ރާއްޖޭގައި ބޭއްވޭ އެންމެ ބޮޑު އަދި އެންމެ އުފާވެރި ދުވުން -- އުރީދޫ ފަން ރަން 3،000 އަށްވުރެ ގިނަ ބައިވެރިންނާއެކު ހދ. ކުޅުދުއްފުށި ސިޓީގައި ބާއްވައިފި އެވެ.
އުރީދޫ މޯލްޑިވްސް އިން އިންތިޒާމުކޮށްގެން އިއްޔެ ކުޅުދުއްފުށީގައި ބޭއްވި ދުވުމަކީ މިހާތަނަށް އަތޮޅު ތެރޭގައި ބާއްވުނު އެންމެ ބޮޑު ދުވުމެވެ.
މި ދުވުމުގައި ހދ. އަތޮޅުގެ އެކި ރަށްރަށުން އެކި އުމުރު ފުރައިގެ ދުވުންތެރިން ބައިވެރިވިކަން އުރީދޫ އިން ފާހަގަކުރެ އެވެ.
އުރީދޫ ފަން ރަން އަކީ ހަމައެކަނި ދުވުމުގެ އިތުރުން އުފާވެރި އަދި މަޖާ ހަރަކާތްތަކެއް ހިމެނޭ ދުވުމެކެވެ. މިއީ ދުޅަހެޔޮ އަދި ހަރަކާތްތެރި ދިރިއުޅުމުގެ ވައްޓަފާޅިއެއް އާލާ ކުރުމުގެ ގޮތުން ކުރިއަށް ގެންދާ ހަރަކާތެކެވެ.
އުރީދޫ ފަން ރަން ކުރިއަށް ގެންގޮސްފައިވަނީ އިންފްލެޓްބަލް އޮބްސްޓެކްލްސް އާއި ފޯމް ޕާޓީ ފަދަ މަޖާ ހަރަކާތްތަކާއެކު އެވެ. ދުވުންތެރިން ކޮންމެ ކިލޯމީޓަރެއް ނިމުމުން ކުލަތަކާއެކު އެކަން ފާހަގަކުރި އެވެ.
މި ދުވުމަކީ ކަސްރަތުގެ އިތުރުން އާއިލާ އާއި ރައްޓެހިންނާއެކު އުފާވެރި ވަގުތު ކޮޅެއް ހޭދަކޮށްލުމުގެ ފުރުސަތު ފަހިވެގެންދާ ދުވުމެއްކަމުން މި ދުވުމުގައި ހުރިހާ އުމުރު ފުރައެއްގެ މީހުންނަށް އަދި ދުވުމުގެ ތަޖުރިބާއެއް ނެތް މީހުންނަށްވެސް ބައިވެރިވެވޭ ދުވުމެއް ކަމަށް އުރީދޫ މޯލްޑިވްސް އިން ބުނެ އެވެ.
އުރީދޫ މޯލްޑިވްސް އިން މިހާރު ވެސް އަންނަނީ މި އަހަރުގެ ފަހުކޮޅު ހުޅުމާލޭގައި ބާއްވާ އުރީދޫ ފަން ރަންގެ ކުރިއަށް އޮތް އެޑިޝަނަށް ތައްޔާރުވަމުންނެވެ.
ކުރިއަށް އޮތް އަހަރުތަކުގައި މި ދުވުން ރާއްޖޭގެ އިތުރު ސަރަޙައްދުތަކަށް ފުޅާކޮށް ވީހާވެސް ގިނަ މީހުންނަށް ބައިވެރިވުމުގެ ފުރުސަތު ފަހިވެގެންދާނެ ކަމަށް އުރީދޫއިން ވަނީ ބުނެފަ އެވެ.