ނިމިގެން ދިޔަ ރައީސް އަބްދުﷲ ޔާމީންގެ ސަރުކާރުގައި އެންމެ މުހިއްމު އެއް ސިފައަކަށްވީ އަނިޔާވެރިކަން ކަމުގައި ރައީސްުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ދ. ރިނބުދޫގައި މިއަދު ބޭއްވި ކެމްޕޭން ޖަލްސާގައި ރައީސް ވިދާޅުވީ ވޭތުވެދިޔަ ފަސް އަހަރު ދުވަހަކީ ހަމަޖެހުމާއި ސުލްހަ ރާއްޖެއަށް ގެނެސްދެވުނު ފަސް އަހަރު ކަމަށެވެ. އަދި ކުރީގެ ސަރުކާރުގެ އޮތް އަނިޔާވެރިކަން މިހާރު ނޯންނާނެ ކަމަށް ފާހަގަކުރެއްވި އެވެ.
"ކިރިޔާވެސް ހިޔާލު ތަފާތުވާ މީހަކު ވެއްޖެއްޔާ ހައްޔަރުކޮށް ބަންދުކޮށް ޖަލުގެ ކުޑަގޮޅި ތެރެއަށް ލުން [ކުރިން އޮތީ]. ނޫސްވެރިކަމުގެ މިނިވަންކަން އޮބެހެއްޓުން. ފަނޑިޔާރުގެ ހުއްޓުމަކަށް ގެނައުން. ރައްޔިތުންގެ މަޖިލީސް ތަޅުލުން. މިއީ ކުރިން ފެންނަމުން ދިޔަ ކަންތައް،" ރައީސް ވިދާޅުވި އެވެ.
އެމަނިކުފާނު ވިދާޅުވީ ކުރީގެ ސަރުކާރުގައި އެ ސަރުކާރުން ހަރަދުކޮށްގެން ޑިގްރީ ފުރިހަމަކުރި އެއްވެސް ދަރިވަރަކު ނުހުންނާނެ ކަމަށެވެ. އެހެންނަމަވެސް މިހާރު 18،000 ދަރިވަރުން ވަނީ މިސަރުކާރުގެ ހިލޭ ޑިގްރީގައި ބައިވެރިވެފައި ކަމަށް ރައީސްގެ ވާހަކަފުޅުގައި ފާހަގަކުރެއްވި އެވެ.
ރައީސް ވިދާޅުވީ ކޮވިޑުގެ ދަތި ހާލުގައި މިސަރުކާރުން އަޅާފައިވާނީ ވަރަށް ހަރުދަނާ ރަނގަޅު ފިޔަވަޅުތަކެއް ކަމަށެވެ. އެގޮތުން ވަޒީފާ ގެއްލުނު މީހުންނަށް އެލަވަންސްދީ ކަރަންޓް ސަބްސިޑީސް ދިނުމުގެ އިތުރުން ކަރަންޓާއި ތެލުގެ އަގު ބޮޑު ނުވާނެހެން ފިޔަވަޅުތައް އެދުވަސްވަރު އެޅުނު ކަމަށެވެ. އަދި މިއަދު މިހިސާބަށް އާދެވިފައި މިތިބީ އެ ދުވަހު އެޅި ފިޔަވަޅުތަކުގެ ސަބަބުން ކަމުގައި ވިދާޅުވި އެވެ.
"މިއަދު އެހެންނޫންނަމަ މިތާ އޮންނާނީ ތަޅާފޮޅުމާއި، އަނިޔާވެރިކަމާއި ބަނޑަށް ޖެހުމާއި،" ރައީސް ވިދާޅުވި އެވެ.
ކޮވިޑްގެ ދުވަސްވަރު އެޅި ފިޔަވަޅުތަކުގެ ނަތީޖާއެއްގެ ގޮތުން މުޅި ދުނިޔޭގައި އެންމެ ބާރަށް ކުރިއަރާ އިގުތިސޯދުތަކުގެ ތެރޭގައި ރާއްޖެ މިއަދު ހިމެނިގެން ދިއުމަކީ ލިބުނު ބޮޑު ހިތްހަމަޖެހުމެއް ކަމުގައި ރައީސް ވިދާޅުވި އެވެ.
"އެންމެ ބާރަށް ކުރިއަރާ 10 ގައުމުގެ ތެރޭގައި މި ރާއްޖެ ހިމެނޭ. އަދި މި ސަރަހައްދުގައި އެންމެ ބާރަށް ކުރިއަރާ އިގްތިސޯދެއްގެ ގޮތުގައި ދިވެހި ރާއްޖެ ވަނީ ފާހަގަކޮށްފަ،" ރައީސް ވިދާޅުވި އެވެ.
އެމަނިކުފާނު އިތުރަށް ވިދާޅުވީ އޭރު އެޅި ފިޔަވަޅުތަކާއި ގުޅިގެން ރައްޔިތުންގެ މަޖިލީހުގައި ރާއްޖެ ބަނގުރޫޓު ވާނެ ކަމަށް ބުނެ ވާހަކަ ދެއްކި ކަމަށެވެ. އަދި ތަކެތީގެ އަގު އިންތިހާއަށް ބޮޑުވެ މީހުން ބަނޑަށް ޖެހޭނެ ކަމުގެ ވާހަކަ ދައްކާ ރައްޔިތުން ނުތަނަވަސް ކުރުވަމުން ގެންދިޔަ ކަމަށްވެސް ވިދާޅުވި އެވެ. އެހެންނަމަވެސް ތަކެތީގެ އަގު އެންމެ އަގު ހެޔޮ ގައުމަކަށް މި ސަރަހައްދުގައި މިހާރުވެސް އޮތީ ރާއްޖެ ކަމުގައި ވިދާޅުވި އެވެ.
"މި އަހަރު ތެރޭގައި އިންފްލޭޝަން އޮންނާނެ ކަމަށް އަންްދާޒާ ކުރީ 5.4 އެހެންނަމަވެސް މިހާރުގެ އިންފްލޭޝަން ހުރީ 3.2 ޕަަސަންޓްގައި،" ރައީސް ވިދާޅުވި އެވެ.
އެމަނިކުފާނު ވިދާޅުވީ ވެރިކަމުގައި ހޭދަކުރި ފަސް އަހަރު ތެރޭގައި ގިނަ މަސައްކަތްތަކެއް ކުރެވި ރައްޔިތުންނަށް ހިތްހަމަޖެހުމެއް ހޯދައިދެވިއްޖެ ކަމަށެވެ. އާބާދީ ކުޑަވިޔަސް ތަފާތު ކުރުމެއް ނެތި ރައްޔިތުންނަށް ހިދުމަތް ފޯރުކޮށްދެމުންދާނެ ކަމަށާއި މިހާރު ފަށާފައިވާ މަސައްކަތްތަކާއި އެކު ކުރިއަށް ގޮސް ރައްޔިތުން ހިތްހަމަޖެހޭ ފަދަ މުސްތަގުބަލެއް ހޯދައިދިނުމަކީ އެމަނިކުފާނުގެ އަޒުމެއް ކަމުގައި ވިދާޅުވި އެވެ.
"މިއޮތް ބަނދަރާއި ފެނާއި ނަރުދަމާގެ ނިޒާމަކީ މިފަދަ ކުޑަ ރަށެއްގައި ދިރިއުޅޭ ރައްޔިތުންނަށް މިއިން ޒަމާނެއްގައި ވެސް ލިބޭނެ ކަމަށް އުއްމީދުކުރާނެ ކަންތައްތަކެއް ނޫން. އެހެންނަމަވެސް މި ސަރުކާރުން މި އަންނަނީ ރާއްޖޭގެ ހުރިހާ ރަށެއްގައި ވަކި ރަށެއް ތަފާތު ކުރުމެއްނެތި ފެނާ ނަރުދަމާގެ މަސައްކަތް ކުރަމުން." ބަނޑިދޫގައި މިސަރުކާރުން ހަދައިދީފައިވާ ބަނދަރަށް އިޝާރާތް ކުރައްވާ ރައިސް ވިދާޅުވި އެވެ.