އަސްލު "ސްލީޕިން ބިއުޓީ" ބަލި ތަހައްމަލުކުރަމުންދާ މީހެއް

ޖޯނާ ކޮކްސް އަކީ 38 އަހަރުގެ އަންހެނެކެވެ. އޭނާއަށް ޖެހިފައިވަނީ ވަރަށް މަދުން ނޫނީ ދުނިޔޭން ނުފެންނަ ބައްޔެކެވެ. މި ބަލީގެ ސަބަބުން އޭނާއަށް ދުވާލުގެ ވަގުތުގައި ވެސް ހޭލާ ހުންނަން ޖެހެނީ ވަރަށް ހާލަކުންނެވެ. ރޭގަނޑު ހަތަރުދަމު ނިދިޔަސް ދުވާލު ހަތަރު ދަމުވެސް އޭނާއަށް އުޅެން ޖެހެނީ ނިދޭވަރުން ހަދާނެގޮތް ހުސްވެގެންނެވެ.

އެންމެ ކުރިން އެކަކަށް ވެސް އޭނާއަށް މިވާ ގޮތެއް ނޭނގެ އެވެ. އެންމެން ވެސް ހީކުރަނީ އޭނާ ކަންނެތްކަމުން މާގިނައިން ނިދަނީ ކަމަށެވެ. އެހެންވެ 2019ގައި ޖޯނާ އަދާކުރަމުންދިޔަ ވަޒީފާއިން ވެސް ވަކިވާން މަޖުބޫރުވި އެވެ.

ހަގީގަތުގައި ޖޯނާއަށް ކުރިމަތިވެފައިވަނީ އިޑިއޯޕެތިކް ހައިޕަސޯމްނިއާ ނުވަތަ "ރިއަލް-ލައިފް ސްލީޕިން ބިއުޓީ" ކިޔާ ސިއްހީ މައްސަލައެކެވެ. މި ޑިސްއޯޑާގެ ސަބަބުން ރެއަކާ ދުވާލު އޮންނަ 24 ގަޑިއިރުގެ ތެރެއިން 22 ގަޑިއިރު ނިދާފައި އޮތުމަކީ އޭނާއަށް އެއްވެސް ކަމެއް ނޫނެވެ. އަދި ޚުދު އޭނާގެ ހަށިގަނޑު އެދި ގޮވަނީ ވެސް އޭނާ މިވަރަށް ނިދުމަށެވެ. ކިތަންމެ ވަރަކަށް ނިދިޔަސް އޭނާގެ ހަށިގަނޑުން ނިދީގެ އަސަރެއް ނުފިލައެވެ. އަދި ހަށިގަނޑަށް އަރާމެއް ވެސް ނުލިބެއެވެ.

ކުޑަ ދެ ދަރިންގެ މަންމަ ޖޯނާ ކިޔައިދިން ގޮތުގައި އޭނާއަށް ގިނައިން ނިދުމުގެ މައްސަލަ ދިމާވާތާ ގިނަ އަހަރު ތަކެއް ވެއްޖެ އެވެ. ނަމަވެސް 2017 އިން ފެށިގެން މި މައްސަލަ އިތުރަށް ގޯސްވި އެވެ. ކްލަބްގައި އިންދާވެސް ނިދެން ފެށިއެވެ. އަދި ކާރުގައި އިންދާވެސް ނިދެން ފެށީ އެވެ.

"މިކަން ފެށިގެން ބޮޑުވަރުވީ މަޑުމަޑުން. އެންމެ ފުރަތަމަ ވަރަށް ބޮޑަށް ވަރުބަލިވާން ފެށީ. އަހަރެން ހީކުރީ ޑިޕްރެޝަންގެ މައްސަލަތަކެއް ކަމަށް. އެހެންވެ ނަފްސާނީ މާހިރެއްގެ އެހީ ހޯދިން. ނަމަވެސް އެ ޑޮކްޓަރު ބުނި އަހަރެންގެ ނަފްސާނީ އެއްވެސް މައްސަލައެއް ނެތޭ،" މިރާ ނޫހަށް ދީފައިވާ އިންޓަވިއު އެއްގައި ޖޯނާ ބުނެފައި ވެއެވެ.

ޖޯނާގެ ބަލި ބޮޑުވަމުންގޮސް 2019ގައި ވަޒީފާ ދޫކޮށްލަން މަޖުބޫރުވިއެވެ. އަދި އެކި ފަހަރު އެކި ހޮސްޕިޓަލްތަކަށް ގޮސް އެކި ޑޮކްޓަރުންނަށް ދައްކަމުން ގޮސް އޭނާގެ ހަގީގީ ބަލި ދެނެގަނެވުނީ 2021ގެ އޮކްޓޫބަރުގަ އެވެ. އޭރު އޭނާއަށް ހުރީ ވަރަށް ބޮޑުވަރު ވެފަ އެވެ.

"އޭރު އެއްގޮތަކަށް ވެސް ހޭލާހިތެއް ނުވޭ. ގަދަކަމުން ހޭލަން މަސައްކަތް ކުރިޔަސް ލޯ ހުޅުވާލާއިރަށް ހީވަނީ ބިރުވެރި އެއްޗެހި ތަކެއް ފެންނަހެން. ބައެއް ފަހަރަށް ހީވޭ އެތައް ސަތޭކަ ފައިދިގުމަކުނެއް އެނދުމަތީގައި ދުވާހެންވެސް،" ޖޯނާ ކިޔައިދިނެވެ.

މި ބަލީގެ ސަބަބުން މުޅި ދިރިއުޅުން ހަލާކުވެގެން ދިޔަކަމަށް ޖޯނާ ބުންޏެވެ. ސަބަބަކީ އޭނާއަށް އަބަދު ނިދިފައި އޮންނާތީ އެހެން އެއްވެސް މީހަކަށް އަދި ކަމަކަށް ސަމާލުކަމެއް ނުދެވޭތީ އެވެ. ހަގީގަތުގައި ވެސް އޭނާ "ސްލީޕިން ބިއުޓީ" އަކަށް ވީއެވެ.

"އަހަރެންނަށް ކާރެއް ނުދުއްވޭ. އެއްވެސް ތަނަކަށް ދާން ޕްލޭނެއް ނުހެދޭ. އަހަރެން ހަނދާނެއް ނުހުރޭ ކޮން ދުވަހެއް ކަމެއް މިއީ. އެހެންވެ އަހަރެން އުޅެން ޖެހުނީ ވަރަށް އެކަނިވެރި ދިރިއުޅުމެއް. އަހަރެންނަށް އެހެން މީހުންގެ އެހީތެރިކަން ވަރަށް ބޭނުންވި،" ޖޯނާ ބުންޏެވެ.

އެންމެ ފަހުން ޑޮކްޓަރުން ޖޯނާ ހޮސްޕިޓަލުގައި ބާއްވައިގެން ރޭގަނޑު ހަތަރު ދަމު އޭނާގެ ގަޔަށް އެކި ކަހަލަ އެއްޗެތި ގުޅައިގެން މޮނިޓާކޮށްފައި ވެއެވެ. އަދި އޭނާގެ އަސްލު ބަލި އެނގުނީ އޭގެ ފަހުންނެވެ.

އޭނާ ވަރަށް މަސައްކަތްކޮށްގެން އެއް ދުވަހަކު ހަ ގަޑިއިރު ވަންދެން ނުނިދާ ހުރެފި އެވެ. މިއީ ފާއިތުވީ ހަ އަހަރު ދުވަހުގެ ތެރޭގައި އޭނާއަށް އެންމެ ގިނައިން ހޭލާ ހުރެވުނު ދުވަހެވެ. އެންމެ މަދުން ހޭލާ ހުރެވޭ ދުވަސްތަކުގައި އޭނާ ހޭލާ ހުންނާނީ މަދު މިނިޓް ކޮޅަކުއެވެ. އެ ވަގުތުކޮޅަކީ އޭނާ ހޭލައިގެން ގޮސް ކޮންމެވެސް އެއްޗެއް ބޯލައިގެން އައިސް އޮށޯންނަން ނަގާ ވަގުތެވެ.