ބަތަލާ ޕަރިނީތީ ޗޯޕްރާ އާއި އިންޑިއާގެ ސިޔާސީ ޕާޓީއެއް ކަމަށްވާ އޭއޭޕީގެ އެމްޕީ ރާގަވް ޗައްދާ ވަރަށް އަވަހަށް ކައިވެނިކުރަން އުޅޭ ކަމުގެ ޚަބަރުތައް ފެތުރެމުން ދަނިކޮށް ޕަރިނީތީގެ ގޭގައި ކުލަބޮކިލާ ޒީނަތްތެރިކޮށްފި އެވެ. އިންޑިއާގައި އާއްމުކޮށް މިގޮތަށް ގޭގެ ބޭރު ޒީނަތްތެރިކުރަނީ ކައިވެނީގެ ހަފުލާ ތަކަށެވެ.
އިންޑިއާގެ ނޫސްތަކުން ބުނާ ގޮތުގައި ޕަރިނީތީ އާއި ރާގަވްގެ އެންގޭޖްމަންޓް މާދަމާ ބާއްވަން ވަނީ ހަމަޖެހިފަ އެވެ. މިރަސްމިއްޔާތުގައި ބައިވެރިވާނީ ހަމައެކަނި އާއިލާގެ މީހުންނާއި ގާތް އެކުވެރިން ކަމަށްވެސް ޚަބަރުތައް ބުނެ އެވެ.
ދެ މީހުން ކައިވެނިކުރަން އުޅޭކަން ޕަރިނީތީ ވެސް އަދި ރާގަވް ވެސް ޔަގީންކޮށެއް ނުދެ އެވެ. ނަމަވެސް ޕަރިނީތީގެ ގޭގެ ބޭރު ވަރަށް ބޮޑަށް ޒީނަތްތެރިކޮށްފައިވާ ތަން ފެންނަ ވީޑީއޯއެއް ސޯޝަލް މީޑިއާއިން ފެނިފައިވެ އެވެ.
މި ވީޑީއޯ އަށް ކޮމެންޓް ކުރި ބައެއް މީހުން ބުނީ މިހާރު ދެން ކައިވެނިކުރަން އުޅޭކަން މުޅިން ޔަގީން ކަމަށެވެ.
ޕަރިނީތީ އާއި ރާގަވް މުމްބައި އެއާޕޯޓުން ނުކުންނަ ތަން ފެނިގެން ފޮޓޯގްރާފަރުން ވެސް ވަނީ ކައިވެނި އޮތީ ކޮން ދުވަހަކުތޯ ސުވާލުކޮށްފަ އެވެ. މި ސުވާލަށް ޖަވާބު ދިނުމުގައި ދެ މީހުން ވަރަށް ރަކިކޮށް ހިނިތުންވެލާފައި ކާރަށް އަރައިގެން ދިޔައީ އެވެ.
