އިންތިހާބީ ރައީސް ޑރ. މުހައްމަދު މުއިއްޒު ރައީސުލްޖުމްހޫރިއްޔާކަމުގެ ހުވާ ކުރައްވާ ރަސްމިއްޔާތުގައި ބައިވެރިވުމަށް އާންމުކޮށް ހުޅުވާލައިގެން އިތުރު 1،000 މީހުންނަށް ދައުވަތު ދިނުމަށް މަސައްކަތް ކުރަމުންދާ ކަމަށް އިންތިހާބީ ރައީސްގެ އޮފީހުން ބުނެފި އެވެ.
އިންތިހާބީ ރައީސުލްޖުމްހޫރިއްޔާގެ އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި އިންތިގާލީ މަރުހަލާގެ ތަރުޖަމާނު މުހައްމަދު ފިރުޒުލް އަބްދުﷲ ޚަލީލް ވިދާޅުވީ މުއިއްޒު ހުވާ ކުރައްވާ ރަސްމިއްޔާތުގެ ހާއްސަ ދައުވަތު ރައްޔިތުންގެ މަޖިލީހުން 3،500 މީހުންނަށް ދިނުމަށް ނިންމާފައިވާއިރު އާންމުކޮށް ހުޅުވާލައިގެން އިތުރު 1،000 މީހުންނަށް ދައުވަތު ދިނުމަށް މަސައްކަތް ކުރަމުންދާ ކަމަށެވެ.
ހުވާކުރުމުގެ ރަސްމިއްޔާތުގެ ތައްޔާރީތަކާ ގުޅޭ ގޮތުން ފިރުޒުލް އިތުރަށް ވިދާޅުވީ އެ ރަސްމިއްޔާތަށް އެންމެ ފުރަތަމަ ކަނޑައެޅިގެންދިޔަ އަގު ބޮޑު ކަމަށް އިންތިހާބީ ރައީސަށް ފެނިވަޑައިގަތުމުން އެ އަގު ކުޑަކުރުމަށް ރައްޔިތުންގެ މަޖިލީހުގައި އެދިވަޑައިގެންނެވި ކަމަށެވެ.
"އެންމެ ފުރަތަމަ މަޝްވަރާކުރެވުނު އަގަކީ 29 މިލިއަން،" ފިރުޒުލް ވިދާޅުވި އެވެ.
މިހާރު އެ ރަސްމިއްޔާތަށް ހަރަދު ކުރުމަށް ހަމަޖެހިފައިވަނީ 22.9 މިލިއަން ރުފިޔާކަން ފިރުޒުލް ފާހަގަކުރެއްވި އެވެ.
އިންތިހާބީ ރައީސް ޑރ. މުހައްމަދު މުއިއްޒު ރައީސްކަމުގެ ހުވާކުރެއްވުމުގެ ރަސްމިއްޔާތަށް ޖުމްހޫރީ މައިދާން ތައްޔާރުކުރުމުގެ މަސައްކަތް 22.9 މިލިއަން ރުފިޔާއަށް ހަވާލުކޮށްފައިވަނީ ސިފައިންގެ ވެލްފެއާ ކުންފުނި (ސިވެކް) އާ އެވެ.
އިންތިހާބީ ރައީސް ޑރ. މުހައްމަދު މުއިއްޒު އާއި އިންތިހާބީ ނައިބު ރައީސް ހުސައިން މުހައްމަދު ލަތީފު ހުވާ ކުރެއްވުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ ނޮވެމްބަރު މަހުގެ 17 ވަނަ ދުވަހު ޖުމްހޫރީ މައިދާނުގައި ބާއްވާ ރައްޔިތުންގެ މަޖިލީހުގެ ޖަލްސާއެއްގަ އެވެ.
ރައްޔިތުންގެ މަޖިލީހުގެ އިދާރާއިން ހާމަކުރި ގޮތުގައި ހުވާކުރެއްވުމުގެ ރަސްމިއްޔާތަށް ޖުމްހޫރީ މައިދާން ތައްޔާރުކުރުމުގެ މަސައްކަތް ސިވެކްއާ ހަވާލުކުރީ ޓެންޑާ ބޯޑުންނެވެ.