ދުވާލަކު 120 މެޓްރިކް ޓަނުގެ މަސް ކިރުވޭ ބޯޓެއް މިފްކޯއިން މިއަދު ރާއްޖެ ގެނެސްފި އެވެ.
މިފްކޯއިން މިއަދު ރާއްޖެ ގެނައި "ޖަޒީރާ 103" އަކީ ފަސޭހަކަމާއެކު މަސްކިރުވުމުގެ ވަސީލަތްތައް ގާއިމުކޮށްފައިވާ ބޯޓެކެވެ.
މިފްކޯގެ ސީއީއޯ އިސްމާއީލް ފައުޒީ ވިދާޅުވި ގޮތުގައި މަސްބާނާ ސަރަހައްދުތަކަށް ދަތުރުކޮށް މަސްކިރުވުމަށް މި ބޯޓުގެ ސަބަބުން ލުއިފަސޭހަތަކެއް ލިބިގެންދާނެ އެވެ.
"ޖަޒީރާ 103 އަކީ ފަސޭހަ ކަމާއެކު މަސްކިރުމުގެ ވަސީލަތްތައް ގާއިމުކޮށްފައިވާ ބޯޓަކަށް ވުމުން، މަސްވެރިކަމުގެ މޫސުމުގައި އެންމެ ރަނގަޅަށް މަސްބާނާ ސަރަހައްދަކަށް ދަތުރުކޮށް މަސްވެރިން ބާނާ މަސް ކިރުމަށް އިތުރު ލުއިފަސޭހަތަކެއް ލިބިގެންދާނެ،" މިފްކޯގެ ސީއީއޯ އިސްމާއީލް ފައުޒީ ވިދާޅުވި އެވެ.
އިސްމާއިލް ވިދާޅުވި ގޮތުގައި މިފްކޯގެ ފްރީޒިން ކެޕޭސިޓީއަށް ދިމާވެފައިވާ ގޮންޖެހުންތަކަށްވެސް މި ބޯޓުގެ ސަބަބުން ވަރަށް ބޮޑު ލުޔެއް ލިބޭނެ އެވެ.
މި ބޯޓުގެ ދެފަރާތުން އެއްފަހަރާ މަސްކިރޭގޮތަށް ދެ ކްރޭން ހަރުކޮށް ދުވާލަކު 120 މެޓްރިކް ޓަނު މަސްގަނެ ފިނިކުރުމުގެ ގާބިލުކަން ލިބިފައިވެ އެވެ. މި ބޯޓަކީ ޖުމްލަ 420 މެޓްރިކް ޓަނުގެ މަސް ސްޓޯކުރެވޭ ގޮތަށް ފަރުމާ ކޮށްފައިވާ ބޯޓެކެވެ.
ކޮރެއާއިން ފުރައިގެން މި ބޯޓު ރާއްޖެ އައިސްފައިވަނީ 16 ދުވަހުންނެވެ.