ފުލުހުން ދެ ނޫސްވެރިއަކު ކޮއްޕާލި މައްސަލަ އިންޓަނޭޝަނަލް ފެޑެރޭޝަން އޮފް ޖާނަލިސްޓްސް (އައިއެފްޖޭ) އިން ކުށްވެރިކޮށްފި އެވެ.
އައިއެފްޖޭ އިން ކުށްވެރިކޮށްފައި މިވަނީ މި މަހުގެ 20 ވަނަ ދުވަހު އިދިކޮޅު ޕީޕީއެމް ޕީއެންސީގެ ލީޑާޝިޕްގެ ބައެއް ބޭފުޅުން ޖުމްހޫރީ މައިދާނަށް އެއްވި ދުވަހު އެ މަންޒަރު ކަވަރުކުރަން އުޅުނު ދެ ނޫސްވެރިޔަކު ކޮއްޕާލި މައްސަލަ އެވެ.
ފުލުހުންގެ މި އަމަލާ ގުޅިގެން އަނިޔާވީ ޗެނަލް 13 ގެ ކެމެރާމަނަކާއި، ސަންގު ޓީވީގެ ނޫސްވެރިއަކަށެވެ.
މިމައްސަލަ ހަރުކަށި އިބާރާތުން ކުވެރިކޮށް އެ މައްސަލަ ތަހުގީގުކޮށް ފިޔަވަޅު އެޅުމަށްވެސް ގޮވާލާފައިވެ އެވެ.
ފުލުހުން ގެންދަނީ މިމައްސަލަ ބަލައި ތަހުގީގުކުރަމުންނެވެ. އަދި ނޫސްވެރިން ކޮއްޕާލި ފުލުސް އޮފިސަރު މިހާރު ވަނީ މަސްއޫލިއްޔަތުތަކުން އެއްފަރާތްކޮށްފަ އެވެ.
މުޒާހަރާތަކާއި އެއްވުންތައް ކަވަރުކުރާ ނޫސްވެރިންނަށް އަބަދުވެސް ފުލުހުންގެ ފަރާތުން އެކި ކަހަލަ ހުރަސްތައް ކުރިމަތިކުރެ އެވެ.