ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަސައްކަތް ކުރައްވަނީ ޕީޕީއެމްގެ ޕީއެންސީ ހިމެނޭ ޕްރޮގްރެސިވް ކޮންގްރެސް ކޯލިޝަން ބައިބައިކޮށްލުމަށް ކަމަށާއި އެކަމަށް ކޯލިޝަންގެ ބޭފުޅުން ސަމާލުވުމަށް ޕީޕީއެމްގެ ރައީސް އަބްދުﷲ ޔާމީންގެ ގާނޫނީ ޓީމުން ބުނެފި އެވެ.
ރައީސް ޔާމީންގެ ގާނޫނީ ޓީމުން ނަޝީދާ މެދު ހިތްހަމަނުޖެހިގެން ވާހަކަދައްކާފައި މިވަނީ މިފަހުން ނަޝީދު ޕީޕީއެމްގެ މެންބަރުންނާއި ރައީސް ޔާމީނަށް ވަރަށް ބޮޑަށް ހެޔޮއެދިވަޑައިގެން ވާހަކަދައްކަވަމުން ގެންދަވާ ވަގުތެއްގަ އެވެ.
ގދ. ގައްދޫގައި އިއްޔެ އޮތް ދަ ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބްގެ ކެމްޕޭން ޖަލްސާއެއްގައިވެސް ރައީސް ނަޝީދު ވަނީ ރައީސް ޔާމީނާ ގުޅޭގޮތުން ވާހަކަދައްކަވާފަ އެވެ. އެގޮތުން ވިދާޅުވީ ރައީސް ޔާމީން ޖަލުގައި އޮންނެވީ އެމަނިކުފާނު މިނިވަންކުރުމަށް ޕީޕީއެމްގެ އިސް ބޭފުޅުން މަސައްކަތް ނުކުރައްވާތީ ކަމަށެވެ.
ކުރިއަށް އޮތް ރިޔާސީ އިންތިހާބުގައި ޕީޕީއެމް އިން ދަ ޑިމޮކްރެޓްސްއާ އެކު މަސައްކަތް ކުރަން އެއްބަސްވާތާ ހަފްތާއެއްގެ ތެރޭގައި ޔާމީން މިނިވަންކުރާނެ ކަމުގެ ޔަގީންކަންވެސް ނަޝީދު ވަނީ ދެއްވާފަ އެވެ.
"ޕީޕީއެމް މެމްބަރުންނަށް ޔަގީންކޮށް އަރުވަން ތިބޭފުޅުން އަޅުގަނޑުމެންނާ އެކުގައި މަސައްކަތް ކުރުމަށް އަޅުގަނޑާއި އެއްބަސްވެ ސޮއި އަޅާތާ ހަފްތާއެއްތެރޭ މާލޭ މަގުމަތީގައި އަބަދު އުޅެގެންވެސް ރައީސް ޔާމީން ގެއަށް ގެނެސްދޭނަން،" ނަޝީދު ވިދާޅުވި އެވެ.
ނަޝީދުގެ މިފަދަ ވާހަކަފުޅުތަކާ ގުޅިގެން ރައީސް ޔާމީންގެ ގާނޫނީ ޓީމުގައި ހިމެނޭ އާދަމް ޝަމީމް ވިދާޅުވީ ރައީސް ނަޝީދަކީ ރައީސް ޔާމީނަށް ހެޔޮ އެދިވަޑައިގަންނަވާނެ ބޭފުޅެއް ނޫން ކަމަށެވެ. އެހެންކަމުން ޕްރޮގްރެސިވް ކޮންގްރެސް ކޯލިޝަންގެ މެންބަރުން އެކަމަށް ސަމާލުވުމަށް އޭނާ އެދިވަޑައިގެންނެވި އެވެ.
"[ނަޝީދު] އެ އުޅުއްވަނީ އާދައިގެ މަތިން ކަންކުރައްވާ ގޮތަށް އަޅުގަނޑުމެންގެ ތެރެއަށް ކަތުރުފަނި އަޅުއްވައި އަޅުގަނޑުމެން ބައިބައިކޮށްލައްވަން. އެތައް ޒަމާނެއް ވަންދެން ދުޝްމިނު ވެގެން އުޅުނު މީހަކު ކުއްލިއަކަށް މާ ހެޔޮވެގެން އުޅުމުގައި ނިކަން ބޮޑު ނުބައެއް އޮންނާނެ ކަމަށް މުސްކުޅިން ބުނޭ،" ޝަމީމް ވިދާޅުވި އެވެ.
ޝަމީމް އިތުރަށް ވިދާޅުވީ ރައީސް ޔާމީންގެ އެދިވަޑައިގަތުމަކީ އެމަނިކުފާނުގެ ސަޕޯޓަރުން ކުރިއަށް އޮތް ރިޔާސީ އިންތިހާބުގައި ޑރ. މުހައްމަދު މުއިއްޒު އާއި ހުސައިން މުހައްމަދު ލަތީފަށް ވޯޓު ދެއްވުން ކަމަށެވެ.
