އެމްޓީސީސީގެ ހިއްސާގެ ފައިދާގެ ގޮތުގައި ހަތަރު ރުފިޔާ ބެހުމާ ދެކޮޅަށް އެ ކުންފުނީގެ ހިއްސާދާރުން ވޯޓު ދީފި އެވެ.
މިއީ ސަރުކާރު ހިއްސާވާ ކުންފުންޏެއްގެ އަހަރީ އާންމު ޖަލްސާއެއްގައި ޑިރެކްޓަރުންގެ ބޯޑުގެ ނިންމުމާ ދެކޮޅަށް ފަހުގެ ތާރީހެެއްގައި އާންމު ހިއްސާދާރުން ގޮތެއް ނިންމި ތާރީހީ ނިންމުމެކެވެ.
އެމްޓީސީސީއަށް މިދިޔަ އަަހަރު ލިބުނު ފައިދާއިން ހިއްސާދާރުންނަށް ޖުމްލަ 32 މިލިއަން ރުފިޔާ އަދި ހިއްސާއަކަށް ހަތަރު ރުފިޔާ ބެހުމަށް އެ ކުންފުނީގެ ޑިރެކްޓަރުންގެ ބޯޑުން އޮތީ ނިންމާފަ އެވެ. މިއީ 2021 ވަނަ އަހަރު ހިއްސާދާރުންނަށް ހިއްސާގެ ފައިދާގެ ގޮތުގައި ބެހި އަދަދަށް ވުރެ 10 ލާރި އިތުރު އަދަދެކެވެ.
ނަމަވެސް މިރޭ ކުރުނބާ މޯލްޑިވްސްގައި ބޭއްވި އެމްޓީސީސީގެ އަހަރީ އާންމު ޖަލްސާގައި ބައިވެރިވި 61 ހިއްސާދާރަކު ވަނީ ޑިރެކްޓަރުންގެ ބޯޑުން ނިންމި ގޮތަށް ހިއްސާ އަކަށް ހަތަރު ރުފިޔާ ބެހުމާ ދެކޮޅަށް ވޯޓު ދީފަ އެވެ. ބޯޑުގެ ނިންމުމާ އެއްގޮތަށް ހިއްސާގެ ފައިދާ ބެހުމަށް ވޯޓު ދިނީ 54 ހިއްސާދާރުންނެވެ.
އެމްޓީސީސީއަށް 2021 ވަނަ އަހަރަށް ވުރެ މިދިޔަ އަހަރު ސާފު ފައިދާ ވަނީ ދަށްވެފަ އެވެ. މިދިޔަ އަަހަރު ސާފު ފައިދާގެ ގޮތުގައި ލިބުނީ 196 މިލިއަން ރުފިޔާ އެވެ. އެކަމަކު މިދިޔަ އަހަރު އެމްޓީސީސީއަށް ވަނީ ރެކޯޑް އަދަދަކަށް އާމްދަނީ ލިބިފަ އެވެ. އެގޮތުން މިދިޔަ އަހަރު 2.4 ބިލިއަން ރުފިޔާގެ އާމްދަނީ ލިބިފައިވެ އެވެ. ހިންގުމުގެ ފައިދާގެ ގޮތުގައި މިދިޔަ އަހަރު 324.16 މިލިއަން ރުފިޔާ ލިބުނުއިރު ޓެކުހަށް ކެނޑުމުގެ ކުރިން ލިބުނު ފައިދާއަކީ 229.53 މިލިއަން ރުފިޔާ އެވެ.
އެމްޓީސީސީ އިން މިދިޔަ އަހަރު އުމްރާނީ ތަރައްގީގެ އާ 65 މަޝްރޫއުއަކާއި ހަވާލުވެ 42 މަޝްރޫއެއްގެ މަސައްކަތް ވަނީ ކާމިޔާބުކަމާއެކު ނިންމާލާފަ އެވެ.