ޑޮމެސްޓިކް ދަތުރުތަކުގެ ޗެކް-އިން އަށް ދިމާވި މައްސަލަ ހައްލުކޮށް އަލުން ހިދުމަތް ދޭން ފަށައިފި އެވެ.
މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން މިއަދު ހެނދުނު ބުނި ގޮތުގައި އެތެރޭގެ އުދުހުންތަކުގެ ދަތުރުތަކުގެ ޗެކް-އިން އަށް ޓެކްނިކަލް މައްސަލައެއް ދިމާވެ އެތެރޭގެ އުދުހުންތަކަށް ބުރޫ އެރި އެވެ.
އެ މައްސަލަ އާއި ގުޅިގެން ޗެކް-އިން ކުރުމުގައި ލަސްތަކެއް ދިމާވުމުން އެކަމަށް ޕެސެންޖަރުންގެ ކިބައިން އެމްއޭސީއެލް އިން މައާފަށްވެސް އެދުނެވެ.
އެމްއޭސީއެލްއިން ބުނީ ދިމާވި މައްސަލަ ހައްލުކުރުމަށް ޓެކްނިކަލް މުވައްޒަފުން މަސައްކަތް ކޮށްގެން މިހާރު ކުރިއެކޭ އެއްގޮތައް އެއްވެސް ދަތި ކަމެއް ނެތި ޗެކް-އިން ކުރިއަށްދާ ކަމަށެވެ.
މިދުވަސްވަރަކީ ރާއްޖޭގައި ސްކޫލު ޗުއްޓީ ދުވަސްކޮޅު ކަމަށްވުމުންނާއި ޓޫރިޒަމްގެ ޕީކް ސީޒަނަށް ވުމުން ކޮންމެ އަހަރަކުވެސް މިދުވަސްވަރު ވެލާނާ އިންޓަނޭޝަނަލް އެއާޕޯޓްގައި ތޮއްޖެހުން ބޮޑުވެ ތަފާތު ޓެކްނިކަލް މައްސަލަތައް ކުރިމަތިވެ އެވެ.