ފޭސްބުކް އެކައުންޓް ހެކްކޮށް މިދިޔަ 48 ގަޑިއިރުގެ ތެރޭގައި 35،000 އަށް ވުރެ ގިނަ ރުފިޔާ މަކަރާއި ހީލަތުން އަތުލާފައިވާ ކަމަށް ބުނާ މައްސަލަތަކެއް ފުލުހުން ފެންމަތިކޮށްފި އެވެ.
ފުލުހުން މިއަދު ބުނީ ފޭސްބުކް އެކައުންޓް ޕާސްވޯޑް ރީސެޓް ކުރުމަށް ކަމަށް ބުނެ ގުޅައި، އޯޓީޕީ ކޯޑު މޯބައިލް ފޯނަށް ފޮނުވުމަށް ފަހު ފޭސްބުކް އެކައުންޓް ހެކް ކޮށްގެން އޮޅުވާލައިގެން ފައިސާ ހޯދަމުންގެންދާ މައްސަލަތައް އެ އިދާރާއަށް ހުށަހަޅަމުންދާ ކަމަށެވެ. އެގޮތުން، 48 ގަޑިއިރުގެ ތެރޭގައި މިފަދަ ހަ މައްސަލަ ހުށަހަޅާފައިވާއިރު 35،000 އަށް ވުރެ ގިނަ ރުފިޔާ މަކަރާއި ހީލަތުން އަތުލާފައިވާކަމަށް ތަހުގީގުން އެނގިފައިވާ ކަމަށްވެސް ބުންޏެވެ.
ފުލުހުން ބުނީ ނުދަންނަ ބައެއް މީހުން، ގުޅައި ތިޔަ ނަމްބަރަކީ މީގެ އަހަރުތަކެއް ކުރިން އޭނާ ގެންގުޅުނު މޯބައިލް ނަމްބަރެއް ކަމަށް ބުނާ ކަމަށެވެ. އަދި ރާއްޖެއިން ބޭރަށް ދިރިއުޅުން ބަދަލުކުރަންވެގެން ނަމްބަރު ދޫކޮށްލީ ކަމަށް ބުނާ ކަމަށްވެސް ބުންޏެވެ. އެހެންކަމުން އޭނާގެ ފޭސްބުކް ޕާސްވޯޑު ރީސެޓް ނުކުރެވިގެން އުޅޭ ކަމަށާ އަދި ޓޫފެކްޓަ އޯތޮންޓިކޭޓަ ސެޓްކޮށްފައިވާނީ އެ ނަމްބަރަށް ކަމަށް ބުނެ ފޯނަށް ލިބޭ އޯޓީޕީ ކޯޑު ކިޔައިދިނުމަށް އެދޭ ކަމަށްވެސް ފުލުހުން ބުންޏެވެ.
މީގެ އިތުރުން ސޯޝަލް މީޑިއާގެ އެހެނިހެން ވަސީލަތްތައް މެދުވެރިކޮށް ވާހަކަ ދައްކައި މަކަރާއި ހީލަތުން ފައިސާ ހޯދާ މައްސަލަތައްވެސް އެ އިދާރާ އަށް ހުށަހަޅަމުންދާ ކަމަށް ފުލުހުން މައުލޫމާތު ދީފައިވެ އެވެ.
"އަމިއްލަ ނަމްބަރަށް މިގޮތަށް އަންނަ އޯޓީޕީ ކޯޑު އެއްވެސް މީހަކާ ހިއްސާ ނުކުރުމަށާ އަދި ފޭސްބުކް މެސެންޖަ އިން ނުވަތަ މީސްމީޑިއާގެ އެހެނިހެން ވަސީލަތަކުން ވިޔަސް ފައިސާ ހޯދުމަށް ވާހަކަ ދައްކާ މީހުންގެ ކިބައިން ސަލާމަތްވެ ރައްކާތެރިވެތިބުމަށް އިލްތިމާސްކުރަމެވެ. އަދި ކާކުކަން ޔަގީންކުރުމަށްފަހު ނޫނީ ފައިސާގެ އެއްވެސް މުއާމަލާތެއް ނުހިންގުމަށްވެސް އިލްތިމާސްކުރަމެވެ." ފުލުހުން ބުނެފައިވެ އެެވެ.