ރަނިންމޭޓަކު ކަނޑައެޅުމަށްފަހު ރިޔާސީ އިންތިހާބުގައި ވާދަކުރުމަށް އަންނަ ހުކުރު ދުވަހު ކެންޑިޑެސީ ފޯމު ހުށަހަޅުއްވާނެ ކަމަށް އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެ އެވެ.
ހއ. އަތޮޅަށް ކުރެއްވި ކެމްޕޭން ދަތުރުފުޅު ނިންމަވާލެއްވުމަށްފަހު ހދ. ހަނިމާދޫ އަށް ވަޑައިގެން ނޫސްވެރިންނާ ބައްދަލުކުރައްވާ ރައީސް ވިދާޅުވީ މިރޭ ނޫނީ މާދަމާގެ ވަގުތެއްގައި އެމަނިކުފާނު ރަނިންމޭޓެއް ކަނޑައަޅުއްވާނެ ކަމަށެވެ.
ރައީސް ވިދާޅުވީ އެމަނިކުފާނު ރަނިންމޭޓެއް ކަނޑައަޅުއްވާއިރު މިހާރުގެ ނައިބް ރައީސް ފައިސަލް ނަސީމާއި އާ ބޭފުޅުންގެ ނަންތައް ވެސް ލިސްޓްގައި އެބައޮތް ކަމަށެވެ.
"އަޅުގަނޑުމެން މިދަނީ ކޯލިޝަނަކާ އެކީގައި. އެހެންވީމާ ކޯލިޝަންގެ މަޝްވަރާ ވެސް މީގެތެރޭގައި އަންނާނެ އަޅުގަނޑަށް. އެހެންވީމާ އެންމެންގެ އަޑުއެހުމަށްފަހުގައި އެއާ ދޭތެރޭގައި އަޅުގަނޑު ނިންމާނީ،" ރައީސް ވިދާޅުވި އެވެ.
އެމަނިކުފާނު ވިދާޅުވީ މިރޭ މާލެ ވަޑައިގަތުމަށްފަހު އެމަނިކުފާނު މަޝްވަރާކުރައްވަންޖެހޭ ބޭފުޅުންނާ މަޝްވަރާކުރެއްވުމަށްފަހު މާދަމާ ރަނިންމޭޓެއް ކަނޑައަޅުއްވާނެ ކަމަށެވެ. އަދި އެންމެ ލަސްވެގެން އަންނަ ހުކުރު ދުވަހު ކެންޑިޑެސީ ފޯމު އިލެކްޝަންސް ކޮމިޝަނަށް ހުށަހަޅުއްވާނެ ކަމަށެވެ.
"އެއީ އީސީއަށް ހުށަހެޅުއްވުމަށްފަހުގައި 48 ގަޑިއިރު ތެރޭގައި އަޅުގަނޑަށް ޖަވާބެއް ގާނޫނީ ގޮތުން ލިބޭނެ. [އޮގަސްޓް] ހަތްވަނަ ދުވަސް މިއީ އެންމެ ފަހު ދުވަސް ކަމަށްވާތީ އެއްވެސް އިޝޫއެއް އޭގައި އުޅޭ ކަމަށްވަންޏާ އެ ބަދަލުކޮށްފައި ލުމަށް ޖާގައެއް ބޭއްވުމުގެ ގޮތުން އިރާދަކުރެއްވިއްޔާ ހުކުރުގައި އެންމެ ލަސްވެގެން އަޅުގަނޑު މިގަސްދުކުރަނީ ރަނިންމޭޓަކާ އެކީގައި ފޯމު ހުށަހެޅުމަށް،" ރައީސް ވިދާޅުވި އެވެ.
ރިޔާސީ އިންތިހާބުގައި ވާދަކުރައްވާނެ ކަމަށް މިހާތަނަށް އިއުލާންކުރައްވާފައިވާ ބޭފުޅުންގެ ތެރެއިން މިހާތަނަށް ރަނިންމޭޓެއް ކަނޑައަޅައި އިލެކްޝަންސް ކޮމިޝަނަށް ކެންޑިޑެސީ ފޯމު ހުށަހެޅުއްވީ ޕީޕީއެމް ޕީއެންސީގެ ރިޔާސީ ކެންޑިޑޭޓް ރައީސް އަބްދުﷲ ޔާމީން އެވެ. އެމަނިކުފާނުގެ ރަނިންމޭޓަކަށް ކަނޑައަޅުއްވާފައިވަނީ މީގެކުރިން 2013 ވަނަ އަހަރުވެސް އެމަނިކުފާނުގެ ރަނިންމޭޓަކަށް ހުންނެވި ޑރ. މުހައްމަދު ޖަމީލް އަހްމަދު އެވެ.
ރައީސް ޔާމީން ރިޔާސީ އިންތިހާބުގައި ވާދަކުރެއްވުމަށް އިއްޔެ ހުށަހެޅުއްވި ނަމަވެސް އިލެކްޝަންސް ކޮމިޝަނުން އިއްޔެ ވަނީ އެމަނިކުފާނުގެ ކެންޑިޑެސީ ބަލައިނުގަތުމަށްވެސް ނިންމާފަ އެވެ. އަދި އެ މައްސަލަ ރައީސް ޔާމީންގެ ފަރާތްޕުޅުން މިހާރު ވަނީ ސުޕްރީމް ކޯޓަށް ހުށަހަޅުއްވާފަ އެވެ. ސުޕްރީމް ކޯޓަށް މައްސަލަ ބަލައިގެންފައިވީ ނަމަވެސް މައްސަލައިގައި އަދި ވަކި ގޮތެއް ނިންމާފައެއް ނުވެ އެވެ.
ކުރިއަށް އޮތް ރިޔާސީ އިންތިހާބުގައި ވާދަކުރައްވާ ބޭފުޅުންގެ ތެރޭގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހާއި ރައީސް ޔާމީންގެ އިތުރުން ހިމެނެނީ ޖުމްހޫރީ ޕާޓީގެ ފަރާތުން ގާސިމް އިބްރާހީމާއި މޯލްޑިވްސް ނެޝަނަލް ޕާޓީގެ ފަރާތުން މުހައްމަދު ނާޒިމާއި ދަ ޑިމޮކްރެޓްސްގެ ފަރާތުން އިލްޔާސް ލަބީބް އެވެ. މީގެއިތުރުން އެމްއާރްއެމްގެ ރައީސް ފާރިސް މައުމޫނާއި ކުރީގެ ހޯމް މިނިސްޓަރު އުމަރު ނަސީރު ވަނީ އަމިއްލަ ގޮތުން އިންތިހާބުގައި ވާދަކުރެއްވުމަށްޓަކައި 1،500 މީހުންގެ ސޮއި ހަމަކޮށްފަ އެވެ.