީހުން އެއް އަހަރާ ތިން މަސް ދުވަހަށް ޖަލަށްލުމަށް ކްރިމިނަލް ކޯޓުން މިދިޔަ ބުދަ ދުވަހު ހުކުމްކޮށްފި އެވެ.
ފޭރުމުގެ މި އަމަލު މިދިޔަ ޖުލައި 24 ވަނަ ދުވަހު ހިންގާފައިވަނީ މަސްފަން ގެއަށް ފިރިހެން މީހާ ވައްދައި، އެމީހާއަށް ވަޅިން ބިރުދައްކައި އޮރިޔާންކޮށް، އަނިޔާކޮށް، އޭނާގެ މޯބައިލް ފޯނު އަތުލައި އޭނާގެ ބެންކު އެކައުންޓުން ފައިސާ ޓްރާންސްފާ ކޫރުވައި އަދި އޭނާގެ ކޭޝްކާޑު ބޭނުންކޮށްގެން އޭޓީއެމް އިން ފައިސާ ނަގައިގެންނެވެ.
މިމައްސަލައިގައި ދައުލަތުން ދައުވާ ކުރީ މއ. މަސްފަން، އައިޝަތު (43އ) އާއި މއ. މަސްފަން، މުހައްމަދު ރީހާން (27އ) އަދި ސ. ހިތަދޫ / ސޯމާ، ޝަފީގު އިބްރާހީމް (35އ)ގެ މައްޗަށެވެ.
ދައުލަތުން މި ތިން މީހުންގެ މައްޗަށް މިދިޔަ ސެޕްޓެމްބަރު 23 ވަނަ ދުވަހު އުފުލީ އެނގި ހުރެ ހުއްދަ ނޫން ގޮތުގައި މައުލޫމާތު ހޯދުމުގެ ކުށުގެ ދައުވާ އާއި އަނިޔާއެއް ދިނުމުގެ ކުށުގެ ދައުވާގެ އިތުރުން ފޭރުމުގެ ދައުވާ އެވެ. ފޭރުމުގެ ކުށުގެ އަދަބަކީ ނުވަ މަހާއި 18 ދުވަހަށް ޖަލަށް ލުމެވެ. އަދި އަނިޔާއެއް ދިނުމުގެ ކުށުގެ އަދަބަކީ ދެ މަހާއި 12 ދުވަހަށް ޖަލަށް ލުމެވެ. މީގެއިތުރުން ހުއްދަ ނޫން ގޮތުގައި މައުލޫމާތު ހޯދުމުގެ ކުށުގެ އަދަބަކީ ހަތަރު މަހާއި 24 ދުވަހަށް ޖަލަށްލުމެވެ.
މާލެ ސަރަހައްދުގައި ފޭރުމުގެ އަމަލުތައް ވަރަށް ބޮޑަށް އިތުރުވެފައިވާއިރު މިފަދަ ކަންކަން ކުރާ މީހުން ތަފާތު އުކުޅުތައް ބޭނުންކުރާތީ ފުލުހުން ގެންދަނީ ސަމާލުވުމަށް ތަކުރާރުކޮށް އިލްތިމާސް ކުރަމުންނެވެ.