ރާއްޖެއިން މަސް ބޭރުކުރި މިންވަރު 2022 ވަނަ އަހަރާއި އަޅާބަލާއިރު 2023 ވަނަ އަހަރު އިތުރުވީ އާ މާކެޓްތަކަށް އެކްސްޕޯޓް ކުރުމުން ކަމަށް މިފްކޯ އިން ހާމަކޮށްފި އެވެ.
މިފްކޯގެ 2023 ވަނަ އަހަރުގެ އަހަރީ ރިޕޯޓް ދައްކާ ގޮތުން 2022 ވަނަ އަހަރާއި އަޅާބަލާއިރު މިދިޔަ 2023 ވަނަ އަހަރު އެ ކުންފުނީގެ ވިޔަފާރި ވަނީ ރަނގަޅުވެފަ އެވެ.
އެ ގޮތުން މަސް އެކްސްޕޯޓްކުރި އާ މާކެޓްތަކުގެ ތެރޭގައި ވިއެޓްނާމް އާއި މޮރިޝަސް ހިމެނޭ ކަމަށް މިފްކޯ އިން ބުނެ އެވެ.
އެ ކުންފުނިން މިދިޔަ އަހަރު ގަނޑުކުރި މަހުގެ ގޮތުގައި 62،352 މެޓްރިކް ޓަނުގެ މަސް އެކްސްޕޯޓްކޮށްފައިވެ އެވެ. މިއީ 1.7 ބިލިއަން ރުފިޔާގެ މަހެވެ.
ގަނޑުކުރި މަހުގެ ގޮތުގައި މިފްކޯ އިން 2022 ވަނަ އަހަރު އެކްސްޕޯޓްކުރީ 55،989 މެޓްރިކް ޓަނުގެ މަހެވެ. އެއީ 1.4 ބިލިއަން ރުފިޔާ އެވެ.
މީގެ އިތުރުން ދަޅުގައި އަދި ޕައުޗްގައި 2023 ވަނަ އަހަރު 227،910 ކޭސް ބޭރުކޮށްފައިވާއިރު 2022 ވަނަ އަހަރު ދަޅުގައި އަދި ޕައުޗްގައި ބޭރުކުރީ 174،295 ކޭހެވެ.