ޑިމޮކްރަސީ އަށް ފައްކާވުމަށް ރާއްޖެ އިން ފަށާފައިވާ ދަތުރުގައި ސަރުކާރުން ވަމުންދާ ގުރުބާނީތައް ފާހަގަކުރައްވައި ޕާކިސްތާނުގެ ބޮޑުވަޒީރު ނަވާޒް ޝަރީފް، ރައީސް އަބްދުﷲ ޔާމީން އާއި ދިވެހި ސަރުކާރަށް ހިތްވަރު ދެއްވައިފި އެވެ.
ފޯނުން އިއްޔެ ދެ ލީޑަރުން ކުރިއަށް ގެންދެވި މަޝްވަރާތަކުގައި ޝަރީފް ވަނީ ސިޔާސީ މި ހަލަބޮލިކަމުގެ ތެރޭގައި ޕާކިސްތާނު ރާއްޖެއާ އެކުގައި އޮތް ކަމުގެ ޔަގީންކަން ދެއްވައިފަ އެވެ. އެގޮތުން ޑިމޮކްރަސީ އަށް ފައްކާވުމަށް ދިވެހިންނާއި ދިވެހިންގެ ސަރުކާރުން ކުރަމުން ގެންދާ މަސައްކަތާއި ކަޑައްތުކުރަމުން ގެންދާ ގޮންޖެހުންތައް ގިރާކުރުމުގައި ޕާކިސްތާނަށް ދެވެން އޮތް އެއްބާރުލުން ދެއްވާނެ ކަމަށް ވެސް ވިދާޅުވެފައިވެ އެވެ.
މީގެ އިތުރުން ރާއްޖޭގައި ޑިމޮކްރެޓިޑް އިންސްޓިޓިއުޝަންތައް މިހާރަށް ވުރެ ވަރުގަދަކޮށް ހަރުދަނާކުރުމަށް ކޮމަންވެލްތުގެ އެއްބާރުލުން ނުހަނު ބޭނުންވާކަން ވެސް ޕާކިސްތާނުގެ ބޮޑުވަޒީރު ފާހަގަކުރައްވާފައިވެ އެވެ.
ރާއްޖެއާ އެކު އޮތް ގުޅުމަކީ ފައިދާ ބޮޑު މުހިންމު ގުޅުމެއް ކަމަށް ޝަރީފް ވިދާޅުވިއިރު އެ ބޭފުޅާ ވިދާޅުވެފައި ވަނީ ޕާކިސްތާނަކީ ގައުމެއްގެ ދާޚިލީ މައްސަލައަކާ ބެހޭނެ ގައުމެއް ނޫން ކަމަށާއި ރާއްޖެއާ ވެސް ގުޅުން ބަދަހިކުރަމުން ދަނީ އެ ސިޔާސަތުގެ ދަށުން ކަމަށެވެ.
ޕާކިސްތާނުގެ ބޮޑުވަޒީރު ޝަރީފް، ރައީސް ޔާމީނަށް ހިތްވަރު ދެއްވާފައިވާއިރު މި ސަރަހައްދުގެ އެންމެ ވާދަވެރި ދެ ގައުމުގެ ގޮތުގައި އޮތް ޕާކިސްތާނާއި އިންޑިއާ އިން މިފަހުން ރާއްޖޭގެ ސިޔާސީ މަސްރަހަށް ހާއަސަ ސަމާލުކަމެއް ދޭކަން ފާހަގަކޮށްލެވެ އެވެ. ވަކިން ހާއްސަކޮށް ޗައިނާއާ ރާއްޖެ އިން ގުޅުން ބަދަހިކުރަމުން ދިއުމަކީ އަދި ޕާކިސްތާނާ ގުޅުން ބަދަހިކުރުމަކީ ރާއްޖޭގެ އެންމެ ބޮޑު އަވަށްޓެރިޔާ، އިންޑިއާ އަށް ހަޖަމުކުރަން އެހާ ފަސޭހަވާނެ ކަންކަމެއް ނޫންނެވެ.
ރައީސް ޔާމީނާއި ނަވާޒް ޝަރީފް. ފައިލް ފޮޓޯ
