ރާއްޖެއާއި މޮރިޝަސްއާ ދެމެދު ހިޔާލު ތަފާތުވެފައިވާ ކަނޑުގެ ސަރަހައްދުގެ އިން ވަކިކޮށް އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް) އިން އިއްޔެ ނިންމުމަކީ ހިތާމަކުރަންޖެހޭ ނިންމުމެއް ކަމަށް ކުރީގެ ބަންޑާރަނައިބް ޑރ. މުހައްމަދު މުނައްވަރު ވިދާޅުވެއްޖެ އެވެ.
އިޓްލޮސް އިން އިއްޔެ ނިންމީ ޗާގޮސް އަކީ މޮރިޝަސްގެ ބައެއްގެ ގޮތުގައި ހަމަޖައްސައި، ރާއްޖެއާއި މޮރިޝަސްއާ ދެމެދު ހިޔާލު ތަފާތުވެފައިވާ ކަނޑުގެ ސަރަހައްދުގެ ބޮޑު ސަރަހައްދެއް ރާއްޖެއަށް ލިބޭ ގޮތަށެވެ. އެގޮތުން ދެ ގައުމުގެ ފުށުއަރާ ސަރަހައްދުން ރާއްޖެއަށް ވަނީ ގާތްގަނޑަކަށް 4،600 އަކަ ކިލޯމީޓަރުގެ އިތުރު ސަރަހައްދެއް ކަށަވަރުވެފަ އެވެ. އިޓްލޮސް އިން މައްސަލަ ނިންމާފައިވާ ގޮތުން ރާއްޖޭގެ ދެކުނުން 47،232 އަކަކިލޯމީޓަރުގެ ސަރަހައްދެއް ރާއްޖެއަށް ކަށަވަރުވާނެ އެވެ. މޮރިޝަސް އަށް ލިބޭނީ 45،331 އަކަކިލޯމީޓަރުގެ ސަރަހައްދެކެވެ. މިއީ މައްސަލަ ޖެހިގެން އުޅޭ 95،000 އަކަކިލޯމީޓަރު އިއްޔެ ބަހާލި ގޮތެވެ.
އިޓްލޮސްގެ މިނިންމުމާ ގުޅިގެން ރައީސް އިބްރާހީމް މުހައްމަދު ސޯލިހާއި އަދި ސަރުކާރަށް ތާއީދުކުރާ ފަރާތްތަކުން ވަނީ މިއީ ބޮޑު ކާމިޔާބެއް ކަމަށް ސިފަކުރައްވާ އުފާފާޅުކޮށްފަ އެވެ.
ނަމަވެސް ޑރ. މުހައްމަދު މުނައްވަރު ކުރެއްވި ޓްވީޓެއްގައި ވިދާޅުވީ ގާނޫނަކުން ކަނޑައެޅިފައިވާ ދިވެހިރާއްޖޭގެ ހާއްސަ އިގްތިސާދީ ސަރަހައްދުން ބައެއް ގެއްލުމަކީ ނުވަތަ އުނިވުމަކީ ލިބޭ ކާމިޔާބީއެއް ނޫން ކަމަށެވެ.
"[އެއީ] ހިތާމައެކެވެ. މިކަމުގައި އިހްމާލުވި ފަރާތްތައް ޒިންމާ ކުރެވެންޖެހޭނެ އެވެ،" މުނައްވަރު ވިދާޅުވެފައިވެ އެވެ.
ގާނޫނަކުން ކަނޑައެޅިފައިވާ ދިވެހިރާއްޖޭގެ ހާއްސަ އިގްތިސާދީ ސަރަހައްދުން ބައެއް ގެއްލިފައިވާ ކަމަށް މުނައްވަރު ވިދާޅުވާ ސަރަހައްދަށް އެއްވެސް އިރަކު ރާއްޖޭގެ ސިޔާދަތީ ބާރު ނެތް ކަމަށް ރައީސް ސޯލިހާއި ބައެއް ވަޒީރުން ރޭ ވިދާޅުވެފައިވެ އެވެ.
ރާއްޖެއާއި މޮރިޝަސްއާ ދެމެދު ހިޔާލު ތަފާތުވެފައިވާ ކަނޑުގެ ސަރަހައްދު ބަހާލުމަށް އިޓްލޮސް އިން އިއްޔެ ނިންމީ އިކުއި ޑިސްޓެންސްގެ އުސޫލުންނެވެ. ކަނޑުގެ ސަރަހައްދު ބެހުމުގައި ދެ ގައުމުގެ ދެމެދުގައި އެންމެ ބޮޑަށް ހިޔާލު ތަފާތުވުން އުފެދުނީ ޗާގޮސްގެ އެންމެ އުތުރުން އޮންނަ ބްލެންހެމް ރީފުން ފެށިގެން މިން އެޅުމަށް މޮރިޝަސް އިން ވަކާލާތުކުރުމުންނެވެ.
އިޓްލޮސް އިން ނިންމީ އިކުއި ޑިސްޓެންސްލައިން ކުރެހުމުގައި ބްލެންހެމް ރީފުން އެއްވެސް ޕޮއިންޓެއް ނުބެލުމަށެވެ. މިއީ ރާއްޖެއިން ވެސް ހުށަހަޅައި ވަކާލާތު ކުރި ގޮތެވެ.