ރައްޔިތުންގެ މަޖިލީހުގެ މިއަދުގެ ޖަލްސާގެ ކޯރަމް ހަމަނުވެގެން ޖަލްސާ ނިންމާލައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ކޯރަމް ހަމަވާ އަދަދަށް މެންބަރުން ހާޒިރުނުވުމުން ރިޔާސަތުގައި އިންނެވި ވިލުފުށި ދާއިރާގެ މެންބަރު ހަސަން އަފީފު ވަނީ ކޯރަމް ހަމަވޭތޯ ބެއްލެވުމަށްފަހު 9:30 ގައި ޖަލްސާ ކުރިއަށް ގެންދަވާނެ ކަމަށް ވިދާޅުވެފަ އެވެ.
ކޯރަމް ހަމަވޭތޯ ބެލުމަށްފަހު 9:30ގައި ޖަލްސާ ކުރިއަށް ގެންދަން މަސައްކަތްކުރި ނަމަވެސް ޖަލްސާ ފެށުމަށް ބޭނުންވާ އަދަދަށް މެންބަރުން ހަމަނުވާ ކަމަށް ހަސަން އަފީފު ވިދާޅުވި އެވެ.
މަޖިލީހުގެ މަސައްކަތް ކުރިއަށް ދިއުމަށް އިސްކަންދޭންޖެހޭކަން ފާހަގަކުރައްވާ ހަސަން އަފީފު ވިދާޅުވީ ކޯރަމް ހަމަނުވެ ޖަލްސާ ނުފެށުމަކީ ހިތާމަކުރައްވާ ކަމެއް ކަމަށެވެ.
"ޖަލްސާ ދެން އޮންނަ ދުވަހެއް އިދާރާގެ ފަރާތުން އިއުލާނުކުރައްވާނެ. މިހިސާބުން ކޯރަމް ހަމަނުވެގެން ޖަލްސާ ކުރިއަށް ނުގެންދެވޭތީ މި ހިސާބުން ނިންމާލީ،" ހަސަން އަފީފު ވިދާޅުވި އެވެ.
މަޖިލީހުގެ ގަވާއިދުގައިވާ ގޮތުގެ މަތިން ޖަލްސާ ކުރިއަށް ގެންދެވެނީ ޖަލްސާ ފަށާއިރު 22 މެންބަރު ހާޒިރުވުމުންނެވެ.
ކޯރަމް ހަމަނުވުމުން މަޖިލީހުގެ އިއްޔެ ޖަލްސާވެސް ކުރިއަށް ނުގެންދެވުނެވެ.
ރައްޔިތުންގެ މަޖިލީހުގައި އިއްޔެ އާއި މިއަދުގެ ޖަލްސާއަށް އެޖެންޑާކޮށްފައިވަނީ މަޖިލީހުގެ ދާއިމީ ކޮމިޓީތަކުގައި ހިމެނިވަޑައިގަންނަވާ ސިޔާސީ ޕާޓީތަކަށް ނިސްބަތްވެވަޑައިގަންނަވާ މެންބަރުންނާއި ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރާ ގޮތަށް ގެނެވޭ ބަދަލާގުޅޭ މައްސަލަ އާއި ވޯޓުން ނިންމާ ހިސާބަށް ގޮސްފައިވާ ކަންކަމަށް ވޯޓަށް އެހުމެވެ.