ސިޔާސީ ޕާޓީތަކުގެ މަޝްވަރާތައް އަންނަ މަހު ދޭއްގައި ފަށަނީ

ސަރުކާރުން އިސްވެ ބާއްވާ ސިޔާސީ ޕާޓީތަކުގެ މަޝްވަރާތައް އަންނަ މަހުގެ ދެވަނަ ދުވަހު ފަށަން ނިންމާފައިވާ ކަމަށް ސަރުކާރުން ހާމަކޮށްފި އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ފިޝަރީޒް މިނިސްޓަރު ޑރ. މުހައްމަދު ޝައިނީ ވިދާޅުވީ ސަރުކާރުން އިސްވެ ސިޔާސީ ޕާޓީތަކާއެކު ބާއްވާ މަޝްވަރާ ބައްދަލުވުންތަކުގެ ފުރަތަމަ ޖަލްސާ އަންނަ މެއި މަހުގެ ދެވަނަ ދުވަހު ބާއްވާނެ ކަމަށެވެ. މިހާތަނަށް އެއްވެސް ޕާޓީއަކުން މަޝްވަރާކުރަން ދެކޮޅުހަދާފައި ނުވާ ކަމަށާއި އަދާލަތު ޕާޓީއާއި އެމްޑީޕީން މަޝްވަރާއަށް ތައްޔާރަށް އޮތް ކަމުގެ ޔަގީންކަން ދީފައިވާ ކަމަށެވެ. އަދި މަޝްވަރާޓަކުގައި ބައިވެރިވާނެ ބޭފުޅުންގެ ނަންވެސް ބައެއް ޕާޓީތަކުން ފޮނުވާފައިވާ ކަމަށެވެ.

ބައެއް އިނދިކޮޅު ޕާޓީތަކުން ސަރުކާރާއެކު މަޝްވަރާތައް ފެށުމާ ގުޅިގެން ކުރަމުންދާ ޑިމާންޑްތަކާ ބެހޭގޮތުން ވާހަކަފުޅު ދައްކަވަމުން މިނިސްޓަރު ވިދާޅުވީ، ސިޔާސީ ހައްޔަރީން ރާއްޖޭގެ އެއްވެސް ޖަލެއްގައި ނެތް ކަމަށެވެ.

"ސިޔާސީ ޕާޓީތަކަށް ނިސްބަތްވާ ބަޔަކު ޖަލުގައި ތިބެދާނެ. އެކަމަކު ސިޔާސީ ހައްޔަރީން ރާއްޖޭގައި ނެތް. އަޅުގަނޑުމެން މަޝްވަރާތައް ކުރިއަށް މި ގެންދަނީ ހުރިހާ ޕާޓީތަކުގެ ޑިމާންޑްތައް ވެސް އެޖެންޑާގައި ހިމަނާ ގޮތަށް. ދެ މީގެ ކުރިން ބޭއްވި މަޝްވަރާ ބައްދަލުވުންތަކުގައި ޕާޓީތަކުން ހުށަހެޅި ޑިމާންޑްތަކުން ބައެއް ކަންކަން ނިމިފަ ވެސް ހުރެދާނެ. ބައެއް ކަންކަން އިތުރުވެސް ވެދާނެ. އެހެން ނަމަވެސް އަޅުގަނޑުމެން މިހާރު މިއޮތީ ވަރަށޤ އިހުލާސްތެރިކަމާއެކު މަޝްވަރާއަށް ފުރުސަތު ހުޅުވާލާފަ،" ޝައިނީ ވިދާޅުވި އެވެ.

ރައީސް އޮފީހުގެ ލީގަލް އެފެއާޒް މިނިސްޓަރު އާޒިމާ ޝުކޫރު ވިދާޅުވީ، ސިޔާސީ ޕާޓީތަކުގެ މަޝަވަރާތައް ކުރިއަށްދާއިރު ބޭރުގެ ފަރާތްތަކުގެ އެހީތެރިކަން ރާއްޖެއަށް ލިބޭނެ ކަމަށެވެ. އޭގެ މާނައަކީ ބޭރުގެ ފަރާތްތަކުން މަޝްވަރާގެ މޭޒަށް ޕާޓީތަކާއެކު ވަޑައިގަތުން ނޫންކަމަށްވެސް އެކަމަނާ ވިދާޅުވި އެވެ.

"ބޭރުގެ ފަރާތްތަކުން ދަނީ އަބަދުވެސް އެކި އެކި ކަންކަމުގަ ރާއްޖެއަށް އެހީތެރިކަން ފޯރުކޮށްދެމުން. އޭގެ މާނައަކީ މޭޒަށް ވަޑައިގަންނަވާނެ އެކޭ ނޫން. ސިޔާސީ ޕާޓީތަކާ އެކު މި ކުރާ މަޝްވަރާތަކުގައި ބޭރުގެ ފަރާތްތަކުގެ އެސިސްޓެންޓް އެކި ގޮތް ގޮތުން ލިބޭނެ،" މިނިސްޓަރު ވިދާޅުވި އެވެ.

ސިޔާސީ ޕާޓީތަކުގެ މަޝްވަރާ ފަށަން ސަރުކާރުން ތައްޔާރު ވަމުންދާއިރު ދާދިފަހުން ރާއްޖެއަށް ވަޑައިގެންނެވި ޔޫރަޕިއަން ޕާލިމެންޓް (އީޔޫ) ގެ ބޭފުޅުން ވެސް ވަނީ މަޝްވަރާތަކުގައި ރާއްޖެއަށް ބޭނުންވާ ހުރިހާ އެހީތެރިކަމެއް އެފަރާތުން ދެއްވާނެ ކަމަށް ވިދާޅުވެފައެވެ. އަދި އދ. އިންވެސް ވަނީ ރާއްޖެއަށް އެހީވާން ތައްޔާރަށް އޮތްކަމުގެ ޔަގީންކަން ދީފަ އެވެ.