ރައީސް ޔާމީން ހައްޔަރު ކުރަން ކޯޓް އަމުރެއް ހެދި މައްސަލަ ބަލަން ފަށައިިފި

ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ހައްޔަރު ކުރަން ފޭކް ކޯޓް އަމުރެއް ތައްޔާރު ކުރި މައްސަލަ ސީރިއަސް މައްސަލައެއްގެ ގޮތުގައި ފުލުހުން ބަލަން ފަށައިިފި އެވެ. ފުލުހުން އިދާރާގައި ދާދިދެންމެއަކު ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ ފޭކް ކޯޓް އަމުރު ނެރެން މަސައްކަތް ކޮށްފައިވަނީ މާލެއިން ބަޔަކު ރާއްޖޭގެ ރަށަކަށް ގޮސް ދަންވަރު 3:00 ޖެހިއިރު މެޖިސްޓްރޭޓް ކޯޓެއް ހުޅުވައިގެން މާލެއިން ދިޔަ މީހުން ފަނޑިޔާރަކާއެކު މަސައްކަތް ކުރި ކަމަށެވެ.

ރޭ ދަންވަރު އެކަން ކޮށްފައި ވަނީ ކޮން ރަށެއްގައި ކަމެއް ފުލުހުންނެއް ނުބުނެ އެވެ.

ނަމަވެސް ކޯޓްގެ އަމުރެއްގެ ގޮތުގައި ސައްހަ ނޫން ލިޔުމެއް މާލޭގެ މަގެއްގެ މަތީގައި ބާއްވައި އެލިޔުން ފުލުހުންގެ ބަޔަކާއި ހަވާލު ކުރަން މަސައްކަތްކޮށް ފުލުހުން ރައީސުލްޖުމްހޫރިއްޔާ ހައްޔަރު ކުރަން މަސައްކަތް ކުރަމުންދާ ކަމަށް ދައްކުވައިދިނުމަށް މަސައްކަތްކޮށްފައިވާ ކަމަށެވެ.

ފުލުުހުންގެ ޗީފް ސުޕްރިންޓެންޑެންޓް މުހައްމަދު ރިޔާޒް މިއަދު ވިދާޅުވީ ފުލުންގެ ސައްހަ ނޫން މައުލޫމާތު ހިމަނައިގެން އަމުރުގެ ކަންކަން ހިނގަމުންދިޔަ ވަގުތު ރާއްޖޭގެ ސިޔާސީ ޕާޓީއަކަށް ނިސްބަތްވާ އެކްޓިވިސްޓުންތަކެއް ރައީސް ޔާމީން ދިރިއުޅުއްވާ ގެކޮޅު ކައިރިއަށްދާން ތައްޔާރުވަމުން ދިޔަކަމަށާއި ފުލުހުންނާއި ސިފައިން ނުކުމެ ރައީސް ހައްޔަރު ކުރާކަން ދައްކަން މަސައްކަތް ކުރަމުންދިޔަ ކަމަށް ތަހުގީގަށް އެނިގައިވާ ކަމަށެވެ.

މީގެ އިތުރުން ރިޔާޒް ވިދާޅުވީ ކުރީގެ ރައީސް މުހައްމަދު ނަޝީދު ސަލާމަތީ ބާރުތަކުގެ އިސް އޮފިސަރަކަށް ފޯނުން ގުޅުއްވާ ރައީސް ޔާމީން ހައްޔަރު ކުރަން ކޯޓް އަމުރެއް ނެރެފައިވާ ކަމަށް ވިދާޅުވެ ރައީސް ޔާމީން ހައްޔަރުކުރަން ބާރު އަޅުއްވާ ވާހަކަފުޅު ދައްކަވާފައިވާ ކަމަށާއި ސައްހަ ނޫން ލިޔުން ތައްޔާރުކުރުމުގައި އަމަލީ ގޮތުން ބައިވެރިވި ފަރާތްތައް ހޯދައި އެމީހުނަށް އަޅަންޖެހޭ ގާނޫނީ ފިޔަވަޅުތައް އަޅާނެ ކަމަށެވެ.

ފުލުހުން މިއަދު ދިން ސްޓޭޓްމަންޓްގައި ކޮން ސިޔާސީ ޕާޓީއެއްގެ އެކްޓިވިސްޓުންނެއް ކަމެއް ސީދާ ނުބުނެ އެވެ. ނަމަވެސް އެ ސްޓޭޓްމެންޓްގައި ހިމަނާފައިވާ ކުރީގެ ރައީސް ނަޝީދު ނިސްބަވަނީ އެމްޑީޕީއަށެވެ.

ރައީސް ޔާމީން ހައްޔަރު ކުރަން ފޭކް ކޯޓް އަމުރެއް ހަދަން މަސައްކަތް ކުރި އިރު މިދިއަ އަހަރުގެ ތެރޭގައި ވަނީ ރައީސް ޔާމީން އަވަހާރަކޮށްލަން ރާވައި ބޮމުގެ ހަމަލާއެއް ދިނުމުގެ އިތުރުން އިތުރުން ތިން ހަމަލާއެއް ރާވާފަ އެވެ.