މާލޭގެ ދިވެހި ބޭސް ކުލިނިކެއްގައި ހަށިވިއްކި ކަމުގެ ތުހުމަތުގައި ހައްޔަރުކޮށްފައިވާ މީހުންގެ ތެރެއިން އެކެއްގެ ބަންދުގެ މުއްދަތު އިތުރުކޮށްފި އެވެ.
ފުލުހުންގެ އެންޓި ހިއުމަން ޓްރެފިކިން ޑިޕާޓްމަންޓާއި ސްޕެޝަލިސްޓް އޮޕަރޭޝަން އަދި އިންޓެލިޖެންސް ގުޅިގެން މިމަހުގެ 12 ވަނަ ދުވަހުގެ ރޭ ހިންގި އޮޕަރޭޝަންގައި ތިން ދިވެހިން ހައްޔަރުކުރި އެވެ.
މީގެތެރޭގައި ހިމެނެނީ 35 އަަހަރުގެ އަންހެނަކާއި 44 އަހަރުގެ އަންހެނެއްގެ އިތުރުން 41 އަހަރުގެ ފިރިހެނެކެވެ.
މި ތިން މީހުންގެ ބަންދާ މެދު ގޮތެއް ނިންމުމަށް މިމަހުގެ 13 ވަނަ ދުވަހު ކޯޓަށް ހާޒިރުކުރުމުން 35 އަހަރުގެ އަންހެން މީހާގެ ބަންދަށް 10 ދުވަަސް، 44 އަހަރުގެ އަންހެން މީހާގެ ބަންދަށް 5 ދުވަސް އަދި 41 އަހަރުގެ ފިރިހެން މީހާގެ ބަންދަށް 10 ދުވަސް ދީފަ އެވެ.
މީގެތެރެއިން 44 އަހަރުގެ އަންހެން މީހާގެ ބަންދުގެ މުއްދަތު ހަމަވާތީ އޭނާގެ ބަންދާ މެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރުކުރުމުން ކޯޓުން ވަނީ އޭނާގެ ބަންދަށް އިތުރު 10 ދުވަސް ދީފަ އެވެ.
މާލޭގައި ހަށިވިއްކުން އާންމުވެފައިވީ ނަމަވެސް އެކަން ހުއްޓުވުމަށް އެކަށީގެންވާ ފިޔަވަޅު އަޅަމުން ނުދާ ކަމަށް ބުނެ އާންމުން ގެންދަނީ ކަންބޮޑުވުން ފާޅުކުރަމުންނެވެ.