ހުޅުމާލޭގެ ދެވަނަ ފިޔަވަހީގައި ހަދާފައިވާ ހިޔާ ފްލެޓްތަކުގެ ކުލި ކުޑަކޮށްދެއްވާނެ ކަމުގެ އިޝާރާތެއް ރައީސް އިބްރާހީމް މުހައްމަދު ސޯލިހް ދެއްވައިފި އެވެ.
ރައީސް މިފަދަ އިޝާރާތެއް ދެއްވާފައި މިވަނީ ހުޅުމާލޭގައި ދެވަނަ ފިޔަވަހީގައި ހަރަކާތްތެރިވާ "ހިޔާ ރައްޔިތުންގެ ގުޅުން" ހަރަކާތުގެ މެންބަރުންނާ މިއަދު ރައީސް އޮފީހުގައި ބައްދަލުކުރެއްވުމަށްފަހު އެެވެ.
މިބައްދަލުވުމުގައި ބައިވެރިވި ބޭފުޅެއް ކަމަށްވާ އިސްމާއީލް ރިފާއު އަވަސްއަށް މައުލޫމާތު ދެއްވަމުން ވިދާޅުވީ މިއަދުގެ ބައްދަލުވުމުގައި ހިޔާ ފްލެޓްގެ ކުޑަކުރުމާ ގުޅޭގޮތުން ރައީސް އުއްމީދީ ޖަވާބެއް ދެއްވި ކަމަށެވެ.
"ރައީސް ވިދާޅުވީ އިކޮނޮމިކް ކައުންސިލާއި ކަމާ ގުޅޭ އެހެން އިދާރާތަކާ މަޝްވަރާކުރެއްވުމަށްފަހު ގޮތްތަކެއް ނިންމުމުގެ ކުރިން އަދިވެސް އެއްފަހަރު ބައްދަލުކުރާނެ ކަމަށް،" ރިފާއު ވިދާޅުވި އެވެ.
ކުލި ކުޑަކުރަން ރައީސް ތިން ގޮތެއް ދެއްކެވި ކަމަށްވެސް ރިފާއު ވިދާޅުވި އެވެ. އެއް ގޮތަކީ ކުލި ދައްކަންޖެހިފައި އޮތް މުއްދަތަށް ބަލައި ކުލި ކުޑަކޮށް ލޯނު ދައްކަންޖެހޭ މުއްދަތު އިތުރުކުރުމެވެ. ދެވަނަ ގޮތަކީ ކުލި ދެއްކުމަށް ދަތިވާ މީހުން ބަލައި އެ މީހުންނަށް ދައުލަތުން ސަބްސިޑީއެއް ދިނުމެވެ. އަދި ތިންވަނަ ގޮތަކީ ހިޔާ ފްލެޓްގެ އެންމެންގެ ކުލި އެއް އަދަދަކަށް ކުޑަކޮށްދިނުމެވެ.
"ރައީސް ވިދާޅުވި ދެމަހެއްހާ ދުވަސްތެރޭ އުފާވެރި ޖަވާބެއް ދޭނެ ކަމަށް،" ރިފާއު ވިދާޅުވި އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި "ހިޔާ"ގެ ނަމުގައި ކުރިއަށް ގެންދިޔަ މަޝްރޫއެއްގެ ތެރެއިން 7،000 ފްލެޓްގެ ބޮޑު ބައި ނިންމި އެވެ. ރައީސް ޔާމީންގެ ވެރިކަމުގައި ނިންމާފައި އޮތީ ހިޔާ ފްލެޓަކަށް މަހު ކުލީގެ ގޮތުގައި 5،500 ރުފިޔާ ދައްކާ ގޮތަށެވެ.
މިސަރުކާރު ވެރިކަމާ ހަވާލުވެ އެ އަދަދު ވަނީ 8،500 ރުފިޔާއަށް އިތުރުކޮށްފަ އެވެ. އެއީ މަހު ކުއްޔަށް 7،500 ރުފިޔާއާއި މެއިންޓަނަސް ފީގެ ގޮތުގައި 1،000 ރުފިޔާ އެވެ. މިސަރުކާރުން ބުނާ ގޮތުގައި ހިޔާ ފްލެޓް އަޅަން ނަގާފައިވާ ލޯނަށް ދައްކަންޖެހޭ އަދަދު ބޮޑުވުމާ ގުޅިގެން 7،500 ރުފިޔާ އަކީ ކުލި ކުޑަކޮށްދެވޭނެ އެންމެ ކުޑަ އަގެވެ.