ޑިޒްނީގެ އާ އެނިމޭޓަޑް ފިލްމް "ވިޝް"ގެ ޓްރޭލާ ނެރެފި އެވެ.
މި ޓްރޭލާ ވެގެން ގޮސްފައިވަނީ 2019 ވަނަ އަހަރުގެ "ފްރޯޒަން 2"ގެ ޓްރޭލާތަކަށްފަހު އެންމެ ގިނައިން ބަލާފައިވާ ޓްރޭލާ އަށެވެ.
ޑިޒްނީ އިން ބުނާ ގޮތުގައި އޭޕްރީލްގައި ނެރުނު ޓީޒާ ޓްރޭލާއަށްވުރެ ފަހުން ނެރުނު ޓީޒާއަށް ލިބިފައިވާ ވިއުޒް ގާތްގަނޑަކަށް 20 މިލިއަން އިތުރެވެ. އަދި މިއީ މިހާތަނަށް ޓިކްޓޮކްގައި އެންމެ ގިނަ ވިއުޒް ލިބިފައިވާ ޑިޒްނީގެ ޓްރޭލާ އެވެ.
ޓްރޭލާއިން ފެންނަ އެނިމޭޝަން ސްޓައިލަކީ ޑިޒްނީ އިން ކުރިން ބޭނުންކުރި ސްޓައިލެވެ. އެއީ ވަރަށް އަސްލާ އެއްގޮތް ސީޖީއައި (ކޮމްޕިއުޓާ ޖެނެރޭޓަޑް އިމޭޖަރީ)ގެ ބަދަލުގައި 2ޑީ-ކާޓޫނު އެނިމޭޝަން ސްޓައިލެކެވެ. އަދި މި ޓްރޭލާއަށާއި އެނިމޭޝަން ސްޓައިލަށް އިންޓަނެޓްގައި ދަނީ ތައުރީފްގެ ބަސްތައް އޮހެމުންނެވެ.
"ވިޝް"ގެ ޓްރޭލާގައި ދައްކަނީ އާޝާ، އައިބީރިއަން ޕެނިންސޫލާގެ ޖާދުވީ ރަސްކަމެއް ކަމުގައިވާ ރޯސާސްގައި ދިރިއުޅޭ ތަނެވެ. ރޯސަސް ބިނާކޮށްފައިވަނީ މީހުންގެ އުއްމީދުތައް ނޫނީ ވިޝްތައް ފުރިހަމަކުރުމުގެ ބާރު ލިބިފައިވާ ރަސްގެފާނު މެގްނިފިކޯ އެވެ. ރަސްގެފާނު މެގްނިފިކޯގެ އެޕްރެންޓިސްއެއްގެ ގޮތުގައި މަސައްކަތްކުރަން ފުރުސަތު ލިބުމުން، އާޝާ ވަރަށް އުފާވެ އެވެ.
އާޝާއަށް ދޭހަވާ ކަމަކީ މީހުންގެ ހުރިހާ ވިޝްތަކެއް ރަސްގެފާނު މެގްނިފިކޯއަށް ދިން ނަމަވެސް އޭގެ ތެރެއިން ފުރިހަމަ ކުރަނީ އޭނާ ބޭނުންވާ ވިޝްތަކެއް އެކަނި ކަމެވެ. އަދި މީހުންގެ ގިނަ ވިޝްތަކަކީ ފުރިހަމަ ނުވާނެ ވިޝްތަކެއް ކަމެވެ.
މި ފިލްމްގައި އާޝާގެ އަޑު އަޅާފައިވަނީ އާރިއާނާ ޑިބޯސް އެވެ. އަދި ރަސްގެފާނު މެގްނިފިކޯގެ އަޑު ކްރިސް ޕައިން އަޅާފައިވީއިރު، ވެލެންޓީނޯގެ އަޑު އެޅީ އެލަން ޓުޑީކް އެވެ.
"ވިޝް"ގެ ޑައިރެކްޓަރުން ކަމަށް ކްރިސް ބަކް އާއި ފޯން ވީރަސުންތޯން އަކީ ޑިޒްނީގެ ގިނަ ފިލްމްތަކެއް ޑައިރެކްޓްކޮށް އެކުގައި މަސައްކަތް ކޮށްފައިވާ ދެ މީހުންނެވެ. އެގޮތުން ކްރިސް އަކީ "ޕޮކަހޮންޓާސް"، "ޓާޒަން" އަދި "ފްރޯޒަން"ގެ ދެ ފިލްމްގެ ޑައިރެކްޓްރެވެ.
ކްރިސް އަށް އެކި ނޮމިނޭޝަންތަކާއެކު، 2014 ގައި "ފްރޯޒަން" އަށް ބެސްޓް އެނިމޭޓަޑް ފީޗާ ފިލްމް ކެޓަގަރީ އިން އެކަޑަމީ އެވޯޑް ލިބިފައިވެ އެވެ. މިއީ ފޯން ޑައިރެކްޓް ކުރާ ފުރަތަމަ ފިލްމް ނަމަވެސް، އޭނާ އަކީ "ފްރޯޒަން"، "މުއާނާ"، "ޒޫޓޯޕިއާ" އަދި "ރާޔާ އެންޑް ދަ ލާސްޓް ޑްރޭގަން" ގައި މަސައްކަތްކޮށްފައިވާ ހުނަރުވެރި މީހެކެވެ.
މި ފިލްމަކީ ޑިޒްނީގެ 62 ވަނަ އެނިމޭޓެޑް ފީޗާ ފިލްމެވެ. މި ފިލްމު ނެރޭއިރު، ޑިޒްނީގެ 100 ވަނަ އަހަރީ ދުވަސް ފާހަގަކުރަމުން އެބަދެ އެވެ. ޑިޒްނީގެ ފުރަތަމަ އެނިމޭޓަޑް ފީޗާ ފިލްމަކީ 1937 ގައި ރިލީޒްކުރި "ސްނޯ ވައިޓް އެންޑް ދަ ސެވަން ޑްވޯފްސް" އެވެ.
"ވިޝް" ސިނަމާތަކަށް ރިލީޒްކުރާނީ އަންނަ ނޮވެމްބަރު 22 ވަނަ ދުވަހު އެވެ.