ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދައުލަތުން ހަމަޖައްސަވާފައިވާ ގެކޮޅު -- މުރައިދޫގެއިން އަންނަ ހޯމަ ދުވަހު ނިކުންނަވާނެ ކަމަށް އެމަނިކުފާނު ރައްޔިތުންގެ މަޖިލީހަށް އަންގަވައިފި އެވެ.
ރައީސް ނަޝީދު މަޖިލީހުގެ އަމީން އާންމު ފާތިމަތު ނިޔުޝާއަސް ފޮނުއްވެވި ސިޓީއެއްގައި ވިދާޅުވީ އިތުބާރު ނެތް ކަމުގެ މައްސަލައިގެ ނޯޓިސް މިމަހުގެ 26 ވަނަ ދުވަހު ހަމަވާނެ ކަމަށާއި އެހެންކަމުން މުރައިދޫގެއިން ގ. ބޭރުވެލި އަށް ބަދަލުވެވަޑައިގަންނަވާނެ ކަމަށެވެ.
ރައްޔިތުންގެ މަޖިލީހަށް ހުށަހަޅާފައިވާ އެމަނިކުފާނުގެ އިތުބާރު ނެތް ކަމުގެ މައްސަލައިގެ ނޯޓިސްގެ މުއްދަތު ހަމަވުމާ އެކު ދައުލަތުން ހަމަޖައްސާފައިވާ ގެކޮޅު -- މުރައިދޫގެއިން ނިކުންނަވާނެ ކަމަށް ރައީސް ނަޝީދު ވިދާޅުވީ މިދިޔަ ހޯމަ ދުވަހު އެވެ.
ރައްޔިތުންގެ މަޖިލީހުގެ ރައީސްގެ ހައިސިއްޔަތުން ނަޝީދު ހުންނަވަން މުރައިދޫގެ ހަމަޖެއްސީ އެމަނިކުފާނަށް އަމާޒުކޮށް މެއި 6، 2021 ވަނަ ދުވަހުގެ ރޭ ދިން ބޮމުގެ ހަމަލާއަށްފަހު އެވެ.
"މުރައިދޫގޭގައި ހުރުން އެއީ އަޅުގަނޑު އެއްގޮތަކަށްވެސް ކުރާ ހިތްވެގެން ކުރާ ކަމެއް ނޫން،" ނަޝީދު މިދިޔަ ހޯމަ ދުވަހު ވިދާޅުވި އެވެ.
މުރައިދޫގޭގައި އުޅެންޖެހޭ އެކަހެރި ދިރިއުޅުންވެސް ނަޝީދު ވަނީ ކޮންމެވެސް ވަރަކަށް ސިފަކޮށްދެއްވާފަ އެވެ. އެގޮތުން ވިދާޅުވީ އެ ގެއަކީ ހުރިހާ ދިމާލަކުން ވެސް ބައްދާފައި ހުންނަ އަނދިރި ގެއެއް ކަމަށެވެ. މުރައިދޫގެއިން ނިކުތުމުން ސެކިއުރިޓީ ނުދީފިނަމަ "ދެން މަރުވެފައި އޮންނާނީ" ކަމުގައިވެސް ވިދާޅުވި އެވެ.
ދައުލަތުގެ ތިން ބާރުގެ އެންމެ އިސްވެރިންގެ ސެކިއުރިޓީ ބަލަހައްޓާ ފަރާތަކީ އެމްއެންޑީއެފް އެވެ.
ރައީސް ނަޝީދަށް ދިން ބޮމުގެ ހަމަލާއަށްފަހު އެމަނިކުފާނު ހުންނަވަން ހާއްސަ ގެކޮޅެއް ސަރުކާރުން ހަމަޖެއްސީވެސް ސިފައިންގެއިން އެކަމަށް އެދުމުން ކަމާ ގުޅޭ ގާނޫނުތައް އިސްލާހުކުރުމަށްފަހު އެވެ.