ކުރިއަށް އޮތް ރިޔާސީ އިންތިހާބުގައި ވޯޓު ލެވޭ މީހުންގެ ހައްގު ލިބިފައިވާ މީހުންގެ ދާއިމީ ލިސްޓަށް މިހާތަނަށް 80 ޝަކުވާ ހުށަހަޅައިފި އެވެ.
ލިސްޓް މި މަހުގެ 11 ވަނަ ދުވަހުގަ އާންމުކުރުމަށްފަހު ޝަކުވާ ހުށަހެޅުމަށް 30 ދުވަހުގެ މުއްދަތެއް ވަނީ ދީފަ އެވެ.
ލިސްޓަށް އިއްޔެގެ ނިޔަލަށް ހުށަހަޅާފައިވާ ޝަކުވާތަކަށް ބަލާއިރު ލިބިފައިވާ 80 ޝަކުވާގެ ތެރެއިން 59 ޝަކުވާ އަކީ މަރުވެފައިވާ ބައެއްގެ ނަން ހުރެގެން ހުށަހަޅާފައިވާ ޝަކުވާ އެވެ. ގޭގެ އެޑްރެސް ބަދަލުވެގެން 14 ޝަކުވާއަކާއި، ދާއިރާ ބަދަލުވުމުގެ ތިން ޝަކުވާއަކާއި، ނަން ބަދަލުވުމުގެ ދެ ޝަކުވާ ވެސް ހުށަހަޅާފައިވެ އެވެ. އަދި ލިސްޓުގައި ނަން ނެތުމުގެ އެއް ޝަކުވާ އާއި، އައިޑީ ކާޑު ބަދަލުވުމުގެ އެއް ޝަކުވާ ވެސް ހުށަހަޅާފައިވެ އެވެ.
މިއަހަރުގެ ރިޔާސީ އިންތިހާބުގައި 282،672 މީހުންނަށް ވޯޓުލުމުގެ ހައްގު ލިބިފައިވެ އެވެ. އިންތިހާބުގައި ވޯޓުލުމަށް ރީރަޖިސްޓްރީ ކުރުމަށް ހުޅުވާލުމަށް ހަމަޖެހިފައިވަނީ ކުރިއަށް އޮތް ޖުލައި 16 ވަނަ ދުވަހު އެވެ.
ރިޔާސީ އިންތިހާބުގެ ފުރަތަމަ ބުރު ބޭއްވުމަށް ހަމަޖައްސާފައިވަނީ މިއަހަރުގެ ސެޕްޓެމްބަރު ނުވަވަނަ ދުވަހު އެވެ. ދެވަނަ ބުރެއް ބާއްވަން ޖެހިއްޖެނަމަ ވޯޓުލުމަށް ހަމަޖެހިފައިވަނީ ސެޕްޓެމްބަރު 30 ވަނަ ދުވަހު އެވެ