ޒުވާން އަންހެން ޑޮކްޓަރެއްގެ ހާޓް އެޓޭކް ތަޖުރިބާ

ޖުލައި 2021ގައި ޖެސިކާ ކޯހެންއަށް ވަރަށް ބޮޑަށް ވައިގެ އުނދަގޫ ވާން ފެށި އެވެ. ޖެސިކާއަށް ވައިގެ އުނދަގޫ ފުރަތަމަ ދިމާވާން ފެށީ ދެވަނަ ދަރިފުޅަށް ބަނޑުބޮޑުއިރު އެވެ. ވައި ލެވި މަތިން އަރާ ގޮތް ވެފައި އޭރު އަބަދު ހުންނާތީ އޭނާ ހީކުރީ ވިހޭމަ ރަނގަޅުވާނެ ކަމަށެވެ.

އެމެރިކާގައި ދިރިއުޅޭ އުމުރުން 37 އަހަރުގެ ޖެސިކާ އަކީ ކުޑަކުދިންގެ ޚާއްސަ ޑޮކްޓަރެކެވެ. އޭނާއަށް ދެވަނަ ދަރިފުޅު ލިބުނުފަހުން ވައިގެ އުނދަގޫ މާބޮޑުވި އެވެ. އޭނާ ހީކުރީ ހޮސްޕިޓަލުގައި ޑޮކްޓަރެއްގެ ވަޒީފާ އަދާކުރަމުން ދެ ދަރިން ބެލުމުގައި މާބިޒީކޮށް އުޅޭތީ ވެގެން އުޅޭ ގޮތެއް ކަމަށެވެ.

ވައިގެ އުނދަގޫ ވާތީ އުޅެނިކޮށް އޭނާގެ މެޔަށް ތަދުއަރައި އެ ތަދު ކަރާ ހަމައަށް މައްޗަށް އަރަން ފެށި އެވެ. މިގޮތަށް ގިނައިން ދިމާވަނީ ރޭގަނޑު އެވެ. ހަ މަހުގެ ކުއްޖަކާއި ތިން އަހަރުގެ ކުއްޖެއް ގޮވައިގެން އުޅެން ޖެހުމުން މާބޮޑަށް ހަށިގަނޑު ސްޓްރެސް ވަނީ ކަމަށް ޖެސިކާ ނިންމި އެވެ.

"އަހަރެންނަށް ރޭގަނޑު ހަމަ ނިދި ނުލިބޭ. އަދި ގަޑިންގަޑިއަށް ނުކެވޭތީ އަބަދުވެސް ހުންނަނީ ވަރަށް ވަރުބަލިވެފައި. އެހެންވެ ވައިގެ އުނދަގޫ ނުކެނޑިގެން އުޅެނީކަމަށް ހީކުރީ،" ޖެސިކާ ބުންޏެވެ.

ޖެސިކާ އަށް ދިމާވެގެން އުޅެނީ އެސިޑް ރިފްލަކްސް ކަމަށް އޭނާ ޔަގީން ކުރިނަމަވެސް ހަގީގަތުގައި އޭނާގެ ހަށިގަނޑުން ދެމުން ދިޔައީ ހާޓް އެޓޭކެއްގެ އިންޒާރެވެ. ނަމަވެސް އެކަން ނޭނގޭ ހާލު އެކި ކަހަލަ އެންޓޭސިޑްސް (ވަޔަށް ކާ ބޭސް) ބޭނުންކޮށްގެން ބިޒީ ދިރިއުޅުމެއް ޖެސިކާ އުޅެމުން ދިޔަ އެވެ. އެހެން އުޅެނިކޮށް އެއް ދުވަހު މާބޮޑަށް މެޔަށް ތަދު އަރައިގެން އެމްބިއުލެންސް އަށް ގުޅައިގެން ހޮސްޕިޓަލަށް ޖެސިކާ ދިޔަ އެވެ.

"ހޮސްޕިޓަލަށް ދިޔައިރުވެސް ހިތަކަށް ނާރާ ހާޓް އެޓޭކެއް ކަމަކަށް. އެއީ އަހަރެންގެ އުމުރަކީ އަންހެނުންނަށް އާއްމުކޮށް ހާޓް އެޓޭކް ޖެހޭ އުމުރަށް ނުވާތީއާ ވެސް އެކު. އަދި ކުރިން އެފަދަ ކަމެއް ދިމާވެފައި ނެތީމަ،" ޖެސިކާ ބުންޏެވެ.

ހޮސްޕިޓަލަށް ގޮސް ވެސް އޭނާއަށް ވެގެން އުޅޭ ގޮތެއް ދެނެގަންނަން 90 ވަރަކަށް މިނިޓް ނެގި ކަމަށް ޖެސިކާ ބުންޏެވެ.

"ފުރަތަމައިނުން އިމަޖެންސީ ރޫމްގައި ތިބި ޑޮކްޓަރުން ވެސް ހީކުރީ އަހަރެން ހިތް ބިރުގަނެގެން އުޅެނީކަމަށް. އެކަމަކު އަސްލު އަހަރެން އުޅުނީ ބިރަކުން ނޫން. ވަރަށް ގަދަޔަށް މޭގައި ރިހޭތީ އުޅުނީ. އަހަރެންގެ ފިރިމީހާ ވަރަށް ވަކާލާތުކޮށް އެމީހުންނާ ވަރަށް ވާހަކަ ދައްކައިގެން އަހަރެންގެ ބައްޔާ މެދު އެމީހުން ސީރިއަސްކޮށް ބަލަން ފެށީ،" ޖެސިކާ ބުންޏެވެ.

އެންމެފަހުން ޑޮކްޓަރުން ވަނީ ޖެސިކާގެ ޓްރޮޕޮނިން ޓެސްޓް ކޮށްފަ އެވެ. ޓްރޮޕޮނިން އަކީ ޕްރޮޓީންގެ ވައްތަރެކެވެ. ހިތަށް ގެއްލުމެއް ވެފައިވާނަމަ ލޭގައި މިޕްރޮޓީން ހުރެ އެވެ. މި ޓެސްޓް ޕޮޒިޓިވްކޮށް އައުމުން ޚުދު އޭނާއަށް ވެސް ބޮޑު ޝޮކެއް ލިބުނުކަމަށް ޖެސިކާ ބުންޏެވެ.

"އަހަރެންނަށް ލިބުނު ޝޮކުން ފުންމައިގެން ތެދުވެވުނު. އެއާއެކު އަނެއްކާ މެޔަށް ތަދުއެރި. ދެން ހެދި އީކޭޖީ ޓެސްޓުން ކޮރޮނަރީ އާޓަރީ އެއްކޮށް ބްލޮކްވެފައިވާކަން އެނގުނު. އޭގެ މާނައަކީ ހިތުގެ ޓިޝޫތަކަށް ދާއިމީ ގެއްލުމެއް ނުލިބެނީސް ސަލާމަތްކުރަން ޑޮކްޓަރުން ވަރަށް އަވަހަށް މަސައްކަތް ކުރަން ޖެހޭނޭ،" ޖެސިކާ އޮޅުން ފިލުވައިދިނެވެ.

ޑޮކްޓަރުން ވަރަށް އަވަހަށް ސްޓަންޓެއް ލައްވައިގެން ޖެސިކާގެ ހިތަށް ލޭ ދައުރުވާގޮތް ހެދި އެވެ. ޖެސިކާ ބުނި ގޮތުގައި އެ ކުޑަ ވަގުތުކޮޅު ތެރޭގައި ވެސް އޭނާގެ ހިތުގެ މަސްތަކަށް ފުދޭ ވަރެއްގެ ގެއްލުން ހުރީ ވެފަ އެވެ. އަދި ހިތުގެ ހިނގުމަށް މީގެ ނޭދެވޭ އަސަރުކުރާނެ ކަމަށް ބެލެވެ އެވެ.

ފަހުން ހެދި ޓެސްޓްތަކުން ޖެސިކާގެ ހިތުގެ ގިނަ މައްސަލަތަކެއް ހުރިކަން ފާހަގަ ކުރެވުނެވެ. އޭގެތެރޭގައި ލޭ ހޮޅިއެއް ހިމަވުމާއި، މައިކްރޮވެސްކިއުލާ ޑިޒީޒް ފަދަ ގިނަ މައްސަލަތައް ހިމެނެ އެވެ.

"ހިތުގެ މައްސަލަ ހުރިކަން އެނގުމުން އަހަރެންގެ ދިރިއުޅުމަށް ބޮޑު ބަދަލެއް ގެންނަން ޖެހުނު. ސާދަ މަހުގެ މެޑިކަލް ލީވް ނަގައިގެން ގޭގައި ކުދިންނާއެކު ވަގުތު ހޭދަކުރަން ފެށިން. އަދި ކުރިން އުޅުނު ހަލަބޮލި ދިރިއުޅުމުގެ ބަދަލުގައި މަޑުމައިތިރި ދިރިއުޅުމެއް ހިޔާރުކުރަން ޖެހުނު،" ޖެސިކާ ބުންޏެވެ.