ށ. ނޫމަރާ ރައްޔިތުންގެ އެންމެ ބޮޑު އެއް ކަންބޮޑުވުން ކަމަށްވާ އެރަށުގެ ބަނދަރުގެ މައްސަލައަށް ހައްލު ހޯއްދަވައިދެއްވާނެ ކަމަށް ރައީސް އިބްރާހީމް މުހައްމަދު ސޯލިހް ވިދާޅުވެއްޖެ އެވެ.
ރައީސްގެ ކެމްޕޭންގައި މިއަދު ނޫމަރާއަށް ވަޑައިގެން އެމަނިކުފާނު ވިދާޅުވީ މިސަރުކާރުން ނޫމަރާގައި ފަށާފައިވާ މަޝްރޫއުތަކުގެ ތެރޭގައި ފެނާއި ނަރުދަމާ ގާއިމުކުރުމުގެ މަސައްކަތާއި ސުކޫލު މަރާމާތުކުުރުން ހިމެނޭ ކަމަށެވެ. ކުރިއަށް ގޮސް ކޮންމެވެސް ވަރަކަށް މަޑުޖެހިފައިވާ މަޝްރޫއުތަކުގެ ތެރޭގައި އިންޖީނުގެ އަދި ކައުންސިލް އިދާރާ މަސައްކަތް ހިމެނޭ ކަމަށް ފާހަގަކުރައްވާ ރައީސް ވިދާޅުވީ ކުރިއަށް އޮތް ފަސް ދުވަހުގެ ތެރޭގައި އެ މަޝްރޫއުތަކަށް ހައްލެއް ހޯއްދަވައިދެއްވާނެ ކަމަށެވެ.
"އިރާދަކުރެއްވިއްޔާ ށ. ނޫމަރާގެ ބަންދަރަކީ ލަފާފުރުމަށް ފަސޭހަ ބަންދަރަކަށް ހަދައިދޭނަން" ބަނދަރުގެ މައްސަލަ ހައްލުކޮށްދެއްވާނެ ކަމަށް އިޝާރާތް ކުރައްވާ ރައީސް ވިދާޅުވި އެވެ.
ރައީސް އިތުރަށް ވިދާޅުވީ ރިޔާސީ ދެވަނަ ދައުރަކަށް އެމަނިކުފާނު އިންތިހާބު ވެއްޖެނަމަ އެރަށުގެ މަސްވެރިން އޮޑިއެހެލުމަށް ހާއްސަ ސަރަހައްދެއް ތަރައްގީކޮށް، ނޫމަރާ ޒުވާނުން ކުޅިވަރު ކުޅުމަށް ރަށުގެ ދަނޑު ރަނގަޅު ފެންވަރަކަށް ތަރައްގީކުރާނެ ކަމަށެވެ. އަދި ނޫމަރާއަށް ދިނާވެފައިވާ ރަށްގިރުމުގެ މައްސަލައަށް ވެސް ހައްލެއް ހޯއްދަވައިދެއްވާނެ ކަމުގައި ވިދާޅުވި އެވެ.
ރައީސް ވިދާޅުވީ ނޫމަރާ އަކީ އެމަނިކުފާނަށް މިދިޔަ ރިޔާސީ އިންތިހާބުގައި ވެސް އަދި ރައީސުލްޖުމްހޫރިއްޔާގެ މަގާމުގައި ހުންނަވައިގެން ވެސް މީގެކުރިން ވަޑައިގެންނެވުނު ރަށެއް ނޫން ކަމަށެވެ. އާބާދީގައި 336 މީހުން ދިރިއުޅޭ ނޫމަރާއަށް މިފަހަރުގެ ކެމްޕޭންގެ އެންމެ ކުރީކޮޅު ވަޑައިގެންނެވުނީތީ އުފާކުރައްވާ ކަމުގައިވެސް ވިދާޅުވި އެެވެ.