ކުރިއަށް އޮތް ރިޔާސީ އިންތިހާބަށް ރެކޯޑް އަދަދަކަށް ކެންޑިޑޭޓުން ކުރިމަތިލައްވާފައިވާތީ އިންތިހާބު ކާމިޔާބު ކުރަން ވަރަށް ބޮޑަށް ފަސޭހަވެއްޖެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެ އެވެ.
ކުޑަހުވަދޫގައި މިރޭ ކެމްޕޭން ޖަލްސާގައި ރައީސް ސޯލިހް ވިދާޅުވީ މިހާރު އަމަލުކުރަމުންދާ ފެހި ގާނޫނުއަސާސީއަށް އަމަލުކުރަން ފެށި ފަހުން މިއަހަރުގެ ރިޔާސީ އިންތިހާބަކީ އެންމެ ގިނަ ބޭފުޅުން ކުރިމަތިލި އިންތިހާބު ކަމަށްވީ ނަމަވެސް އިންތިހާބު އެއްބުރުން ކާމިޔާބު ކުރައްވާނެ ކަމަށެވެ.
"ކުރިއަށް އޮތް ރިޔާސީ އިންތިހާބަށް އަށް ކެންޑިޑޭޓުން ކުރިމަތިލައިފި. ރެކޯޑް އަދަދެއް. އަޅުގަނޑުމެންނަށް މީގެއިން ވަރަށް ބޮޑަށް ފަސޭހަވެއްޖެ. ވަރަށް ބޮޑު ތަން ފަސޭހަވެއްޖެ. އިރާދަކުރެއްވިއްޔާ ކުރިއަށް އޮތް ރިޔާސީ އިންތިހާބު އެއްބުރުން ބޮޑުތަނުން ކާމިޔާބުކުރާނަން،" ރައީސް ވިދާޅުވި އެވެ.
ރައީސްގެ ވާހަކަފުޅުގައި މިރޭ މައިގަނޑު ގޮތެއްގައި ވަނީ އެމަނިކުފާނުގެ ސިޔާސަތުތަކަށް ފާޑުވިދާޅުވެ އެކަންކަން ނުވާނެ ކަމަށް ބުނި މީހުންނަށް ރައްދުދެއްވާފަ އެވެ. ރައްޔިތުންގެ ދިރިއުޅުން ފަސޭހަކޮށް ގައުމަށް ތަރައްގީ ގެނައުމަށް ވެރިކަމުގެ މިދައުރުގައި ކުރެއްވި ކަންކަމާއި ކުރެއްވި ހަރަދު ތަކުގެ ތަފްސީލް ރައީސް ވަނީ ނަންބަރުތަކުން ވިދާޅުވެ ދެއްވާފަ އެވެ.
އެގޮތުން ވިދާޅުވީ 152 ރަށަކަށް ލަފާފުރުން ފަސޭހަކޮށްދީ، 141 ރަށުގައި ފެނާއި ނަރުދަމާ ގާއިމުކޮށްދީ 152 ރަށުގައި ކަރަންޓްގެ މައްސަލަ ހައްލުކުރުމާއި 37 ރަށުގައި މިސްކިތް އެޅުމުގެ މަސައްކަތް ގާތްގަނޑަކަށް ނިމިފައިވާ ކަމަށެވެ. މިސަރުކާރުގެ ހިލޭ ޑިގްރީ ޕްރޮގްރާމުގައި 18،000 ދަރިވަރުން ބައިވެރިވެ 7،000 ކުދިން ޑިގްރީ ނިންމާފައިވާ ކަމަށާއި ސްޓޫޑެންޓް ލޯނުގެ އެޑްމިނިސްޓްރޭޓިވް ޗާޖު އެއް ޕަސަންޓަށް ކުޑަކޮށްދީފައިވާނެ ކަމަށްވެސް ވިދާޅުވި އެވެ. އަދި ކޮވިޑްގެ އާލަމީ ވަބާގައި ޖެހި ސަރުކާރުގެ ހުރިހާ ސިޔާސަތެއް ތަންފީޒުކުރުން ދެ އަހަރަށް މަޑުޖައްސާލަން ޖެހުނު ވަގުތުވެސް ވަޒީފާ ގެއްލުނު މީހުންނަށް އިންކަމް ސަޕޯޓްދީ، ކަރަންޓުގެ އަގު ބޮޑުވިޔަ ނުދީ ހިފެހެއްޓުމަށް ސަބްސިޑީޒްދީ، ރިސޯޓްތަކުގެ މުވައްޒަފުންނަށް މުސާރަ ދިނުމަށްޓަކައި ރިސޯޓް އޯނަރުންނަށް ލޯނުދީފައިވާނެ ކަމަށްވެސް ރައީސް ވިދާޅުވި އެވެ މީގެއިތުރުން މަސައްކަތް ކުރާ ކޮންމެ ދިވެއްސަކަށް ވެސް އެންމެ ކުޑަކޮށް ދެވޭނެ މުސާރަ ވާނީ ކޮވިޑްގެ ދަތި އުދަނގުލުގައި އުޅެމުން ވެސް ކަށަވަރުކޮށްދީފައި ކަމަށް ރައީސް ވިދާޅުވި އެވެ.
"އެކަމަކުވެސް ބުނީ ނުވާނެއޭ. އެކަމަކު އަޅުގަނޑުމެން މިވަނީ މިކަންކަން ކޮށްފައި،" އިދިކޮޅު ފަރާތްތަކަށް ރައްދުދެއްވަަމުން ރައީސް ވިދާޅުވި އެވެ.
އެމަނިކުފާނު ވިދާޅުވީ ކޮވިޑް 19 އާއި ގުޅިގެން ގައުމުތައް ބަންދުކޮށް އިގްތިސާދުތައް ހަލާކުވި ނަމަވެސް ރާއްޖެ ސަލާމަތްވީ އެވަގުތު ލޯން ނަގައި، ރާއްޖޭގެ ބޯޑަރު އަވަހަށް ހުޅުވާލައިގެން އިގްތިސާދު ހަމައަކަށް އެޅުވުމަށް މަސައްކަތް ފެށުމުން ކަމަށެވެ.
ރައީސް ވިދާޅުވީ މިސަރުކާރު ހިންގަމުންދަނީ ހާމަކަން ބޮޑު ގޮތެއްގައި އަދި ޖަވާބުދާރީވެސް ވަމުން ކަމަށެވެ. އެގޮތުން ވިދާޅުވީ ސަރުކާރަށް ލިބޭ އެއްޗަކާއި ކުރާ ހަރަދު ކޮންމެ ހަފްތާއަކު ސަރުކާރުން ހާމަކުރަމުންދާ ކަމަށެވެ. އަދި ނިމިދިޔަ ސަރުކާރަށް ވުރެ ގިނައިން މިސަރުކާރުގެ ވަޒީރުން މަޖިލީހަށް ހާޒިރުވެވަޑައިގެން ޖަވާބުދާރީވެވަޑައިގެންފައިވާ ކަމަށްވެސް ވިދާޅުވި އެވެ. އެގޮތުން ވިދާޅުވީ ނިމިދިޔަ ސަރުކާރުގައި ވަޒީރުން މަޖިލީހަށް ހާޒިރުވީ 56 ފަހަރު ކަމަށާއި މިސަރުކާރުގައި ވަޒީރުން 321 ފަަހަރު މަޖިލީހަށް ހާޒިރުވެ ޖަވާބުދާރީވެވަޑައިގެންފައިވާ ކަމަށެވެ.