ޓޮމް ކްރޫޒްގެ "މިޝަން އިމްޕޮސިބަލް"ގެ 8 ވަނަ ފިލްމް މޭ 23، 2025 އަށް ފަސްކޮށްފި އެވެ.
މީގެ ކުރިން ޖޫން 28، 2024 ގައި ރިލީޒްކުރުމަށް ހަމަޖައްސާފައި އޮތް މި ފިލްމު ފަސްކުރީ ހޮލީވުޑްގައި ޖުލައި މަހުން ފެށިގެން ކުރިއަށްދާ އިހުތިޖާޖާ ގުޅިގެންނެވެ.
މި ފިލްމަށް ކުރިން ދީފައިވާ ނަން "މިޝަން އިމްޕޮސިބަލް: ޑެޑް ރެކަނިން ޕާޓް 2" ވެސް ބަދަލުވުން އެކަށީގެންވެ އެވެ.
ކްރިސްޓޮފާ މެކްކުއެރީ ޑައިރެކްޓްކުރާ މި ފިލްމުގެ ޝޫޓިން އަލުން ފަށަން ޖެހިފައިވާއިރު މި ފްރެންޗައިޒްގެ ފިލްމުތަކުގައި ހިމެނޭފަދަ އާދަޔާ ހިލާފް އަދި ނުރައްކާތެރި ސްޓަންޓްތަކާއި އެކްޝަން ސިކުއެންސްތައް މި ފިލްމްގައިވެސް ހިމެނޭނެ އެވެ.
ޝޫޓް ކުރަނީ އައިމެކްސް ޑިޖިޓަލް ކެމެރާއިންނެވެ. އަދި ސިނަމާތަކުގައި ތިން ހަފްތާއަށް އަޅުވާނެ ކަމަށް ޕެރެމައުންޓްއިން ބުނެފައިވެއެވެ.
މި ފްރެންޗައިޒްގެ ހަތްވަނަ ފިލްމް، "މިޝަން އިމްޕޮސިބަލް: ޑެޑް ރެކަނިން ޕާޓް 1" ރިލީޒްކޮށްފައިވަނީ މިދިޔަ ޖޫން މަހު އިޓަލީއަށް އަދި ޖުލައި މަހު އެމެރިކާ އަށެވެ.
މި ފިލްމަށް ރޮޓަން ޓޮމާޓޯޒްގެ 418 ކްރިޓީކުން 96 ޕަސަންޓުގެ ރޭޓިން ދީފައިވީ ނަމަވެސް 291 މިލިއަން ޑޮލަރުގެ ބޮޑު ބަޖެޓަކުން ހެދި މި ފިލްމަށް ބޮކްސް އޮފީހުގައި ލަފާކުރި ވަރުގެ އާމްދަނީއެއް ނުލިބެ އެވެ.
ބޮކްސް އޮފީހުގައި މިހާތަނަށް މި ފިލްމަށް ލިބިފައިވަނީ 567.5 މިލިއަން ޑޮލަރެވެ.
