އޮސްޓްރޭލިއާގެ ކުރީގެ ފޮރިން މިނިސްޓަރު އެލެކްސެންޑާ ޑައުނާ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ތައުރީފް ކުރައްވައިފި އެވެ.
އެލެކްސެންޑާ ޑައުނާ ވިދާޅުވީ ރައީސް ސޯލިހުގެ ވެރިކަމުގައި ރާއްޖެ ހަމަޖެހިލައި އިގްތިސާދީ އަދި އިޖުތިމާއީ ގޮތުން ބޮޑެތި ކުރިއެރުންތަކެއް ހޯދާފައިވާ ކަމަށެވެ.
"އޮސްޓްރޭލިއާގެ ކުރީގެ ފޮރިން މިނިސްޓަރެއްގެ ހައިސިއްޔަތުން، އެމަނިކުފާނު ހާސިލްކުރައްވާފައިވާ ކަންކަމަށް އަޅުގަނޑު ތައުރީފް ކުރަން،" ޑައުނާ ވިދާޅުވި އެވެ.
ކުރިއަށް އޮތް ރިޔާސީ އިންތިހާބު ކައިރިވަމުން އަންނައިރު މި ވޭތުވެދިޔަ ދުވަސްތަކުގައި ރާއްޖެއަށް ލިބިފައިހުރި ކުރިއެރުންތައް ފާހަގަކުރައްވަމުން ޑައުނާ ވިދާޅުވީ ޑިމޮކްރަސީގެ ހަމަތަކާއި އެއްގޮތަށް ވެރިކަންކުރުމަށާއި ބައިނަލްއަގުވާމީ ގުޅުންތައް ވަރުގަދަކުރުމުގައި ރާއްޖެއިން ވަރަށް ބޮޑު އިސްކަމެއްދީފައި ކަމަށެވެ. ރާއްޖެ އަލުން ކޮމަންވެލްތާ ގުޅުމަކީވެސް މިކަމުގެ ނަތީޖާކަމަށް ފާހަގަކުރެއްވި އެވެ.
ރާއްޖޭގައި ފަތުރުވެރިކަމުގައި ދާއިރާގައި މަސައްކަތް ކުރާ މުވައްޒަފުންނަށް 10 ޕަސަންޓްގެ ސާވިސް ޗާޖެއް ގާނޫނަކުން ކަށަވަރުކޮށްދީފައިވާތީ އެކަމުގެ ސަބަބުން އެމީހުންގެ ދިރިއުޅުމުގެ ފެންވަރު ރަނގަޅުވެގެން ގޮސްފައިވާ ކަމަށްވެސް ޑައުނާ ވިދާޅުވި އެވެ.
އޭނާ ވިދާޅުވީ ރާއްޖޭގެ މިނިމަމް ވޭޖް، އޮސްޓްރޭލިއާގެ އަމިއްލަ މިނިމަމް ވޭޖް ގަވާއިދުތަކާ އެއްގޮތަށް ތައާރަފް ކުރުމަކީ އިގްތިސޯދީ ހަމަހަމަކަން ގާއިމުކުރުމަށް ރައީސް ސޯލިހްގެ ސަރުކާރުން އެޅި ވަރަށް މުހިއްމު ފިޔަވަޅެއް ކަމަށެވެ.
ރާއްޖޭގައި މަތީ ތައުލީމުގެ ދާއިރާގެ ކަންތައްތައް ހަރުދަނާކުރުމަށް އެޅުއްވި ފިޔަވަޅުވެސް އޭނާ ވަނީ ފާހަގަކުރައްވާފަ އެވެ. އެގޮތުން ހިލޭ ޑިގްރީއަށް ކިޔެވުމުގެ ފުރުސަތު ފަހިކޮށްދީފައިވުމާއި ޓީޗަރުންގެ މުސާރަ 56 ޕަސަންޓް ވަރު ބޮޑުކޮށްދީފައިވާ ކަމަށް ވިދާޅުވި އެވެ.
"ދެ ގައުމުގައިވެސް ތައުލީމަށް އިސްކަންދޭ. ރާއްޖެއިން ފުރަތަމަ ޑިގްރީއާއި ހަމައަށް ހިލޭ ކިޔެވޭ. މިކަމަކީ އިގުތިސޯދީ ފުރުސަތުތައް ހޯދުމަށް ފަހިވެގެންދާނެ ކަމެއް،" ޑައުނާ ވިދާޅުވި އެވެ.
އޭނާ ވިދާޅުވި ގޮތުގައި ހަމަސް ދުވަހުގެ މުސާރަ ލިބޭ މެޓާނިޓީ ލީވް އާއި އެއް މަސް ދުވަހުގެ މުސާރަ ލިބޭ ޕެޓާނިޓީ ލީވް ލިބިފައިވާ މުސްލިމު ގައުމުތަކުގެ ތެރޭގައި ރާއްޖެ ހިމެނެ އެވެ.
ޑައުނާ ވިދާޅުވީ ރާއްޖެއަކީ ސައިޒުން ކުޑަ ގައުމަކަށްވީ ނަމަވެސް ރާއްޖެއިން ދަނީ 21 ވަނަ ގަރުނުގެ މައްސަލަތަކަށް ހަމަހަމަ ހައްލުތައް ހޯދުމުގެ ގޮތުން ގާނޫނުތައް ހަރުދަނާ ކުރަމުން ކަމަށެވެ.
"އެބޭފުޅުން އިންތިހާބަށް މިސްރާބު ޖަހާއިރު، އަޅުގަނޑު އުއްމީދު ކުރަން ރާއްޖޭގެ ރައްޔިތުން، ރާއްޖެއަށް ލިބިފައިވާ ކުރިއެރުންތައް ހަނދާންކޮށް، ރަނގަޅު ލީޑަޝިޕަކާއެކު މުސްތަގުބަލަށް ވިސްނާނެ ކަމަށް،" ޑައުނާ ވިދާޅުވި އެވެ.