ރާއްޖެއިން ބޭރުގެ ކުންފުނިތަކަކަށް އޮޅުވާލައިގެން ރާއްޖެއަށް މުދާ އެތެރެކޮށް މަކަރާއި ހީލަތުން މަންފާ ހޯދަމުން ދަނިކޮށް ހައްޔަރު ކޮށްފައިވަނީ ހުސައިން ޝިފާއު ކަމަށް ފުލުހުން ބުނެފި އެވެ.
ފުލުހުން ކޯޓުގައި ބުނެފައިވަނީ ހުސައިން ޝިފާއު އަކީ މީގެ ކުރިންވެސް މަކަރާއި ހީލަތުގެ މައްސަލަތަކުގައި ހިމެނިފައިވާ މީހެއް ކަމަށާއި މިފަހަރު އޮޅުވާލައިގެން ތިން މިލިއަނަށްވުރެ ގިނަ ރުފިޔާގެ މޭވާ އާއި ތަރުކާރީ އެތެރެކޮށްފައިވާ ކަމަށެވެ.
ހުސައިން ޝިފާއު އަކީ ޑޮލަރު ހޯދައިދޭނެ ކަމަށް ބުނެ މީހުން އަތުން ފައިސާ ނެގުމަށްފަހު ފިލައިގެން އުޅޭތީ 2021 ވަނަ އަހަރު ހޯދަން އިއުލާން ކޮށްފައިވާ މީހެކެވެ.
ފުލުހުން ބުނީ ބޭރުން މުދާ ގަތުމަށް ޝިފާއު ފޮނުވާފައިވަނީ ސައްހަ ނޫން ޓީޓީ ތަކެއްކަން ބޭންކުން ކަށަވަރުކޮށްދީފައިވާ ކަމަށެވެ. އަދި އެކި ފަހަރުމަތިން އޭނާ ސައްހަ ނޫން ޓީޓީ ބޭނުން ކޮށްގެން ވިޔަފާރިކޮށްފައިވާކަމަށްވެސް ފުލުހުން ވަނީ ބުނެފަ އެވެ.
ކޯޓު އަމުރެއްގެ ދަށުން ޝިފާއު ހައްޔަރުކޮށްފައި ވަނީ މިދިޔަ މަހުގެ 28 ވަނަ ދުވަހު އެވެ.
ޝިފާއު ފޮނުވާފައިވާ ބައެއް ޓީޓީތަކުގައި ބޭނުންކޮށްފައި ވަނީ އޭނާ ނިސްބަތްވާ ވިޔަފާރިއެއްގެ ނަން ކަމަށާއި އެ ލިޔެކިޔުންތަކުގައި ޝިފާއުގެ ނަމާއި ފޯނު ނަންބަރުވެސް ހުރި ކަމަށް ފުލުހުން ބުންޏެވެ.
ފުލުހުން ބުނީ ޝިފާއު އާއި ބެހޭ މިފަދަ އެހެން މައްސަލަތަކެއް ތަހުގީގު ކުރަމުންދާ ކަމަށާއި މިހާރު ފެންމަތި ވެގެން މިއުޅޭ މައްސަލައިގައި ޝިފާއުގެ އިތުރުން އެހެން ބަޔަކު ބައިވެރިވާ ކަމުގެ ތުހުމަތު ކުރެވޭ ކަމަށެވެ.