- މޯލްޑިވިއަން ޗައިނާގެ ހަ ސިޓީއަކަށް ދަތުރުކުރޭ
- ބެންކޮކަށް ގިނަ ވިޔަފާރިވެރިންދޭ
- ޕެކޭޖުގެ އަގު އުޅެނީ 300-400 ޑޮލަރަށް
ކުދި ވިޔަފާރިތައް ބެންކޮކަށް ވިޔަފާރި ދަތުރުތަކުގައި ދާން މޯލްޑިވިއަން އިން ހާއްސަ އަގެއް ޓިކެޓު ވިއްކަން ފަށައިފި އެވެ.
މޯލްޑިވިއަން އިން ޗައިނާގެ ހަވަނަ ސިޓީއަށް ދަތުރުތައް ފެށުމާ ދިމާކޮށް، އިބްރާހިމް ނާސިރު އިންޓަނޭޝަނަލް އެއާޕޯޓް (އައިއެންއައިއޭ) ގައި ވާހަކަ ދައްކަވަމުން އައިލެންޑް އޭވިއޭޝަންގެ މެނޭޖިން ޑިރެކްޓަރު އަބްދުލް ހާރިސް ވިދާޅުވީ ކުދި ވިޔަފާރިވެރިން އުފެއްދުމަށް ސަރުކާރުން ފަށާފައިވާ "ގެޓްސެޓް" ޕްރޮގްރާމުގެ ދަށުން އުފެދޭ ފަދަ ކުދި ވިޔަފާރިވެރިންނަށް ހާއްސަ އަގެއް ހަމަޖައްސާފައިވާ ކަމަށެވެ.
"އަޅުގަނޑުމެންގެ ޓިކެޓުގައި ހިމެނޭނެ ބެންކޮކަށް 300 ޑޮލަރާއި 400 ޑޮލަރުން ދަށް ފެއާއެއް. މީގެން މި އަމާޒު ކުރަނީ ސަރުކާރުން ފައްޓަވާފައި މި އޮތީ ގެޓްސެޓް ޕްރޮގްރާމެއް. ކުދި ވިޔަފާރިވެރިންތަކެއް އުފެއްދުމަށް. އެ ބޭފުޅުންނަށް ފަސޭހަކާއެކު ވިޔަފާރިކޮށްލުމަށް،" ހާރިސް ވިދާޅުވި އެވެ.
އޭނާ ވިދާޅުވީ މި އަގުތަކުގެ ސަބަބުން ބެންކޮކަށް ވިޔަފާރިކޮށްލުމަށްދާ ވިޔަފާރިވެރިންނަށް ބޮޑު ލުޔެއް ލިބިގެންދާނެ ކަމަށެވެ.
"އަޅުގަނޑުމެން މަސައްކަތް ކުރަމުން މިދަނީ ދިވެހިންނަށް ފަސޭހަ ގޮތްތަކެއް ހަމަޖައްސައި ދިނުމަށް،" ހާރިސް ވިދާޅުވި އެވެ.
މޯލްޑިވިއަން އިން ކުދި ވިޔަފާރިތަކަށް ހާއްސަ އަގުތަކެއް ކަނޑައެޅިއިރު، މި އެއާލައިނުން މިވަނީ ޗައިނާގެ ހަ ސިޓީއަކަށް އުދުހުންތައް ފަށާފަ އެވެ.