ރައްޔިތުންގެ މަޖިލީހުގެ ޕްރައިމަރީގައި ދަ ޑިމޮކްރެޓްސްގެ ޓިކެޓުގައި ވާދަކުރުމަށް ޝައުގުވެރިވާ މެންބަރުންނަށް އެ ފުރުސަތު ހުޅުވާލައިފި އެވެ.
މަޖިލިސް އިންތިހާބުގައި ޑިމޮކްރެޓްސްގެ ޓިކެޓުގައި ވާދަކުރުމުގެ ފުރުސަތު ވަނީ މިއަދުން ފެށިގެން އަންނަ މަހުގެ ހަތަރު ވަނަ ދުވަހުގެ ހަވީރު 4:00 އާ ހަމައަށް ހުޅުވާލާފަ އެވެ.
ޕްރައިމަރީ ބޭއްވުމަށް ހަމަޖެހިފައިވަނީ އަންނަ މަހުގެ 17 ވަނަ ދުވަހު ކަމަށް އެ ޕާޓީން ބުނެ އެވެ.
ޕްރައިމަރީއަށް ކުރިމަތިލުމުގެ ޝަރުތުތައް
- ފެބްރުއަރީ ހަތަރެއް، 2024 ގެ ހަވީރު 4:00 ގެ ކުރިން ޕާޓީގެ ދަފްތަރުގައި ޖެހިފައިވުން.
- ގާނޫނުއަސާސީ އާއި ރައްޔިތުންގެ މަޖިލީހުގެ އިންތިހާބުގެ ގާނޫނުގައި ބަޔާންކުރާ ޝަރުތުތައް ހުރުން.
ދަ ޑިމޮކްރެޓްސް އިން ބުނި ގޮތުގައި ޕްރައިމަރީގައި ވޯޓު ލެވޭނީ ފެބްރުއަރީ ހަތަރު ވަނަ ދުވަހުގެ ހަވީރު 4:00 ގެ ނިޔަލަށް ޕާޓީގެ ދަފްތަރުގައި ޖެހިފައިވާ މެންބަރުންނަށެވެ.
ވޯޓު ދިނުމުގެ ހައްގު ލިބިގެންވާ މެމްބަރުންގެ ވަގުތީ ލިސްޓް އާއްމުކޮށް ފެބްރުއަރީ ހަ ވަނަ ދުވަހު ޝަކުވާއަށް ހުޅުވާލާނެ ކަމަށާއި ފެބްރުއަރީ 10 ވަނަ ދުވަހުގެ ހަވީރު 4:00 އާ ހަމައަށް ޝަކުވާ ހުށަހެޅޭނެ ކަމަށް އެ ޕާޓީން ބުނެފައިވެ އެވެ.
ވޯޓު ދިނުމުގެ ހައްގު ލިބިގެންވާ މެމްބަރުންގެ ދާއިމީ ލިސްޓް އިއުލާނުކުރުމަށް ކަނޑައަޅާފައިވަނީ ފެބްރުއަރީ 11 ވަނަ ދުވަހެވެ.