އިމްރާނުގެ މައްސަލާގައި ހުލާސާ ބަޔާން އިއްވުން އަންނަ އާދިއްތާގައި

ދައުލަތުން ޓެރަރިޒަމްގެ ދައުވާ އުފުލާފައިވާ އަދާލަތު ޕާޓީގެ ރައީސް އިމްރާން އަބްދުﷲގެ ޝަރީއަތުގެ ހުލާސާ ބަޔާން އިއްވުން އަންނަ އާދިއްތަ ދުވަހަށް ތާވަލުކޮށްފި އެވެ. އެގޮތަށް ނިންމީ މިއަދު އޮތް އިމްރާނު މައްސަލާގެ އަޑުއެހުމުގަ އެވެ.

ޝަރީއަތް ނިމެންދެން އިމްރާނު ގޭބަންދަށް ބަދަލުކުރުމަށްފަހު، އަލުން ޖަލަށް ގެންދިޔުމަށްފަހު ބޭއްވި އަޑުއެހުމުގައި މޭޑޭގައި އިމްރާނު ދެއްކެވި ވާހަކަތުގެ ވީޑިއޯގެ އެނަލިސިސް ރިޕޯޓް ދައުލަތުން ވަނީ ހުށަހަޅާފަ އެވެ. އެ ރިޕޯޓް އެކުލަވާލަން މައްސަލަ ބައްލަވާ ގާޒީ އަބުދުލް ޔޫސުފް ބާރީ މީގެކުރިން ވަނީ އަންގާފަ އެވެ. އެ ރިޕޯޓް ތައްޔާރުކުރުމަށް އިމްރާނު ފުލުހުންގެ އިދާރާއަށް ހާޒިރުކޮށްފައިވެ އެވެ.

އެނަލިސިސް ރިޕޯޓުން ދައުލަތުން ހުށަހެޅީ ވީޑިއޯގައި ވާހަކަ ދައްކަވަނީ އިމްރާނު އަބްދުﷲކަން ސާބިތުކޮށްދިނުމަށާއި އެ ވީޑިއޯއަކީ މެއި އެއްވަނަ ދުވަހުގެ ވީޑިއޯއެއްކަން ސާބިތުކޮށްދިނުމަށެވެ. މި ރިޕޯޓާ ގުޅިގެން އިމްރާނުގެ ފަރާތުން އެއްވެސް އެއްޗެއް ބުނެފައެއް ނުވެ އެވެ. ދައުލަތުގެ ވަކީލުން ވިދާޅުވީ ރިޕޯޓާ ގުޅިގެން ފާހަގަވި ނުކުތާތައް ހުލާސާ ބަޔާނުގައި އިއްވާނެ ކަމަށެވެ.

އިމްރާންގެ މައްސަލައިގައި، ޝަރީއަތުގެ ފަރާތުން ހާޒިރުކުރަން ކުރިން ނިންމާފައިވާ މީހާ ހާޒިރުނުކުރުމަށް ވަނީ ނިންމާފަ އެވެ. ގާޒީ ބާރީ މިއަދު ވިދާޅުވި ގޮތުގައި، އެ މީހާއަކީ ދިވެހި ބަހުގެ މުދީރެކެވެ. އެމީހާ ހާޒިރުކުރަން މަސައްކަތްކުރީ، އެއީ ދިވެހި ބަހުން ދައްކާފައިހުރި ވާހަކަތަކެއް ޝަރީއަތުގެ މަޖިލީހަށް ދޭހަކޮށްދިނުމަށް ކަމަށެވެ. ނަމަވެސް ބަޔަކު އެކަންވެސް އޮޅުވާލަން މަސައްކަތް ކުރި ކަމަށް ބާރީ ވިދާޅުވި އެވެ.

މިއަދު އަޑުއެހުން ނިންމާލައްވަމުން ގާޒީ ބާރީ ވިދާޅުވީ އަންނަ އާދިއްތަ ދުވަހު މައްސަލާގެ ހުލާސާ ބަޔާން އިއްވުން އޮންނާނެ ކަމަށެވެ. ގާޒީ ބާރީގެ އެދިލެއްވުމަކަށް އަޑުއެހުމަށް ނަން ނޯޓުކޮށްފައިވާ ގަލޮޅު ދެކުނު ދާއިރާގެ މެންބަރު އަހުމަދު މަހުލޫފު އަޑުއެހުމަށް ވައްދާފައެއް ނުވެ އެވެ. އަދި ގާޒީ ބާރީ ވަނީ ރާއްޖެޓީވީގެ ނޫސްވެރިޔާ މުރުޝިދު އަބްދުލް ހަކީމް ވެސް އަޑުއެހުމަށް ނުވައްދަން އަންގާފަ އެވެ.

އިމްރާންގެ މައްސަލަ ބައްލަވާ ގާޒީ ބާރީ އަކީ ހައިކޯޓުގެ ފަނޑިޔާރު ކަމަށް ކުރިމަތިލައްވާފައިވާ ބޭފުޅެކެވެ. އިމްރާން ވަނީ ގާޒީ ބާރީއާމެދު ހިންހަމަ ނުޖެހޭ ކަމަށް ވިދާޅުވެ، ސްޕްރީމް ކޯޓަށް މައްސަލައެއް ވައްދާފަ އެވެ. މައްސަލާގައި ބުނެފައިވަނީ އެ މައްސަލަ ބައްލަވާ ގާޒީ ބަދަލުކޮށް ދިނުމަށް އެދޭ ކަމަށެވެ. ގާޒީ ބާރީ އިންސާފަށް ޝަރީއަތް ކުރިއަށް ގެންދަވާ ކަމަށް ގަބޫލުނުކުރެވޭ ކަމަށް ވެސް ސްޕްރީމް ކޯޓަށް އިމްރާން ވެއްދި މައްސަލާ ބުނެފައިވެ އެވެ.

އިމްރާންގެ މައްޗަށް އުފުލާފައިވާ ދައުވާއަކީ ގާނޫނު ނަންބަރު 10/90 ޓެރަރިޒަމް މަނާކުރާ ގާނޫނުގެ ދެ ވަނަ މާއްދާގެ (ކ)ގެ ދަށުން އުފުލާފައިވާ ދައުވާއެކެވެ.