މިމަހުގެ 27 ވަނަ ދުވަހު ބާއްވާ މިއަހަރުގެ ފިލްމްފެއާ އެވޯޑްސް ހަފުލާ ހޯސްޓްކުރާނީ އެކްޓަރު ސަލްމާން ޚާން އެވެ.
އިއްޔެ ބޭއްވި ޕްރެސް ކޮންފަރެންސެއްގައި ސަލްމާން ވަނީ މިކަން އިއުލާން ކޮށްފަ އެވެ. އަދި ފިލްމުފެއާ އެވޯޑާ ގުޅޭ ވަރަށް މަޖާ ވާހަކައެއް ވެސް އޭނާ ކިޔައިދިނެވެ.
ސަލްމާން ބުނި ގޮތުގައި އެއްފަހަރަކު އޭނާއަށް ފިލްމްފެއާ އެވޯޑުގައި ޕާފޯމްކުރަން ދައުވަތު ލިބުނެވެ. އަދި އެ ހަފުލާގައި އޭނާއަށް އެންމެ މޮޅު އެކްޓަރުގެ އެވޯޑު ލިބޭނެ ކަމަށް ހީވާ ގޮތަކަށް ޝޯ އިންތިޒާމްކުރި ފަރާތުން ކަންތައް ކުރި އެވެ. އެހެންވެ އޭނާ އެ އެވޯޑު ހަފުލާއަށް ދިޔައީ ބައްޕަ ސަލީމް ޚާން އާއި އާއިލާގެ ގިނަ އަދަދެއްގެ މެންބަރުން ގޮވައިގެންނެވެ.
ނަމަވެސް އެ ފަހަރު ބެސްޓް އެކްޓަރުގެ ފިލްމުފެއާ އެވޯޑު ދިނީ ޖެކީ ޝްރޮފް އަށެވެ. އެކަމާ އައި ރުޅިން އެ ހަފުލާގައި ޕާފޯމްކުރަން ސަލްމާން ދެކޮޅު ހެދި އެވެ. އެންމެ ފަހުން އޭނާ އެއްބަސްވީ އެވޯޑު ލިބޭ މީހުންނަށް ލިބޭ ވަރަށް ފައިސާ ދޭން މި އެވޯޑު ހަފުލާ އިންތިޒާމްކުރި ފަރާތުން އެއްބަސްވީމަ ކަމަށް ސަލްމާން ބުންޏެވެ.
"ބެސްޓް އެކްޓަރު ކެޓަގަރީން އަހަރެންވެސް އެ ފަހަރު އޮތީ ނޮމިނޭޓް ވެފައި. އެހެންވެ ނޮމިނޭޝަންސް ދައްކައި އެވޯޑު ލިބުނު ފަރާތް އިއުލާން ކުރަން ތައްޔާރުވުމުން އަހަރެން އަވަހަށް އެވޯޑު ބަލާ ދާން ތެދުވިން. އެކަމަކު ބެސްޓް އެކްޓަރުގެ އެވޯޑު ލިބުނީ ޖެކީ އަށް. އަހަރެންގެ ބައްޕަ ވެސް އިނީ ކޯޓު ފަޓުލޫނު ލައި ވަރަށް ތައްޔާރުވެގެން އައިސް. އެހެންވެ ޖެކީގެ ނަން އިއުލާން ކުރުމާއެކު ބައްޕަ ވެސް ރުޅިއައިސްގެން އެހި މިދެން ކޮން ކަމެއްހޭ؟" ސަލްމާން ކިޔައިދިނެވެ.
ސަލްމާން ބުނި ގޮތުގައި އޭނާ ވަގުތުން ސްޓޭޖުގެ ފުރަގަހަށް ގޮސް ޝޯގައި ޕާފޯމް ނުކުރާނެކަމަށް ޝޯ އިންތިޒާމު ކުރާ ފަރާތަށް އެންގި އެވެ. އެއީ އޮޅުވާލައިގެން އޭނާ ޝޯއަށް ގެނައިމަ އެވެ.
"އަހަރެން ބުނިން އޮޅުވާލީތީ ވެސް ޕާފޯމް ނުކުރާނަމޭ. ދެން އެމީހުން ބުނި ޝޯގައި ޕާފޯމްކުރާ މަތިން ފައިސާ ދޭނަމޭ. އަހަރެން ބުނިން ކިހާ ވަރެއްހާ ދޭނީ. ދެން އެމީހުން އަގެއް ބުނީމަ އަހަރެން ބުނިން ތިވަރަކުން ޕާފޯމެއް ނުކުރާނަމޭ. ދެން އަގު އަރުވަމުން ގޮސް ފުރަތަމަ ކީ އަގުގެ ފަސް ގުނަ އަގު ބޮޑުކުރީމަ ދެން އެއްބަސްވެ ޕާފޯމްކުރީ. އެ މީހުން ބުނި މި ވާހަކަ ނުދައްކައްޗޭ އެއްވެސް މީހެއް ކައިރީ. އަހަރެން ބުނިން ގޯސް މީހެއް ކައިރީގައޭ ތިހެން ތިބުނެވުނީ،" ވަރަށް ބާރަށް ހީނގަނެފައި ސަލްމާން ބުންޏެވެ.
އެއީ 1990 ވަނަ އަހަރު ބޭއްވި ފިލްމްފެއާ އެވޯޑެވެ. ޖެކީ އެ ފަހަރު ބެސްޓް އެކްޓަރުގެ އެވޯޑު ގެންދިޔައީ "ޕަރިންދާ"ގައި އޭނާ ކުޅެފައިވާ ރޯލުންނެވެ.