ވެލެންސިއާ އަތުން ރޭ 1-1އިން އެއްވަރުވި މެޗާއެކު ބަލިނުވެ 29 މެޗު ހަމަކޮށް ކުލަބުގެ އާ ރެކޯޑާއެކު ސްޕެނިޝް ކަޕުގެ ފައިނަލަށް އެންމެ ފަހުގެ ޗެމްޕިއަން ބާސެލޯނާ ދަތުރުކޮށްފި އެވެ.
ރޭގެ މެޗަށް ބާސެލޯނާއިން ނެރުނީ ބަދަލު ކުޅުންތެރިންގެ ޓީމެކެވެ. ލަޔޮނަލް މެސީ އާއި ލުއިސް ސުއަރޭޒް އަދި ނޭމާ ސަންޓޯސް ފަދަ ކުޅުންތެރިން މެޗަށް ނުނެރުނީ ވެލެންސިއާއާ އަތުން ސެމީގެ ފުރަތަމަ މެޗުގައި 7-0އިން ބާސެލޯނާ މޮޅުވެފައިވުމުންނެވެ.
ރޭގެ މެޗުގައި ބާސެލޯނާ އަށް ލަނޑު ޖަހައިދިނީ ވިލްފްރިޑް ކަޕްޓޫމް އެވެ. މި ލަނޑަށްވުރެ ކުރިން ވެލެންސިއާގެ ލަނޑު ޖެހީ އަލްވާރޯ ނެގްރެޑޯ އެވެ.
ފައިނަލުގައި ބާސެލޯނާ ވާދަކުރަން ޖެހޭ ޓީމެއް ކަށަވަރުވާނީ ސެވިއްޔާ އާއި ސެލްޓަވީގޯ މިރޭ ކުޅޭ މެޗަށް ފަހު އެވެ.
ބާސެލޯނާގެ ބެންޗު ޓީމު އަތުން ބަލިނުވެ ސަލާމަތްވި ނަމަވެސް ވެލެންސިއާގެ ކޯޗު ގެރީ ނެވިލް އަށް ވަނީ ވަރަށް ބޮޑަށް ފިއްތުންތައް ކުރިމަތިވެފަ އެވެ. އޭނާ ޓިމާ ހަމާވުވެގެން ދެ މަސްދުވަސްވާން ކައިރިވެފައިވާއިރު އަދިވެސް ވެސް އެ ޓީމު މެޗަކުން މޮޅެއްނުވެ އެވެ.
އަނެއްކޮޅުން ޖެހިޖެހިގެން 29 މެޗުން ބާސެލޯނާ ބަލިނުވެ ހިފަހައްޓާލުމުން ކުލަބުގެ ރެކޯޑް އާވި ނަމަވެސް ކޯޗު ލުއިސް އެންރީކާ އެއީ މާބޮޑު ކަމަކަށް ނުހަދަ އެވެ. އެންމެ ފަހުން ބާސެލޯނާ ޖެހިޖެހިގެން 28 މެޗުން މޮޅުވެ ރެކޯޑް ހެދީ 2009 އަދި 2010 ވަނަ އަހަރުގެ ސީޒަނުގައި ޕެޕް ގާޑިއޯލާގެ އިރުޝާދުގެ ދަށުންނެވެ.
"ބާސެލޯނާ އަކީ ފައިނަލްތަކާއި ތަށި ހޯދަން އޮތް ޓީމެއް. މި ފަދަ ނަންބަރުތަކުން ތަށިތައް ލިބޭކަމަށް ވަންޏާ އެކަން ވެގެންދާނީ ކުލަބަށް ލިބޭނެ ބޮޑު ހިތްހަމަޖެހުމަކަށް،" އެންރީކޭ ބުންޏެވެ.