އެންޓި-ކޮރަޕްޝަން ކޮމިޝަން (އޭސީސީ) އަށް ދެ މެންބަރުން އައްޔަންކުރަން ރުހުން ހޯދުމަށް ރައްޔިތުންގެ މަޖިލީހަށް ހުށަހަޅުއްވައިފި އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުންގެ މަޖިލީހަށް ފޮނުއްވި ސިޓީގައި ވަނީ އޭސީސީގެ ދެ މެންބަރުން މަގާމުން އިސްތިއުފާ ދެއްވުމުން އެ މަގާމަށް ކުރިމަތިލުމަށް އާންމުކޮށް އިއުލާނުކުރުމުން އެކަމަށް އިޖާބަ ދެއްވި ބޭފުޅުންގެ ތެރެއިން ރައީސަށް ފެނިވަޑައިގެންނެވި ދެ ނަން ހުށަހަޅުއްވާފަ އެވެ.
ރައީސް ހުށަހެޅުއްވި ދެ ބޭފުޅުން
- އަހުމަދު ނާޝިދު، މއ. ގޯލްޑަން މޫން
- އާސިޔާ އަޒީމާ، ރޯޒްވިލާ، ރ. ހުޅުދުއްފާރު
އޭސީސީއަށް އައްޔަންކުރަން ރައީސް މުއިއްޒު ފޮނުއްވި ބޭފުޅުންގެ ތެރެއިން އަހުމަދު ނާޝިދު ވަނީ މީގެ ކުރިން ޕޮލިސް ބޯޑުގެ މެންބަރުކަން ކުރައްވާފަ އެވެ. ޕޮލިސް ބޯޑުން އޭނާ ވަކިކުރީ މި ސަރުކާރުންނެވެ.
އާސިޔާ އަޒީމާ ވަނީ މަޖިލީހުގެ ޑެޕިއުޓީ ޑިރެކްޓަރުގެ މަގާމާއި ވިޔަފާރިވެރިންގެ ޖަމިއްޔާގެ ނައިބުރައީސްކަން ކުރައްވާފަ އެވެ.
އޭސީސީގެ ދެ މެންބަރެއްގެ މަގާމު މިދިޔަ އަހަރުގެ ނޮވެމްބަރު 25 ވަނަ ދުވަހު ހުސްވީ އެ ކޮމިޝަންގެ ނައިބު ރައީސްގެ ގޮތުގައި އަބްދުލް ސަލާމް އާއި މެންބަރެއްގެ ގޮތުގައި ތޯހާ މުހައްމަދަށް ރައްޔިތުންގެ މަޖިލީހުން ބޮޑެތި ތުހުމަތުތަކެއްކޮށް އެ ދެ ބޭފުޅުން މަގާމުން ވަކިކުރުމަށް މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމާ، މަޖިލީހުގެ ތަޅުމުން ވޯޓަށް އެހުމަށް ތައްޔާރުވަމުން ދަނިކޮށް މަގާމުން އިސްތިއުފާ ދެއްވުމާ ގުޅިގެންނެވެ.