މަނީ ލޯންޑާކުރުމާއި މަކަރާއި ހީލަތް ހެދުމުގެ ތުހުމަތުގައި ދައުލަތުން ދައުވާކޮށްފައި ވަނިކޮށް ރާއްޖެ އިން ބޭރަށް ފުރައިގެން ދިޔަ ހުސައިން ޝިފާއު ރާއްޖެ އައުމާއެކު އޭނާގެ ޕާސްޕޯޓް ހިފަހައްޓައިފިއެވެ.
ސައްހަ ނޫން ޓެލެގްރަފިކް ޓްރާންސްފާ (ޓީޓީ) ފޮނުވައިގެން ރާއްޖެއިން ބޭރުގެ ކުންފުނިތަކަކަށް އޮޅުވާލައިގެން ވިޔަފާރިކުރުމުގެ ކުށުގެ ތުހުމަތުގައި އޭނާ ހައްޔަރުކުރީ މި އަހަރުގެ އޭޕްރީލް 28 ގައެވެ. ނަމަވެސް ހައިކޯޓުން މިދިޔަ މެއި 27 ވަނަ ދުވަހު ޝިފާއު ދޫކޮށްލުމާ އެކު އޭނާ ވަނީ ފުރައިގެން ރާއްޖެއިން ބޭރަށް ގޮސްފަ އެވެ.
ޝިފާއު ދޫކޮށްލި މައްސަލަ ދައުލަތުން އިސްތިއުނާފް ކުރިއިރު އޭނާ ފުރާފައިވާތީ ފުލުހުން އެ ދުވަސްވަރު ވަނީ އިންޓަޕޯލް މެދުވެރިކޮށް ޝިފާއު ހޯދުމަށް ރެޑް ނޯޓިސް ވެސް ނެރެފަ އެވެ.
ޝިފާއު ރާއްޖެ އައި ސީދާ ދުވަހެއް ސާފުވެފައެއް ނުވެ އެވެ. ނަމަވެސް އޭނާ ރާއްޖެ އައި އިރު ހައްޔަރުކުރުމުގެ އަމުރެއް އޮތުމުން އޭނާ ހައްޔަރުކޮށް ކޯޓަށް ހާޒިރުކުރުމުން ދޫކޮށްލީ ޕާސްޕޯޓް ހިފެހެއްޓުމަށްފަހު ޝަރުތުތަކަކާ އެކު އެވެ.
ދައުލަތުން ޝިފާއުގެ މައްޗަށް އުފުލާފައިވާ ދައުވާތަކުގެ ތެރޭގައި ހިމެނެނީ މަނީ ލޯންޑަރިންގެ ކުށުގެ ހަތް ދައުވާއަކާއި، މަކަރާއި ހީލަތް ހެދުމުގެ ކުށުގެ ހަތް ދައުވާއަކާއި އަދި ސައްހަ ނޫން ލިޔުމެއް ދިނުމުގެ ކުށުގެ ނުވަ ދައުވާ އެވެ.
ޝިފާއުގެ މައްޗަށް ދައުލަތުން ކުރާ 23 ދައުވާ ސާބިތުވެއްޖެނަމަ އޭނާގެ މައްޗަށް 38 އަހަރުގެ ޖަލު ހުކުމެއް އިއްވާނެ އެވެ.
މި މައްސަލައިގައި ހިމެނޭ 123،844.54 އެމެރިކާ ޑޮލަރު ނުވަތަ 1،909،682 ރުފިޔާ ދައުލަތަށް ނަގައިދިނުމަށްވެސް ދައުލަތުން ކޯޓުގައި އެދިފައިވެ އެވެ.