މިސަރަހައްދުގައި ބޮލަކަށް ޖެހޭ ނިސްބަތް އެންމެ މަތި ގައުމަކީ ރާއްޖެ ކަމަށާއި އެއީ އިގްތިސާދީ ހަރުދަނާ ފިޔަވަޅުތަކެއް އަޅާފައިވާތީ އާދެވިފައިވާ ހިސާބެއް ކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެ އެވެ.
ރިޔާސީ ކެމްޕޭންގައި މިއަދު މ. ރަތްމަންދޫ އަށް ވަޑައިގެން ރައީސް ވިދާޅުވީ ކޮންމެ ދިވެއްސެއްގެ ބޮލަކަށް 12،000 ޑޮލަރު ޖެހޭ ކަމަށެވެ. އެއީ ސަރަހައްދީ ގައުމުތަކަށް ބަލާއިރު ބޮޑު ކުރިއެރުމެއް ގޮތުގައި ސިފަކުރެއްވި އެވެ.
ރާއްޖޭގައި ބޮލަކަށް ޖެހޭ ނިސްބަތް މަތީ އަދަދެެއްގައި ހުރިއިރު ރާއްޖޭގެ އެއްވެސް ރައްޔިތަކު އަސާސީ ހިދުމަތްތަކުން މަހުރޫމުވެފައި ހުރެގެން ވާނެ ކަމަށް ގަބޫލުނުކުރައްވާ ކަމަށްވެސް ރައީސް ވިދާޅުވި އެވެ.
އެމަނިކުފާނު ވިދާޅުވީ ޖަޒީރާ ރާއްޖޭގެ ނަމުގައި 2018 ގައި ރިޔާސީ އިންތިހާބަށް މެނިފެސްޓޯއެއް ހިފައިގެން ނިކުންނެވި އެއް ސަބަބަކީ ސަރުކާރަށް ދައުލަތަށް ލިބޭ އާމްދަނީ ހަމަހަމަ ގޮތެއްގައި ރައްޔިތުންނަށް ފޯރުކޮށްދިނުން ކަމަށެވެ. އަދި އަސާސީ ހިދުމަތްތައް ނުލިބި ހުރި ރަށްރަށަށް އެ ހިދުމަތް ފޯރުކޮށްދިނުމަށް ކަމަށެވެ.
"މިއަދު އަޅުގަނޑު އުފަލާ އެކު ފާހަގަކުރަން. ރަށްރަށަށް ބޭނުންވާ އަސާސީ ހިދުމަތްތައް އެދަނީ ހަމަޖެހެމުން،" އެމަނިކުފާނު ވިދާޅުވި އެެވެ.
ރައީސް އިތުރަށް ވިދާޅުވީ ކުރިއަށް އޮތް އަހަރު އާރުޓީއެލް ފެރީ ނިޒާމުގެ ތެރެއިން މުޅި ރާއްޖެ ގުޅާލާނެ ކަމަށެވެ. އަދި މިކަން ވެގެންދާނީ ރަތްމަންދޫ ފަދަ ކުދިކުދި ރަށްތަކަށް ލިބޭ ލުޔަކަށް ކަމުގައި ވިދާޅުވި އެވެ.
ކޮންމެ ރަށެއްގައިވެސް އެ ރަށެއްގެ ތަރައްގީއަށްޓަކައި ކުރަންޖެހޭ ކަންތައްތައް ކުރަމުންދާނީ އެރަށެއްގެ ކައުންސިލާއި ރައްޔިތުންނާއި ވާހަކަ ދައްކައިގެން ރައްޔިތުން ބޭނުންވާ ގޮތަށް ކަމުގައިވެސް ރައީސް ވިދާޅުވި އެވެ.