އާބަންކޯ އިން ހުޅުމާލޭގައި ތަރައްގީކޮށްފައިވާ ކޮންޓެއިނާ ޕާކުން ދެ ކޮމާޝަލް ސްޕޭސް ދޫކުރުމަށް ހުޅުވާލައިފި އެވެ.
ކޮންޓެއިނާ ޕާކުން ދޫކުރުމަށް ހަމަޖެހިފައިވަނީ އެތަނުގެ ގްރައުންޑް ފްލޯގައި ކެފޭ އަދި ފާސްޓްފުޑް އައުޓްލެޓް ހިންގުމަށެވެ.
ފާސްޓްފުޑް އައުޓްލެޓް ހިންގުމަށް ދޫކުރަން ހަމަޖެހިފައި ވަނީ 1،188 އަކަފޫޓުގެ ކޮންޓެއިނާއެކެވެ. އަދި ކެފޭ ހިންގުމަށް ދޫކުރަން ނިންމާފައި ވަނީ 1،165 އަކަފޫޓުގެ ކޮންޓެއިނާއެކެވެ.
އާބަންކޯ އިން ބުނި ގޮތުގައި މި ދެތަން ވެސް ދޫކުރުމަށް ހަމަޖެހިފައި ވަނީ ފަސް އަހަރުގެ މުއްދަތަކަށެވެ. އެގޮތުން ފުރަތަމަ އަހަރު ދެ އެތަނުގެ ކުލީގެ ގޮތުގައި ހަމަޖައްސާފައި ވަނީ ކޮންމެ އަކަފޫޓަކަށް 15ރ. ގެ ރޭޓުންނެވެ. އަދި ބާކީ ހަތަރު އަހަރު އަކަފޫޓަކަށް 25ރ. ގެ ރޭޓުންނެވެ.
މި ކެފޭ އާއި ފާސްޓްފުޑް އައުޓްލެޓް ހިންގުމަށް ޝައުގުވެރިވާ ފަރާތްތަކުން ބިޑް ސެކިއުރިޓީގެ ގޮތުގައި 5،000ރ. ދައްކަން ޖެހޭނެ އެވެ.
ހުށަހަޅާ ޕްރޮޕޯސަލްތައް ހުޅުވުން އޮންނާނީ މިމަހުގެ 28 ވަނަ ދުވަހުގެ މެންދުރު 1:00 އިން 2:00 އަށް އާބަންކޯގެ އެގްޒިބިޝަން ސެންޓަރުގައި ކަމަށް އާބަންކޯ އިން ބުނެ އެވެ.
ރެޑްވޭވް މެގަމޯލް ފަހަތުގައި ހަދާފައިވާ ކޮންޓެއިނާ ޕާކުގައި ޖުމްލަ ފަސް ތަނެއް ހިންގުމަށް އާބަންކޯ އިން ވަނީ ނިންމާފައެވެ. އެއީ މިހާރު ދޫކުރުމަށް ހުޅުވާލާފައިވާ ކެފޭ އަދި ފާސްޓް ފުޑް އައުޓްލެޓްގެ އިތުރަށް ދެ ކޯ ވޯކިން ސްޕޭސްއާއި ކޮލެބޮރޭޓިވް ރޫމެކެވެ.